പിറന്നാൾ ആഘോഷം ബഹളമായി, ചോദ്യം ചെയ്ത വിദ്യാര്‍ത്ഥിയെ കല്ലെറിഞ്ഞ് കൊന്നു

ചെന്നൈ: പിറന്നാൾ ആഘോഷത്തെ തുടര്‍ന്ന് ബഹളമുണ്ടാക്കിയത് ചോദ്യം ചെയ്ത എഞ്ജിനിയറിങ്ങ് വിദ്യാര്‍ത്ഥിയെ കല്ലെറിഞ്ഞ് കൊന്നു. തമിഴ്നാട് ചെന്നൈ റോയപേട്ടിലാണ് ഇത്തരത്തിൽ ഒരു സംഭവമുണ്ടായിരിക്കുന്നത്. ബാദ്രിഷ് എന്ന 20 കാരനാണ് കൊല്ലപ്പെട്ടത്.

സംഭവത്തെക്കുറിച്ച് പോലീസ് പറയുന്നത് ഇങ്ങനെ, വ്യാഴാഴ്ച ചെന്നൈ ആരംബക്കത്തുള്ള ഒരു നക്ഷത്ര ഹോട്ടലിൽ ബദ്രിഷും വിഘ്നേഷ്, ദിനേശ് എന്നീ സുഹൃത്തുക്കള്‍ക്കൊപ്പം മുറിയെടുത്തിരുന്നു. മദ്യപിക്കുന്നതിന് വേണ്ടിയാണ് ഇത്തരത്തിൽ മുറിയെടുത്തത്.

പിന്നീട്, അടുത്ത മുറിയിൽ ഒരു പിറന്നാള്‍ ആഘോഷത്തിനായി മോസസ് എന്നയാളുടെ നേതൃത്ത്വത്തിൽ മറ്റൊരു സംഘവും മുറിയെടുത്തിരുന്നു. ഇയാളുടെ സുഹൃത്തായ ഇസാക്കിന്റെ പിറന്നാള്‍ ആഘോഷിക്കുന്നതിന് വേണ്ടിയാണ് ഇവര്‍ മുറിയെടുത്തത്. ആറ് പേരാണ് സംഭവസമയത്ത് മുറിയിലുണ്ടായിരുന്നത്.

ഇവര്‍ വൈകാതെ ശബ്ദത്തിൽ പാട്ട് വയ്ക്കുകയും നൃത്തം വയ്ക്കാനും തുടങ്ങി. ഇത് ശല്യമായതോടെ തൊട്ടടുത്ത മുറിയിലുണ്ടായിരുന്ന ബദ്രിഷും സുഹൃത്തുക്കളും പുറത്തുവന്ന് ശബ്ദമുണ്ടാക്കരുതെന്ന് അഭ്യർത്ഥിച്ചു. എന്നാൽ, മോസസും സുഹൃത്തുക്കളും പ്രകോപിതരായി തര്‍ക്കത്തിൽ ഏര്‍പ്പെടുകയുമായിരുന്നുവെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു.

ഇരു സംഘങ്ങളും തമ്മിലുള്ള തര്‍ക്കം വൈകാതെ സംഘര്‍ഷത്തിലേക്ക് മാറുകയും ചെയ്തു. തുടര്‍ന്ന് ഹോട്ടലിൽ നിന്നും പുറത്തുപോകുവാൻ ജീവനക്കാര്‍ നിര്‍ദ്ദേശിക്കുകയും ചെയ്തു. ഇതോടെ ഇരു സംഘങ്ങളും തമ്മിലുള്ള തര്‍‍ക്കം വഴിയിൽ നിന്നായി.

ഇതിനിടെ മോസസ് തന്റെ സുഹൃത്തുക്കളുമായി ചേര്‍ന്ന് ബൈക്കുകളിലായി വന്ന് കല്ലുകള്‍ ഉപയോഗിച്ച് ബന്ദ്രിഷിനെയും സുഹൃത്തുക്കളേയും ആക്രമിച്ചു. ഇതിൽ ദിനേഷ് വിദഗ്ദ്ധമായി രക്ഷപെട്ടെങ്കിലും ബന്ദ്രിഷിനും വിഘ്നേഷിനും കല്ലേറിൽ പരിക്കേറ്റു. ബന്ദ്രിഷിന് ശരീരത്തിന്റെ വിവിധ ഭാഗങ്ങളില്‍ കല്ലേറ് കൊണ്ട് സാരമായി പരിക്കേറ്റു വിഘ്നേഷിന് ഇടുപ്പിന് ഒടിവുണ്ടായിട്ടുണ്ട് എന്നും പോലീസിനെ ഉദ്ധരിച്ച് റിപ്പോര്‍ട്ട് ചെയ്യുന്നു.

പോലീസ് ഉടൻ തന്നെ സ്ഥലത്ത് എത്തി ബദ്രിഷിനെ ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചു. കേസുമായി ബന്ധപ്പെട്ട് അജിത് കുമാർ (20) വിഘ്‌നേഷ് (21), വെങ്കിടേശൻ (25), ബാലാജി എന്നിവരെ പോലീസ് അറസ്റ്റ് ചെയ്തു. കൂടുതൽ പ്രതികളെ പിടികൂടാനുള്ള ശ്രമം തുടരുകയാണെന്ന് പോലീസ് വ്യക്തമാക്കി.