അസാധാരണവും അവിശ്വസനീയവും; ബന്ധുരകാഞ്ചന കൂട്ടിലാണെങ്കിലും ബന്ധനം ബന്ധനം തന്നെയെന്ന് വനിതാ കമ്മീഷൻ

പാലക്കാട്: നെന്മാറയിൽ സജിത എന്ന യുവതിയെ റഹ്മാൻ പത്ത് വർഷം ഒളിവിൽ പാർപ്പിച്ച സംഭവം അസാധാരണവും അവിശ്വസനീയവുമെന്ന് വനിതാ കമ്മീഷൻ. ഒറ്റമുറിയിൽ രഹസ്യമായി പാർപ്പിച്ച സംഭവത്തിൽ എന്തൊക്കെയോ അവിശ്വസനീയമായ കാര്യങ്ങൾ ഉണ്ടെന്ന് വിശ്വസിക്കുന്നുവെന്ന് സ്ഥലം സന്ദർശിച്ച വനിതാ കമ്മീഷൻ അധ്യക്ഷ എംസി ജോസഫൈൻ പറഞ്ഞു.

തേനും പാലും നൽകി കൂട്ടിലിട്ടാലും അത് ബന്ധനം തന്നെയാണെന്നും, ബന്ധുരകാഞ്ചന കൂട്ടിലാണെങ്കിലും ബന്ധനം ബന്ധനം തന്നെയാണ് പാരിലെന്നും ജോസഫൈൻ മാധ്യമങ്ങളോട് പ്രതികരിച്ചു. ഗൗരവത്തോടെയാണ് ഈ കാര്യം കാണുന്നതെന്നും അവർ പറഞ്ഞു. റഹ്മാനോടും സജിതയോടും സംസാരിച്ചു. പ്രയാസങ്ങളെന്തെങ്കിലും ഉണ്ടെന്ന് അവർ സമ്മതിക്കുന്നില്ല. സന്തുഷ്ടരാണെന്നാണ് പറയുന്നതെന്നും കമ്മീഷൻ ചൂണ്ടിക്കാട്ടി.

Also Read : ‘കർഷകർക്കൊപ്പം’; മരം മുറിക്കേസിൽ നിലപാട് വ്യക്തമാക്കി ജോസ് കെ മാണി

സമൂഹത്തിൽ തെറ്റായ മാതൃകകൾ ഉണ്ടാകാൻ പാടില്ലെന്നാണ് വനിതാ കമ്മീഷൻ കരുതുന്നതെന്ന് പറഞ്ഞ ജോസഫൈൻ പത്ത് വർഷക്കാലം ഒരു സ്ത്രീയെ ബന്ധനത്തിൽ ആക്കുകയാണ് ഇവിടെ ചെയ്തതെന്നും പറയുന്നു. കുടുസുമുറിയിൽ 10 കൊല്ലം സുരക്ഷിതമായി ഇരുന്നു എന്നത് അംഗീകരിക്കാനാകില്ല. പ്രശ്‌നങ്ങളുണ്ടായിട്ടുണ്ടെന്ന് സജിതയും റഹ്മാനും സമ്മതിക്കുന്നില്ല. ഈ പശ്ചാത്തലത്തില്‍ അവര്‍ ഇനിയും മുന്നോട്ട് സുഖമായി ജീവിക്കട്ടേയെന്നും വനിതാ കമ്മീഷന്‍ പ്രതികരിച്ചു.

Also Read : നവാൽനി പുറംലോകം കാണുമോ, മരണം ജയിലിൽ വെച്ചോ? കൊല്ലുന്നത് ഞങ്ങളുടെ രീതിയല്ലെന്ന് പുടിൻ

പത്ത് കൊല്ലം മുമ്പ് സജിതയെ കാണാനില്ലെന്ന് കാട്ടി നൽകിയ പരാതിയിൽ പോലീസ് വേണ്ടത്ര ഇടപെട്ടില്ലെന്നും കമ്മീഷൻ വിമർശിച്ചു. പോലീസ് ഇക്കാര്യത്തിൽ കുറച്ചുകൂടി ജാഗ്രത കാണിക്കേണ്ടിയിരുന്നെന്നും അവർ പറഞ്ഞു. സജിതയും റഹ്മാനും താമസിച്ചിരുന്ന വീടും കമ്മീഷൻ അംഗങ്ങൾ സന്ദർശിച്ചു.