സിബിഎസ്ഇ: 12-ാം ക്ലാസ് ഫലത്തിന് 10, 11 ക്ലാസുകളിലെ മാ‍ര്‍ക്ക് പരിഗണിക്കും; യൂണിറ്റ്, ടേം പരീക്ഷകള്‍ നിര്‍ണായകം

ന്യൂഡൽഹി: സിബിഎസ്ഇ പന്ത്രണ്ടാം ക്ലാസ് മൂല്യനിര്‍ണയത്തിനുള്ള മാനദണ്ഡം നിശ്ചയിച്ചു. പത്താം ക്ലാസിലെയും പതിനൊന്ന്, പന്ത്രണ്ട് ക്ലാസുകളിലെയും കുട്ടികളുടെ പ്രകടനം കണക്കിലെടുത്തായിരിക്കും പന്ത്രണ്ടാം ക്ലാസിൽ മാ‍ര്‍ക്ക് അനുവദിക്കുക. ഇക്കാര്യം അറ്റോര്‍ണി ജനറൽ സുപ്രീം കോടതിയെ അറിയിച്ചു. ജൂലൈ 31നുള്ളിൽ ഫലം പ്രഖ്യാപിക്കാനാണ് നീക്കം.

പത്ത്, പതിനൊന്ന് ക്ലാസുകളിലെ മാര്‍ക്കുകള്‍ക്ക് 30 ശതമാനം വീതമായിരിക്കും വെയിറ്റേജ് നല്‍കുക. പന്ത്രണ്ടാം ക്ലാസിലെ മുൻ പരീക്ഷകളുടെ മാര്‍ക്കിന് 40 ശതമാനം വെയിറ്റേജ് ഉണ്ടാകും. കുട്ടികള്‍ക്ക് 10, 11 ക്ലാസുകളിൽ ഏറ്റവുമധികം മാര്‍ക്ക് ലഭിച്ച മൂന്ന് വിഷയങ്ങളിലെ പ്രകടനമാണ് പന്ത്രണ്ടാം ക്ലാസ് മൂല്യനിര്‍ണയത്തിന് പരിഗണിക്കുക. ഇതോടൊപ്പം 12-ാം ക്ലാസിലെ യൂണിറ്റ് പരീക്ഷകള്‍, ടേം പരീക്ഷകള്‍, പ്രാക്ടിക്കൽ എന്നിവയുടെ മാര്‍ക്കും പരിഗണിക്കും. ഈ നീക്കത്തെ സിബിഎസ്ഇ മാനേജുമെൻ്റഉകളും സ്വാഗതം ചെയ്തിടടുണ്ട്.

Also Read: പ്രതിപക്ഷ നേതൃസ്ഥാനം മാറേണ്ടെന്ന് ആദ്യം പറഞ്ഞത് ഉമ്മൻ ചാണ്ടി; നേരം വെളുത്തപ്പോൾ ചിലർ തള്ളിപ്പറഞ്ഞെന്ന് ചെന്നിത്തല

കൊവിഡ് സാഹചര്യത്തിൽ സിബിഎസ്ഇ പരീക്ഷാ നടത്തിപ്പ് സംബന്ധിച്ച ഒരു ഹര്‍ജി പരിഗണിക്കുമ്പോഴായിരുന്നു മൂല്യനിര്‍ണയത്തിന് പുതിയ മാനദണ്ഡം കണ്ടെത്തി സമര്‍പ്പിക്കാൻ സുപ്രീം കോടതി സിബിഎസ്ഇയോട് ആവശ്യപ്പെട്ടത്. ഇതിനായി 12 അംഗ സമിതിയെയും നിയോഗിച്ചിരുന്നു. സമിതിയുടെ കണ്ടെത്തലിൻ്റെ അടിസ്ഥാനത്തിലാണ് പുതിയ മാനദണ്ഡം കേന്ദ്രസര്‍ക്കാര്‍ സുപ്രീം കോടതിയെ അറിയിച്ചത്.

Also Read: ‘പൊറുതി മുട്ടിയാൽ ഏത് മിത്രവും പ്രതിഷേധിച്ചു പോകും’; ഡിവൈഎഫ്ഐയുടെ പ്ലക്കാർഡുമായി ബിജെപി പ്രതിഷേധത്തിൽ ഇടത് നേതാക്കൾ

പ്രധാനമന്ത്രിയുടെ അധ്യക്ഷതയിൽ ചേര്‍ന്ന ഉന്നതതല സമതിയാണ് കൊവിഡ് സാഹചര്യത്തിൽ പരീക്ഷകള്‍ റദ്ദാക്കിയത്. അതേസമയം, അവശേഷിക്കുന്ന പ്രാക്ടിക്കൽ പരീക്ഷകള്‍ ഓൺലൈനിലൂടെ പൂര്‍ത്തിയാക്കാൻ സിബിഎസ്ഇ സ്കൂളുകള്‍ക്ക് നിര്‍ദേശം നല്‍കിയിട്ടുണ്ട്. പരീക്ഷകളുടെ മാര്‍ക്കുകള്‍ ഉള്‍പ്പെടെയുള്ള വിശദാംശങ്ങള്‍ ജൂൺ 28നുള്ളിൽ സമര്‍പ്പിക്കണം.