പുർനിയയിലെ ബേലാ പ്രസാദി ഭവാനിപൂരിലുള്ള ഭർതൃവീട്ടിലാണ് അംഗൂരിയെ മരിച്ച നിലയിൽ കണ്ടെത്തിയത്. അംഗൂരിയെ വീട്ടിൽ മരിച്ച നിലയിൽ കണ്ടെത്തിയെന്ന് സമീപവാസികൾ യുവതിയുടെ വീട്ടുകാരെ അറിയിക്കുകയായിരുന്നു. മർദ്ദനമേറ്റാണ് യുവതി കൊല്ലപ്പെട്ടതെന്ന് പോലീസ് അറിയിച്ചു.
ഭർത്താവും ബന്ധുക്കളും ഒളിവിലാണ്. മൃതദേഹം സദർ ആശുപത്രിയിലേക്കും മാറ്റി പോസ്റ്റ് മോർട്ടം നടപടികൾക്ക് ശേഷം ബന്ധുക്കൾക്ക് കൈമാറി. യുവതി ഏഴുമാസം ഗർഭിണിയാണെന്ന് പോസ്റ്റ് മോർട്ടത്തിൽ വ്യക്തമായി.
2012ൽ വിവാഹിതയായ യുവതിയാണ് കൊല്ലപ്പെട്ടത്. വിവാഹസമയത്ത് സ്ത്രീധനമായി ഫ്രിഡ്ജ് നൽകാമെന്ന് യുവതിയുടെ കുടുംബം അറിയിച്ചിരുന്നു. വർഷങ്ങൾ കഴിഞ്ഞിട്ടും ഫ്രിഡ്ജ് നൽകാതിരുന്നതോടെ വീട്ടിൽ വഴക്ക് പതിവായിരുന്നുവെന്നും ഇതിൻ്റെ പേരിൽ യുവതിയെ കൊലപ്പെടുത്തുകയായിരുന്നു എന്നുമാണ് പരാതി.
ഫ്രിഡ്ജ് സ്ത്രീധനമായി ആവശ്യപ്പെട്ട് സഹോദരിയെ ഭർത്താവും കുടുംബവും നിരന്തരം പീഡിപ്പിച്ചിരുന്നതായി സഹോദരൻ കൗശർരാജ പോലീസിനോട് പറഞ്ഞു. മോമിനാഥ് ആലം – അംഗുരി ബീഗം ദമ്പതികൾക്ക് നാല് കുട്ടികളുണ്ട്. അഞ്ചാമതും ഗർഭിണിയായിരിക്കെയാണ് യുവതി കൊല്ലപ്പെട്ടത്. യുവതിയുടെ മരണത്തിൽ അന്വേഷണം തുടരുകയാണെന്ന് പോലീസ് അറിയിച്ചു. ഒളിവിൽ പോയ ഭർത്താവിൻ്റെ ബന്ധുക്കളെ കണ്ടെത്താനുള്ള ശ്രമത്തിലാണ് പോലീസ്.
Read Latest National News and Malayalam News