Kickboxing : കിക്ക്ബോക്സിംഗ് ചെയ്‌താൽ ഗുണങ്ങൾ ഇതൊക്കെയാണ്

Cardio Kickboxing Workout : ശരീരത്തെ എല്ലായ്പ്പോഴും ഫിറ്റ് ആയി സൂക്ഷിക്കാനായി പല മാർഗങ്ങൾ അവലംബിക്കുന്നവരുണ്ട്. ചിലർ ദിവസവും രാവിലെയും വൈകുന്നേരവും ഒക്കെ റണ്ണിങ് വാക്കിംഗ് തുടങ്ങിയ പ്രവർത്തികളിൽ ഏർപ്പെടുമ്പോൾ മറ്റു ചിലർ യോഗയോ അല്ലെങ്കിൽ ജിമ്മിലെ മെഷീൻ വ്യായാമങ്ങൾ പോലുള്ളവ പരീക്ഷിക്കുന്നു. ഓരോരുത്തരുടെയും താൽപര്യങ്ങൾ അനുസരിച്ച് ഇതിൽ മാറ്റം ഉണ്ടാകുന്നുണ്ട്. എന്നാൽ ഇതിൽനിന്നെല്ലാം വ്യത്യസ്തമായി കുറച്ചുപേരെങ്കിലും കിക്ക്ബോക്സിംഗ് പോലുള്ള മാർഷ്യൽ ആർട്ട് വർക്ക് ഔട്ട് രീതികൾ തിരഞ്ഞെടുക്കാറുണ്ട്. ഫിറ്റ്നസ് നേടിയെടുക്കാനായി നിങ്ങളുടെ ദൈനംദിന ഷെഡ്യൂളിലേക്ക് ഉയർന്ന പ്രചോദനവും ഊർജ്ജവും നൽകുന്ന കിക്ക്ബോക്സിംഗ് വർക്ക്ഔട്ടുകൾ ചേർക്കുന്നത് ഏറ്റവും മികച്ച തെരഞ്ഞെടുപ്പുകളിൽ ഒന്നാണ്. കിക്ക്‌ബോക്‌സിംഗ് വർക്കൗട്ടുകൾ ആയോധന കലയുടെ ഏറ്റവും നൂതന രീതികളെ അടിസ്ഥാനമാക്കിയുള്ളതാണ്. നമ്മുടെ ശരീരത്തിന് ഏറ്റവും മികച്ച രീതിയിൽ കാർഡിയോ വർക്ക് വർക്കൗകൾ നൽകാൻ കഴിയുന്ന ഇവ ഹൃദയാരോഗ്യത്തിനും ബോഡി സ്റ്റാമിന വർദ്ധിപ്പിക്കുന്നതിനും ഏറ്റവും മികച്ചതാണെന്ന് പറയാം. നിങ്ങളുടെ ശരീരത്തിന് മൊത്തത്തിൽ വ്യായാമം നൽകാനും ചുരുങ്ങിയ സമയത്തിനുള്ളിൽ ശരീരത്തിന് ഷേപ്പ് നേടിയെടുക്കാനും ഒക്കെ ഇത് സഹായം ചെയ്യും.

നിങ്ങൾ ഒരു ഫിറ്റ്നസ് പ്രേമിയോ ദീർഘകാലമായി ജിം വർക്കൗട്ടുകൾ ചെയ്യുന്നവരോ ആകട്ടെ, ആഴ്‌ചയിൽ ഒരിക്കലെങ്കിലും കിക്ക്‌ബോക്‌സിംഗ് വർക്ക്ഔട്ട് പരിശീലിക്കാൻ ശ്രമിക്കുന്നത് ശരീരത്തെ കൂടുതൽ ഊർജ്ജസ്വലമാക്കാൻ സഹായിക്കും. സാധാരണ വർക്കൗട്ടുകളിൽ നിന്നും മാറി പുതുതായി എന്തെങ്കിലും പരീക്ഷിക്കാൻ ആഗ്രഹിക്കുന്നവർ അറിഞ്ഞിരിക്കാൻ കിക്ക്ബോക്സിംഗ് വർക്കൗട്ടുകളുടെ ഏഴ് നേട്ടങ്ങൾ ഇതാ:

1. സമ്മർദ്ദം കുറയ്ക്കുന്നു

കിക്ക്ബോക്സിങ് ചെയ്യുന്നത് വഴി ശരീരത്തിലെ സമ്മർദം ഒരു പരിധി വരെ കുറയ്ക്കാൻ കഴിയുമെന്ന് പറയപ്പെടുന്നു. നിങ്ങൾ എന്തെങ്കിലും സമ്മർദ്ദത്തിൽ ആണെന്നിരിക്കട്ടെ, ഹൈ എനർജി വർക്കൗട്ട് ആയ കിക്ക്‌ബോക്‌സിംഗ് ചെയ്യാൻ തുടങ്ങി മിനിറ്റുകൾക്കുള്ളിൽ തന്നെ നിങ്ങളുടെ മനസ്സ് സമ്മർദ്ദരഹിതമായി മാറുന്നത് നിങ്ങൾ തിരിച്ചറിയും. നിരവധി വിദഗ്ധർ അംഗീകരിച്ചിട്ടുള്ള കാര്യമാണിത്. അതുകൊണ്ടുതന്നെ നിങ്ങളുടെ മനസ്സിനെ എന്തെങ്കിലും അസ്വസ്ഥതകളോ ദേഷ്യമോ ഉള്ളപ്പോൾ ഒക്കെ മനസ്സിനെ ശാന്തമാക്കാൻ ചെയ്യാൻ കഴിയുന്ന വ്യായാമങ്ങളിൽ ഒന്നാണ് ഇത്. കിക്ക്‌ബോക്‌സിംഗിലെ ചലനങ്ങൾ ശരീരത്തിലെ നിരവധി പ്രധാന പേശികള വെല്ലുവിളിക്കുകയും ശരീരത്തിന് മൊത്തത്തിലുള്ള വ്യായാമം വേഗത്തിൽ നൽകുകയും ചെയ്യും.
Blood Circulation | ഈ വ്യായാമങ്ങൾ നിങ്ങളുടെ രക്തയോട്ടം മെച്ചപ്പെടുത്തും
2. ആത്മവിശ്വാസം വർദ്ധിപ്പിക്കുന്നു

മാനസികാരോഗ്യ വിദഗ്ധർ പറയുന്നതനുസരിച്ച്, കിക്ക്ബോക്സിംഗ് എന്ന ഈയൊരു വർക്കൗട്ട് ഒരാളുടെ ശരീരത്തിൽ എൻഡോർഫിൻ ഹോർമോണുകളെ പുറത്തുവിടാൻ സഹായിക്കുന്നു, ഇത് നിങ്ങളുടെ മാനസികാവസ്ഥയ്ക്ക് ഉത്തേജനം നൽകുകയും കൂടുതൽ ആത്മവിശ്വാസം നേടിയെടുക്കാൻ സഹായിക്കുകയും ചെയ്യുന്നതാണ്. അതുകൊണ്ടുതന്നെ ഈ വ്യായാമത്തിന് ശേഷം ലഭിക്കുന്ന എൻഡോർഫിൻസ് മണിക്കൂറുകളോളം നിങ്ങളെ സന്തോഷവും പോസിറ്റീവും ആക്കിത്തീർക്കും.

3. മെച്ചപ്പെട്ട ഏകോപനം

നിങ്ങൾക്ക് ശാരീരിക പോസ്ചർ പ്രശ്‌നങ്ങൾ ഉണ്ടെന്ന് അനുഭവപ്പെടുകയും ഇതിൽ മികച്ച മാറ്റങ്ങൾ വരുത്താൻ ആഗ്രഹിക്കുകയും ചെയ്യുന്നുണ്ടെങ്കിൽ കിക്ക്ബോക്സിങ് ഏറ്റവും മികച്ചതാണ്. കുറച്ചുനാൾ ഇത് പരീക്ഷിക്കുന്നതിലൂടെ നിങ്ങളുടെ ‘കോർ’ ഭാഗം ശക്തിപ്പെടുത്താനും നിങ്ങളുടെ റിഫ്ലെക്സുകളും ഏകോപന കഴിവുകളും മെച്ചപ്പെടുത്താനും നിങ്ങൾക്ക് കഴിയും. കിക്ക്‌ബോക്‌സിംഗിലെ വേഗത്തിലുള്ള പഞ്ചുകളും കിക്കുകളും ഓരോ ചലനങ്ങൾ പോലും വിജയകരമായി പൂർത്തീകരിക്കാനും വീണ്ടും നിങ്ങൾക്ക് ആവശ്യമായ ഊർജ്ജം കേന്ദ്രീകരിക്കാനുമുള്ള അവസരം ഇത് നൽകും.

4. ഉയർന്ന അളവിൽ കലോറി എരിച്ച് കളയാം

കിക്ക്‌ബോക്‌സിംഗിന് ഒരാളുടെ ശരീരത്തിൽ നിന്ന് മണിക്കൂറിൽ 800 കലോറി വരെ കത്തിച്ചുകളയാൻ കത്തിക്കാൻ കഴിയുമെന്ന് മസിൽ ആൻഡ് ഫിറ്റ്‌നസ് മാഗസിൻ റിപ്പോർട്ട് ചെയ്യുന്നു. ശരീരത്തിൽ നിന്ന് അനാവശ്യ കലോറികൾ പുറത്തു പോകുന്നത് അമിതഭാരം കുറയ്ക്കാനും നിങ്ങളുടെ മെറ്റബോളിസത്തെ പുനരുജ്ജീവിപ്പിക്കാനും നിങ്ങളുടെ ശരീരം മുഴുവനും ടോൺ ചെയ്യാനും സഹായിക്കും. ശരീരഭാരം വേഗത്തിൽ കുറയ്ക്കാനും നിങ്ങൾ ആഗ്രഹിക്കുന്ന ശാരീരിക ആകൃതി വേഗത്തിൽ കൈവരിക്കാനും സഹായിക്കുന്ന ഉയർന്ന പവർ കാർഡിയോ ദിനചര്യയാണിത്.
ദിവസവും വെറും 30 മിനിറ്റ് വ്യായാമത്തിനായി മാറ്റി വെക്കാം; ഈ വ്യായാമങ്ങൾ ചെയ്തോളൂ
5. ഐഡിയൽ ക്രോസ്-ട്രെയിനിംഗ് വർക്ക്ഔട്ട്

നിങ്ങൾ ആഴ്ചകളോളം ട്രെഡ്‌മില്ലിൽ അല്ലെങ്കിൽ റണ്ണിങ് വ്യായാമങ്ങൾ മാത്രം ചെയ്തു മടുത്തെങ്കിൽ നിങ്ങളുടെ സാധാരണ കാർഡിയോ ദിനചര്യയിൽ നിന്ന് ഒരു ഇടവേള എടുത്തുകൊണ്ട് ചെയ്യാൻ കഴിയുന്നതാണ് കിക്ക്ബോക്സിംഗ്. അതുകൊണ്ടുതന്നെ ഏറ്റവും മികച്ച ക്രോസ്-ട്രെയിനിംഗ് വർക്ക്ഔട്ടായി ഇത് പരിഗണിക്കാം. ഒരു റിസ്റ്റ് വെയ്റ്റ് അല്ലെങ്കിൽ ഒരു ആംഗിൾ വെയ്റ്റ് ധരിച്ചുകൊണ്ട് അധിക പ്രതിരോധത്തിനായി ഒരു ജോടി ലൈറ്റ്വെയ്റ്റ് ബോക്സിംഗ് ഗ്ലൗസ് ധരിച്ചുകൊണ്ട് നിങ്ങൾക്ക് വേണമെങ്കിൽ ഭാരം ചേർത്തുകൊണ്ടും ഇത് ചെയ്യാം. ആഴ്‌ചയിൽ ഒന്നോ രണ്ടോ തവണ മാത്രം ഇത് ചെയ്താൽ മതിയാവും. ശരീരത്തിൽ വേഗത്തിൽ മാറ്റങ്ങൾ കണ്ടു തുടങ്ങാൻ ഇത് നിങ്ങളെ സഹായിക്കും.

6. എനർജി ബൂസ്റ്റർ

നിങ്ങളുടെ ശരീരത്തിനും മനസ്സിനും ഉത്തേജനം നൽകുന്ന ഒരു ഉയർന്ന ഊർജ്ജമുള്ള കാർഡിയോ ദിനചര്യയാണ് കിക്ക്ബോക്സിംഗ്. വളരെ വേഗത്തിൽ ഇത് നിങ്ങളുടെ ഊർജ്ജ നില വർദ്ധിപ്പിക്കും. ഇത് ചെയ്യുമ്പോൾ നിങ്ങൾ വേഗത്തിലും ആഴത്തിലും ദീർഘമായി ശ്വസിക്കുന്നത് വഴി ശ്വാസസംബന്ധമായ പ്രശ്നങ്ങൾ ഒരു പരിധി വരെ അകറ്റി നിർത്താൻ കഴിയും എന്ന് പറയപ്പെടുന്നു. ശരീരത്തെ പെട്ടെന്ന് വിയർക്കാൻ അനുവദിക്കുന്ന ഒരു വർക്കൗട്ട് കൂടിയാണിത്. ശരീരത്തിലെ വിഷവസ്തുക്കളെ വിയർപ്പിലൂടെ പുറന്തള്ളാൻ ഈ പ്രക്രിയ സഹായിക്കും. നിങ്ങളുടെ ഊർജ്ജ നിലയ്ക്ക് ഇത് എളുപ്പത്തിൽ ആവശ്യമായ ഉത്തേജനം നൽകും.

7. മെച്ചപ്പെട്ട പോസ്ചർ

നിങ്ങൾ ദിവസം മുഴുവനും ഒരു കമ്പ്യൂട്ടറിന് മുന്നിലിരുന്ന് ജോലി ചെയ്യുന്നവരാണെങ്കിൽ ശാരീരിക പോസ്ചർ അത്ര മികച്ചതായിരിക്കില്ല. ഇരുന്നുകൊണ്ട് ജോലി ചെയ്യുന്നത് കൊണ്ട് തന്നെ പ്രത്യേകിച്ചു നിങ്ങളുടെ വയറിൻ്റെ ഇരു ഭാഗത്തും കൊഴുപ്പുകൾ അടിഞ്ഞു കൂടാനുള്ള സാധ്യതയും കൂടും. കിക്ക്ബോക്സിംഗ് വർക്ക്ഔട്ടുകൾ കോർ ഭാഗത്തെ ഫോക്കസ് ചെയ്തുകൊണ്ടുള്ളതാണ്. അതുകൊണ്ടുതന്നെ നിങ്ങളുടെ വയറിലെ ഭാഗത്തിന് ചുറ്റുമുള്ള കോർ പേശികളെ കിക്ക്ബോക്സിംഗ് പ്രത്യേകിച്ചും ലക്ഷ്യമിടുന്നു. കാരണം ഈ വ്യായാമത്തിൽ ഏർപ്പെടുമ്പോൾ നിങ്ങളുടെ അരക്കെട്ടും ആബ്സും സന്തുലിതമായി ഉപയോഗിക്കേണ്ടതുണ്ട്. അതുകൊണ്ടുതന്നെ എളുപ്പത്തിൽ ഇത്തരം കൊഴുപ്പുകൾ നീക്കം ചെയ്തുകൊണ്ട് മെച്ചപ്പെട്ട പോസ്ചർ നേടിയെടുക്കാൻ കഴിയും.

കിക്ക്ബോക്സിംഗ് വർക്കൗട്ടുകൾ നിങ്ങളുടെ ശരീരത്തിനും മനസ്സിനും നിരവധി ആനുകൂല്യങ്ങളെ വാഗ്ദാനം ചെയ്യുന്നവയാണ്. നിങ്ങളുടെ സാധാരണ ദൈനദിന ഫിറ്റ്നസ് രീതികളിൽ നിന്നും മാറി പുതുതായി എന്തെങ്കിലും പരീക്ഷിക്കാൻ ആഗ്രഹിക്കുന്നുണ്ടെങ്കിൽ മികച്ച തിരഞ്ഞെടുപ്പുമാണ് കിക്ക് ബോക്സിംഗ്. നിങ്ങൾ ഒരു ഫിറ്റ്‌നസ് പ്രേമിയോ അല്ലെങ്കിൽ ഒരു വ്യായാമ ദിനചര്യയിൽ തുടക്കക്കാരൻ ആണെങ്കിൽ പോലും നിങ്ങൾ സ്വപ്നം കാണുന്ന ഫിറ്റ്നസ് ലക്ഷ്യത്തിലേക്ക് വേഗത്തിൽ എത്തിച്ചേരാൻ കിക്ക്ബോക്സിംഗ് നിങ്ങളെ സഹായിക്കും.