സികെ ജാനുവിന് കോഴ നൽകിയെന്ന ആരോപണം; കെ സുരേന്ദ്രനെതിരെ കേസെടുക്കാൻ കോടതി ഉത്തരവ്

കൽപ്പറ്റ: നിയമസഭാ തെരഞ്ഞെടുപ്പ് വേളയിൽ സികെ ജാനുവിന് കോഴ നൽകിയെന്ന് പരാതിയിൽ ബിജെപി സംസ്ഥാന അധ്യക്ഷൻ കെ സുരേന്ദ്രനെതിരെ കേസെടുക്കാൻ കോടതി ഉത്തരവ്. എംഎസ്എഫ് നേതാവിന്‍റെ പരാതിയിൽ കൽപ്പറ്റ കോടതിയുടേതാണ് ഉത്തരവ്. സുൽത്താൻ ബത്തേരി എസ്എച്ച്ഒയ്ക്കാണ് കോടതി നിർദേശം നൽകിയത്.

എംഎസ്എഫ് സംസ്ഥാന പ്രസിഡണ്ട് പികെ നവാസ് നൽകിയ ഹർജിയിലാണ് കോടതി ഉത്തരവ്. സുൽത്താൻ ബത്തേരി മണ്ഡലത്തിൽ എൻഡിഎ സ്ഥാനാർത്ഥിയായി താമര ചിഹ്നത്തിൽ മത്സരിക്കാൻ കെ സുരേന്ദ്രൻ സികെ ജാനുവിന് പണം നൽകിയെന്നാണ് പരാതി. രണ്ട് ഘട്ടമായി അമ്പത് ലക്ഷം നൽകിയെന്നതിൽ അന്വേഷണം വേണമെന്നായിരുന്നു ഹർജിക്കാരൻ ആവശ്യപ്പെട്ടത്.

Also Read: കുഴൽപ്പണക്കേസ്: നോട്ടീസ് അയച്ചാൽ ഇനി ചോദ്യം ചെയ്യലിന് ഹാജരാകില്ല; നിലപാട് കുടുപ്പിച്ച് ബിജെപി

തെരഞ്ഞെടുപ്പ് കാലത്ത് കെ സുരേന്ദ്രൻ സികെ ജാനുവിന് പണം നൽകിയെന്ന് ജനാധിപത്യ രാഷ്ട്രീയ സഭാ നേതാവായ പ്രസീത അഴീക്കോടാണ് ആരോപിച്ചത്. സുരേന്ദ്രനുമായുള്ള ടെലഫോൺ സംഭാഷണങ്ങളുടെ ശബ്ദരേഖകളും വാട്സാപ്പ് സന്ദേശങ്ങളും ഇവർ പുറത്ത് വിട്ടിരുന്നു. സികെ ജാനുവിന് 10 ലക്ഷം രൂപ നൽകിയെന്ന് ആരോപിക്കുന്ന പ്രസീത അഴീക്കോട് ഇതുമായി ബന്ധപ്പെട്ട് ഇരുവരും തമ്മിൽ നടത്തിയ ഫോൺ സംഭാഷണങ്ങളാണ് പുറത്തു വിട്ടത്. ഹൊറോസൺ ഹോട്ടലിലെ 503-ാം മുറിയിൽ വെച്ച് പണം കൈമാറാമെന്നു പറയുന്നതു ശബ്ദരേഖകളിലുണ്ട്. കൂടാതെ സികെ ജാനുവുമായി നേരിൽ കാണുന്നതു സംബന്ധിച്ച സംഭാഷണങ്ങളുമുണ്ട്. പാർട്ടിയിൽ സുരേന്ദ്രൻ്റെ എതിർചേരിയിലുള്ള പികെ കൃഷ്ണദാസ് ഇക്കാര്യങ്ങൾ അറിയരുതെന്ന് കെ സുരേന്ദ്രൻ പറയുന്നതായുള്ള ശബ്ദരേഖയും പ്രസീത അഴീക്കോട് ഏഷ്യാനെറ്റ് ന്യൂസ് വഴി പുറത്തു വിട്ടിരുന്നു.

എന്നാൽ ആരോപണങ്ങൾ നിഷേധിച്ച കെ സുരേന്ദ്രൻ ശബ്ദരേഖകൾ കെട്ടിച്ചമച്ചതാണെന്ന നിലപാടാണ് സ്വീകരിച്ചത്. പ്രസീത അഴീക്കോടുമായി സംസാരിച്ചിട്ടുണ്ടെന്നും കെ സുരേന്ദ്രൻ സമ്മതിച്ചിരുന്നു. അതേസമയം, ശബ്ദരേഖകൾ പുറത്തു വിടുന്നത് വ്യക്തിവിരോധം തീർക്കാനാണെന്നും ഇക്കാര്യത്തിൽ നിയമനടപടി സ്വീകരിക്കുമെന്നും കെ സുരേന്ദ്രൻ മുൻപ് ഫേസ്ബുക്ക് പോസ്റ്റിൽ വ്യക്തമാക്കിയിരുന്നു.