സ്വിമ്മിംഗ് പൂള്‍, കുളങ്ങള്‍ പോലുള്ള ജലസ്രോതസ്സുകളിലേക്ക് മലിനകരമായ വെള്ളം ഒഴുകിയെത്തന്നത് വിവിധ തരത്തിലുള്ള രോഗങ്ങള്‍ക്കും അണുബാധകള്‍ക്കും മറ്റ് ആരോഗ്യപ്രശ്‌നങ്ങളിലേക്കും നയിക്കുന്നു. മണ്‍സൂണ്‍ കാലത്ത് പല ജലാശയങ്ങളിലെയും വെള്ളത്തിന്റെ ഗുണനിലവാരം വളരെയധികം താഴ്ന്ന നിലയിലായിരിക്കും. അതിനാല്‍ മണ്‍സൂണ്‍ സമയങ്ങളില്‍ നീന്തുകയെന്നത് അത്ര സുരക്ഷിതമായ ഒരു കാര്യമല്ല. വ്യായാമത്തിനും മാനസിക ഉന്മേഷത്തിനും പറ്റിയ ഒന്നാണ് നീന്തല്‍. ഏറ്റവും പ്രശസ്തമായ ഫിറ്റ്‌നസ് വ്യായാമങ്ങളില്‍ ഒന്നായ നീന്തല്‍, കഠിന വ്യായാമങ്ങള്‍ ചെയ്യാന്‍ ബുദ്ധിമുട്ടുള്ള ആളുകള്‍ക്ക് പറ്റിയ ഒന്നാണ്.
നീന്തല്‍ ഒരു സമ്പൂര്‍ണ്ണ ബോഡി വര്‍ക്ക്ഔട്ടാണ്, അതിനാല്‍ ഇത് ഹൃദയാരോഗ്യത്തിന് നല്ലതാണെന്ന് വിദഗ്ദ്ധര്‍ പറയുന്നു. നീന്തലിന്റെ ഫലപ്രാപ്തി സൈക്ലിംഗിനും ജോഗിംഗിനും സമാനമാണ്, പക്ഷേ ഇത് എല്ലുകളിലും സന്ധികളിലും സ്വാധീനമുണ്ടാക്കുന്നില്ല. ഇത് പേശികളെ ടോണ്‍ ചെയ്യുകയും ശക്തി വര്‍ദ്ധിപ്പിക്കുകയും ചെയ്യുന്നു. എങ്കിലും മഴക്കാലത്ത് നീന്തുന്നത് എത്രത്തോളം സുരക്ഷിതമാണ്, അണുബാധയ്ക്കുള്ള സാധ്യതകള്‍ എന്തൊക്കെയാണ്, അവ എങ്ങനെ ഒഴിവാക്കാം? എന്ന കാര്യങ്ങള്‍ ഒക്കെ അറിയാം (Swimming tips for monsoon season).
പൊതു നീന്തല്‍ക്കുളങ്ങളില്‍ അണുബാധ സാധ്യത കൂടുതലാണ്
മണ്‍സൂണ്‍ കാലത്തെ നീന്തല്‍ തീര്‍ച്ചയായും പ്രശ്നമുണ്ടാക്കുന്നുണ്ടെങ്കിലും, സ്വിമ്മിംഗ് പൂള്‍/പൊതു കുളങ്ങളില്‍ നീന്തുന്നത് ആരോഗ്യത്തിന്റെ കാര്യത്തില്‍ ഗൗരവരപമായ പ്രശ്നങ്ങള്‍ സൃഷ്ടിച്ചേക്കാം. ഒരാള്‍ക്ക് പൊതു നീന്തല്‍ക്കുളത്തില്‍ നിന്ന് വയറിളക്കം പോലുള്ള അണുബാധകള്‍ പിടിപെടാന്‍ സാധ്യതയുണ്ട്. ഇത്തരം കുളങ്ങളില്‍ നിന്ന് ആളുകള്‍ക്ക് ലഭിക്കുന്ന ഏറ്റവും സാധാരണമായ അണുബാധകളില്‍ ഒന്നാണിത്.
മറ്റുള്ളവരില്‍ നിന്നുള്ള അണുബാധയ്ക്ക് പുറമേ, നീന്തല്‍ക്കുളത്തിന്റെ ചുറ്റുപാടുകളും അപകടസാധ്യത സൃഷ്ടിക്കും. സമീപത്ത് അനാരോഗ്യകരമായ ജലാശയങ്ങളുണ്ടെങ്കില്‍, അത് കുളത്തിലെ ജലത്തിന്റെ ഗുണനിലവാരം കുറയ്ക്കാനും, നിരവധി രോഗങ്ങള്‍ക്ക് കാരണമാകുന്ന രോഗാണുക്കളുടെ ഒരു കേന്ദ്രമാകാനും സാധ്യതയുണ്ട്.
കുളത്തില്‍ നിന്ന് എങ്ങനെയാണ് അണുബാധകള്‍ ഉണ്ടാകുന്നത്?
”ശരാശരി, ആളുകളുടെ ശരീരത്തില്‍ ഏത് സമയത്തും ഏകദേശം 0.14 ഗ്രാം വിസര്‍ജ്യമുണ്ട്. വയറിളക്കം ബാധിച്ച ഒരാള്‍ കുളത്തിലേക്ക് പോകുമ്പോള്‍, രോഗബാധയുള്ള മലം കുളത്തില്‍ കലരുന്നു. ഈ രോഗം ബാധയുള്ള മലം ഉള്ളില്‍ എത്തുന്ന ആര്‍ക്കും തന്നെ രോഗബാധയുണ്ടാകാം.” എന്ന് ഫരീദാബാദിലെ ഫോര്‍ട്ടിസ് എസ്‌കോര്‍ട്ട്‌സ് ഹോസ്പിറ്റലിലെ പള്‍മനോളജി ഡയറക്ടറും യൂണിറ്റ് ഹെഡുമായ ഡോ. രവിശേഖര്‍ ഝാ പറയുന്നു.
ഇതുകൂടാതെ ക്രിപ്റ്റോസ്പോറിഡിയം, ലെജിയോണല്ല, സ്യൂഡോമോണസ്, നൊറോവിരിസ്, ഷിഗെല്ല, ഇ.കോളി, ജിയാര്‍ഡിയ തുടങ്ങിയ നിരവധി രോഗാണുക്കള്‍ക്കും ഒരാള്‍ക്ക് ബാധിക്കാം.
സ്വിമ്മേഴ്‌സ് ഇയേഴ്‌സ്
മണ്‍സൂണ്‍ സമയത്ത നീന്തല്‍, സ്വിമ്മേഴ്‌സ് ഇയേഴ്‌സ് എന്നറിയപ്പെടുന്ന ഒട്ടൈസ് എക്‌സറ്റേണാ (Otitis externa) എന്ന ചെവിയുടെ അണുബാധയ്ക്കും കാരണമായേക്കാം. ചെവിയുടെ പുറം കനാലില്‍ കൂടുതല്‍ നേരം വെള്ളം തങ്ങിനില്‍ക്കുമ്പോള്‍ ഉണ്ടാകുന്ന ഒരു സാധാരണ ചെവി അണുബാധയാണിത്. ഈര്‍പ്പവും വെള്ളവും അടിഞ്ഞുകൂടുന്നത് ബാക്ടീരിയയുടെ പ്രജനനത്തിന് ഇടയാക്കുന്നു. ചെവിയില്‍ വെള്ളം കയറുകയും ശരിയായി അത് തുടയ്ക്കാതിരിക്കുകയും ചെയ്യുന്നവര്‍ക്ക് ഈ അണുബാധ സംഭിവക്കാന്‍ സാധ്യതയുണ്ട്. ഇത് കൂടുതലും കുട്ടികളിലും ചെവി മൂടാതെ പതിവായി നീന്തുന്നവരിലുമാണ് കാണപ്പെടുന്നത്.
എന്താണ് ചെയ്യേണ്ടത്?
- സുരക്ഷിത നീന്തലിനായി, നിങ്ങള്‍ ആദ്യം ആരോഗ്യവാനാണെന്ന് ഉറപ്പാക്കുകയും തുടര്‍ന്ന് ഇനിപ്പറയുന്ന കാര്യങ്ങള്‍ പിന്തുടരുകയും ചെയ്യുക:
- ജലത്തിന്റെ ക്ലോറിന്‍ അളവ് പരിശോധിക്കുക
- മുറിവോ വ്രണങ്ങളോ ഉണ്ടെങ്കില്‍ വെള്ളത്തില്‍ ഇറങ്ങരുത്; പ്രത്യേകിച്ച് അത് പൂര്‍ണമായും സുഖപ്പെട്ടിട്ടില്ലെങ്കില്‍
- നിങ്ങള്‍ക്ക് പനിയോ തുമ്മലോ കൂടാതെ/ അല്ലെങ്കില്‍ ചുമയോ ഉണ്ടെങ്കില്‍ നീന്താന്‍ ഇറങ്ങരുത്.
- സ്വിമ്മിംഗ് പൂള്‍, പൊതു കുളം പോലെയുള്ള ഇടങ്ങളില്‍ ഇറങ്ങുന്നതിന് മുമ്പ് കുളിക്കുക, അത് ചെയ്യാന്‍ മറ്റുള്ളവരെ പ്രോത്സാഹിപ്പിക്കുക.
- നിങ്ങള്‍ക്ക് വയറിളക്കമുണ്ടെങ്കില്‍ നീന്താനിറങ്ങരുത്
- നീന്തുമ്പോള്‍ വെള്ളം കുടിക്കരുത്
- കുളത്തില്‍ പ്രവേശിക്കുമ്പോള്‍ നല്ല നീന്തല്‍ വസ്ത്രങ്ങള്‍ ഉപയോഗിക്കുക
- നീന്തലിനുശേഷം, ചെവി ശരിയായി ഉണക്കുക.
മഴക്കാലത്തേ നീന്തലില്‍ ശ്രദ്ധിക്കേണ്ട കാര്യങ്ങള്‍
മഴക്കാലത്ത് ജലാശയങ്ങളില്‍ ഹാനികരമായ രോഗാണുക്കള്‍ കടക്കാനുള്ള സാധ്യത കൂടുതലാണ്. അതിനാല്‍ നിങ്ങള്‍ പോകുന്ന പൊതു നീന്തല്‍ക്കുളം നന്നായി വൃത്തിയാക്കിയിട്ടുണ്ടെന്ന് ഉറപ്പാക്കുക. കുളത്തില്‍ പ്രവേശിക്കുന്നതിന് മുമ്പ് നിങ്ങളുടെ ചെവി ശരിയായി മൂടുന്നത് ഉറപ്പാക്കുക. നീന്തുമ്പോള്‍ വെള്ളം കുടിക്കരുത്; മഴക്കാലത്ത് ശുദ്ധീകരിക്കാത്ത വെള്ളം ഉപയോഗിക്കുന്നത് വളരെ അപകടകരമാണ്. നീന്തലിന് ശേഷം സ്വയം നന്നായി വെള്ളം തോര്‍ത്തി കളയുക.
മഴക്കാലത്ത് കുളങ്ങള്‍, ആറുകള്‍, തോടുകള്‍ തുടങ്ങിയ പ്രകൃതിദത്ത ജലാശങ്ങളില്‍ നീന്താന്‍ കഴിവതും പോകാതിരിക്കുക എന്നതാണ് സുരക്ഷിതമായ ഏറ്റവും പ്രധാന കാര്യം. കാരണം അണുബാധകളെക്കാള്‍ ഉപരി ജലനിരപ്പ് ഉയര്‍ന്ന് കിടക്കുന്നതും ശക്തമായ ഒഴുക്കുകളും പ്രകൃതിദത്ത ജലാശങ്ങളില്‍ നീന്തുന്നത് അപകടകരമാക്കും. കുളങ്ങളിലാണെങ്കിലും മറ്റ് എവിടെയാണെങ്കിലും നീന്തുന്നതെങ്കില്‍ മുന്‍കരുതലുകള്‍ സ്വീകരിക്കുക. വെള്ളത്തിന് തണുപ്പ് കൂടുതലുള്ള സമയമമായതിനാല്‍ കൈകാലുകല്‍ കോച്ചി പിടിക്കാന്‍ സാധ്യതയുണ്ട്. അതിനാല്‍ അത്തരം കാര്യങ്ങള്‍ ശ്രദ്ധിക്കുക, ജാഗ്രത പാലിക്കുക.