’60 പവൻ നൽകി, 25 ലക്ഷം നൽകാനായില്ല’: 23കാരി ഭര്‍തൃവീട്ടില്‍ തൂങ്ങിമരിച്ചു, സംഭവം തമിഴ്നാട്ടിലെ തിരുവള്ളൂരിൽ

തിരുവള്ളൂർ: തമിഴ്നാട്ടിൽ സ്ത്രീധന പീഡനത്തെ തുടർന്ന് യുവതി ഭർതൃവീട്ടിൽ തൂങ്ങിമരിച്ചു. തിരുവള്ളൂർ സ്വദേശി ജ്യോതിശ്രീയാണ് ബന്ധുക്കൾക്ക് വീഡിയോ സന്ദേശമയച്ച ശേഷം ജീവനൊടുക്കിയത്. സ്ത്രീധനമായി പറഞ്ഞുറപ്പിച്ച തുക ലഭ്യമായില്ലെന്ന് ആരോപിച്ച് ഭർത്താവും ബന്ധുക്കളും ചേർന്ന് പീഡിപ്പിക്കുകയാണെന്ന് സന്ദേശത്തിലൂടെ 23കാരിയായ യുവതി പറഞ്ഞിരുന്നതായി ബന്ധുക്കൾ വ്യക്തമാക്കി.

കോട്ടയത്ത് മകളെ ഷാൾ ഉപയോഗിച്ച് കഴുത്ത് ഞെരിച്ച് കൊന്നു; കിണറ്റിൽ ചാടിയ അമ്മയെ രക്ഷപെടുത്തി
സംഭവത്തിൽ കേസെടുത്ത പോലീസ് യുവതിയുടെ ഭർത്താവ് ബാലമുരുകൻ ഉൾപ്പെടെയുള്ള മൂന്ന് പേരെ അറസ്റ്റ് ചെയ്തു. ഭർത്താവും അദ്ദേഹത്തിൻ്റെ സഹോദരനും മാതാവും ചേർന്നാണ് ഉപദ്രവിച്ചിരുന്നതെന്ന് വീഡിയോ സന്ദേശത്തിൽ പെൺകുട്ടി വ്യക്തമാക്കിയിരുന്നു. ബാലമുരുകന്‍ , ഭര്‍തൃമാതാവ് ഹംസ അഴിയോര്‍, സഹോദരന്‍ വേല്‍ എന്നിവരാണ് അറസ്റ്റിലായത്.

ഭർത്താവും അദ്ദേഹത്തിൻ്റെ മാതാവുമാണ് തൻ്റെ മരണത്തിന് കാരണക്കാർ. ഇവർക്ക് അർഹമായ ശിക്ഷ നൽകണം. കരഞ്ഞ് കരഞ്ഞ് കണ്ണുനീർ വറ്റിയെന്നും ജീവനൊടുക്കും മുൻപ് ബന്ധുക്കൾക്ക് അയച്ച സന്ദേശത്തിൽ യുവതി പറയുന്നുണ്ട്. ആത്മഹത്യാക്കുറിപ്പും ജ്യോതിശ്രീയുടെ ഫോണിലെ വീഡിയോയും ഭര്‍ത്താവ് നശിപ്പിച്ചിരുന്നുവെങ്കിലും സഹോദരിക്ക് ഈ സന്ദേശങ്ങൾ യുവതി അയച്ച് നൽകിയത് തെളിവായി.

കഴിഞ്ഞ ഡിസംബർ 25നായിരുന്നു തിരുമുള്ളെവയൽ സ്വദേശി ബാലമുരുകനുമായുള്ള യുവതിയുടെ വിവാഹം. 60 പവൻ സ്വർണവും 25 ലക്ഷം രൂപയുമാണ് സ്ത്രീധനമായി പറഞ്ഞുറപ്പിച്ചത്. ആവശ്യപ്പെട്ട സ്വർണം മുഴുവൻ നൽകിയെങ്കിലും 25 ലക്ഷം രൂപ നൽകാൻ യുവതിയുടെ കുടുംബത്തിനായില്ല. വിവാഹം നടന്നെങ്കിലും സ്ത്രീധനത്തെ ചൊല്ലിയുള്ള ഉപദ്രവം തുടർന്നു. ഭർത്താവിൻ്റെയും വീട്ടുകാരുടെയും ഉപദ്രവം സഹിക്കാൻ കഴിയാതെ വന്നതോടെ യുവതി സ്വന്തം വീട്ടിലേക്ക് മടങ്ങിപ്പോയി.

വള്ളിക്കുന്നത്തെ സുചിത്രയുടെ ആത്മഹത്യ; അന്വേഷണ ചുമതല ചെങ്ങന്നൂർ ഡിവൈഎസ്പിക്ക്
പ്രശ്നങ്ങൾ ഉണ്ടാകില്ലെന്ന് വ്യക്തമാക്കി രണ്ട് മാസം മുൻപ് ബാലമുരുകൻ യുവതിയുടെ വീട്ടിലെത്തി പെൺകുട്ടിയെ മടക്കി കൊണ്ടു പോയി. ഭർതൃവീട്ടിൽ മടങ്ങിയെത്തിയതിന് പിന്നാലെ പീഡനം ആരംഭിച്ചു. മാതാപിതാക്കളെ വിവരം അറിയിച്ചെങ്കിലും അവിടെ തന്നെ പിടിച്ച് നിൽക്കാനാണ് നൽകിയ നിർദേശം. ഇതോടെയാണ് ബന്ധുക്കൾക്ക് വീഡിയോ സന്ദേശം അയച്ച ശേഷം ജീവനൊടുക്കാൻ ജ്യോതിശ്രീ തീരുമാനിച്ചത്. കിടപ്പുമുറിയിൽ തൂങ്ങിമരിച്ച നിലയിലാണ് യുവതിയുടെ മൃതദേഹം കണ്ടെത്തിയത്.