രാജ്യത്തിന്‍റെ വടക്കുകിഴക്കൻ മേഖലയിലെ ഏറ്റവും വലിയ വിമാനത്താവളമാണ് അസമിലെ ഗുവാഹത്തി അന്താരാഷ്ട്ര വിമാനത്താവളം (എല്‍ജിബിഐ). ഞായറാഴ്ച മുതലാണ് ഇവിടെ ഡിജി യാത്ര പ്രവര്‍ത്തനസജ്ജമായത്. അദാനി എയര്‍പോര്‍ട്ട്‌സിന്‍റെ കീഴിലാണ് എല്‍ജിബിഐ പ്രവര്‍ത്തിക്കുന്നത്. കൊച്ചി, ലഖ്‌നൗ, ജയ്പുര്‍, മുംബൈ വിമാനത്താവളങ്ങളിലും വൈകാതെ തന്നെ ഡിജി യാത്ര സൗകര്യം ആരംഭിക്കും.
സഖറിയാസ് മാർ അന്തോണിയോസ് തിരുമേനിയുടെ കബറടക്കം നാളെ
വ്യോമഗതാഗതവകുപ്പിന്‍റെ സഹായത്തോടെയും അദാനി ഗ്രൂപ്പിന്‍റെ സഹകരണത്തോടെയുമാണ് എല്‍ജിബിഐ വിമാനത്താവളത്തില്‍ ഡിജി യാത്ര സംവിധാനം ആരംഭിച്ചതെന്ന് അസം ഗതാഗതമന്ത്രി ചന്ദ്ര് മോഹന്‍ പട്ടോവാരി പറഞ്ഞു. അസമിലേയും മറ്റ് വടക്കുകിഴക്കന്‍ സംസ്ഥാനങ്ങളിലേയും വിമാനയാത്രക്കാര്‍ക്ക് ഏറെ ഉപകാരപ്രദമാകും ഇത്. നേരത്തെ ചെക്ക് ഇന്‍ സമയത്ത് യാത്രക്കാര്‍ക്ക് പലതരത്തിലുള്ള നടപടിക്രമങ്ങള്‍ പൂര്‍ത്തിയാക്കേണ്ടതുണ്ടായിരുന്നു, കൂടാതെ നീണ്ട ക്യൂവില്‍ കാത്തിരിപ്പ് തുടരേണ്ടതുമുണ്ടായിരുന്നു. എന്നാല്‍ ഡിജി യാത്രയിലൂടെ അത്തരം ബുദ്ധിമുട്ടുകള്‍ അവസാനിച്ചെന്ന് ചന്ദ്ര് മോഹന്‍ പട്ടോവാരി കൂട്ടിച്ചേർത്തു.
പ്രധാന നഗരങ്ങളിൽ നിലവിൽ ഡിജി യാത്രാ സംവിധാനം ഉപയോഗിക്കുന്നുണ്ടെങ്കിലും വടക്കുകിഴക്കൻ മേഖലയിൽ ഇത് ആദ്യമാണ്. ഒട്ടേറെ വികസന പ്രവർത്തനങ്ങൾ നടത്തുന്നുണ്ടെന്നും വരും ദിവസങ്ങളിൽ മേഖലയിൽ ഇനിയും ഇത്തരം ശ്രമങ്ങൾ ഉണ്ടാകുമെന്നും സിവിൽ ഏവിയേഷൻ സെക്രട്ടറി രാജീവ് ബൻസാൽ പറഞ്ഞു.
ഫേഷ്യല്‍ റെക്കഗനിഷനിലൂടെയാണ് ഡിജി യാത്ര സംവിധാനം പ്രവര്‍ത്തിക്കുന്നത്. ആധാറുമായി ഇത് ബന്ധപ്പെടുത്തിയിട്ടുണ്ട്. യാത്രികര്‍ക്ക് ഡിജി യാത്ര ആപ്പ് ഡൗണ്‍ലോഡ് ചെയ്ത് സംവിധാനം പ്രയോജനപ്പെടുത്താൻ കഴിയും.