Sumayya P | Lipi | Updated: 01 Jun 2021, 01:19:00 PM
വിസ മാറ്റത്തിന് ഒമാനില്‍ നിന്ന് പുറത്തുപോയി തിരികെ വരണമെന്നാണ് നിലവിലെ നിബന്ധന.
ഹൈലൈറ്റ്:
- നിലവില്‍ ഒമാന്‍വല്‍ക്കരണം നടപ്പിലാക്കാത്ത തസ്തികകളിലേക്കാണ് വിസ മാറ്റം അനുവദിക്കുകയെന്നാണ് കരുതപ്പെടുന്നത്
- ഫാമിലി വിസയിലുള്ളവര്‍ക്കും സ്റ്റുഡന്റ് വിസക്കാര്‍ക്കും തൊഴില്‍ പെര്‍മിറ്റിലേക്ക് മാറ്റാം
മസ്‌കത്ത്: സന്ദര്‍ശക വിസയില്‍ ഓമനിലെത്തുന്ന പ്രവാസികള്‍ക്ക് ഒമാനില്‍ നിന്ന് പുറത്തു കടക്കാതെ തന്നെ തൊഴില്‍ വിസയിലേക്ക് മാറാമെന്ന് റോയല്‍ ഒമാന്‍ പോലീസ്. അതോടൊപ്പം ഫാമിലി വിസയിലുള്ളവര്‍ക്കും സ്റ്റുഡന്റ് വിസക്കാര്‍ക്കും തൊഴില്‍ പെര്‍മിറ്റിലേക്ക് മാറാമെന്നും അധികൃതര്‍ അറിയിച്ചു. പോലിസ് ആന്റ് കസ്റ്റംസ് ഇന്‍സ്‌പെക്ടര്‍ ജനറല്‍ പുറത്തിറക്കിയ ഫോറിനേഴ്‌സ് റെസിഡന്‍സ് ലോ ഭേദഗതി പ്രകാരമാണ് ഈ അനുമതി. വിസ മാറ്റത്തിന് ഒമാനില്‍ നിന്ന് പുറത്തുപോയി തിരികെ വരണമെന്നാണ് നിലവിലെ നിബന്ധന. കൊവിഡ് പ്രതിസന്ധിയെ തുടര്‍ന്നുള്ള യാത്രാനിയന്ത്രണങ്ങളുടെ പശ്ചാത്തലത്തിലാണ് പുതിയ തീരുമാനമെന്നാണ് വിലയിരുത്തപ്പെടുന്നത്.
പുതിയ നിയമ ഭേദഗതി പ്രകാരം സുഹൃത്തുക്കളെയും ബന്ധുക്കളെയും കാണുന്നതിനായി അനുവദിച്ച വിസിറ്റ് വിസ, 10 ദിവസത്തേക്കോ ഒരു മാസത്തേക്കോ ഉള്ള സിങ്കിള്‍ എന്‍ട്രി ടൂറിസ്റ്റ് വിസ, ബിസിനസ് വിസ, എക്‌സ്പ്രസ്സ് വിസ, നിക്ഷേപക വിസ, സ്റ്റുഡന്റ് വിസ, ക്രൂയിസ് കപ്പലുകളിലെ നാവികര്‍ക്കും യാത്രക്കാര്‍ക്കും അനുവദിക്കുന്ന വിസകള്‍, റെസിഡെന്‍ഷ്യല്‍ യൂനിറ്റ് ഉടമകള്‍ക്കും അവരുടെ കുടുംബങ്ങള്‍ക്കും അനുവദിക്കുന്ന വിസകള്‍ തുടങ്ങിയവയില്‍ ഉള്ളവര്‍ക്ക് രാജ്യം വിടാതെ തന്നെ വര്‍ക്ക് പെര്‍മിറ്റിലേക്ക് മാറാമെന്ന് ലഫ്റ്റനന്റ് ജനറല്‍ ഹസന്‍ ബിന്‍ മുഹ്‌സിന്‍ അല്‍ ശറൈഖി അറിയിച്ചു.
Also Read: 
അതേസമയം, മെയ് ആദ്യ വാരം മുതല്‍ സന്ദര്‍ശക വിസകള്‍ ഉള്‍പ്പെടെയുള്ള വിസകള്‍ ഇഷ്യൂ ചെയ്യുന്നത് നിര്‍ത്തി വച്ചിരിക്കുകയാണ് ഒമാന്‍. ഇവ നല്‍കുന്നത് എത്രയും വേഗം പുനരാരംഭിക്കുമെന്നാണ് വിലയിരുത്തപ്പെടുന്നത്. നിലവില്‍ ഒമാന്‍വല്‍ക്കരണം നടപ്പിലാക്കാത്ത തസ്തികകളിലേക്കാണ് വിസ മാറ്റം അനുവദിക്കുകയെന്നാണ് കരുതപ്പെടുന്നത്. സ്വദേശിവല്‍ക്കരണം നടപ്പിലാക്കിയ തസ്തികകളില്‍ വര്‍ക്ക് പെര്‍മിറ്റ് നല്‍കാന്‍ ഒമാന്‍ തൊഴില്‍ മന്ത്രാലയം വിസമ്മതിക്കുന്നതായി നേരത്തേ റിപ്പോര്‍ട്ടുകളുണ്ടായിരുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : tourists can now convert visit visas to work permits in oman
Malayalam News from malayalam.samayam.com, TIL Network