മുംബൈയുടെ ജിഡിപി 300 ബില്യൺ ഡോളറിലെത്തിക്കും; 20 നഗരങ്ങളെ വളർത്തിയെടുക്കും; മാസ്റ്റർപ്ലാൻ അവതരിപ്പിക്കാൻ നീതി ആയോഗ്

മുംബൈയുടെ-ജിഡിപി-300-ബില്യൺ-ഡോളറിലെത്തിക്കും;-20-നഗരങ്ങളെ-വളർത്തിയെടുക്കും;-മാസ്റ്റർപ്ലാൻ-അവതരിപ്പിക്കാൻ-നീതി-ആയോഗ്
മുംബൈയുടെ ജിഡിപി 300 ബില്യൺ ഡോളറിലെത്തിക്കാനുള്ള മാസ്റ്റർപ്ലാൻ അവതരിപ്പിക്കാൻ നീതി ആയോഗ് തയ്യാറെടുക്കുന്നു. രാജ്യത്തിന്റെ സാമ്പത്തികവളർച്ചയുടെ വേഗം കൂട്ടുന്നത് ലക്ഷ്യമിട്ടാണ് സാമ്പത്തികതലസ്ഥാനത്തിന്റെ ജിഡിപി വർദ്ധിപ്പിക്കാൻ സർക്കാർ പദ്ധതിയിടുന്നത്.

നിലവിൽ മുംബൈ നഗരത്തിന്റെ (Mumbai Metropolitan Region) മൊത്ത ആഭ്യന്തര ഉൽപ്പാദനം 140 ബില്യൺ ഡോളറാണ്. ഇത് ഇരട്ടിയിലധികമാക്കാനുള്ള സമഗ്രമായ സാമ്പത്തിക പരിഷ്കാരങ്ങളടങ്ങിയ നയമാണ് നീതി ആയോഗ് അവതരിപ്പിക്കുക. ഏഴു വർഷത്തിനുള്ളിൽ ഈലക്ഷ്യം എത്തിപ്പിടിക്കുവാനാണ് നീതി ആയോഗിന്റെ നയപരിപാടി ലക്ഷ്യമിടുന്നതെന്ന് റിപ്പോർട്ടുകൾ സൂചിപ്പിക്കുന്നു.

ഈ റിപ്പോർട്ടിന്റെ അവതരണവുമായി ബന്ധപ്പെട്ട് നീതി ആയോഗിന്റെ ഉന്നത ഉദ്യോഗസ്ഥർ മുഖ്യമന്ത്രി ഏക്നാഥ് ഷിൻഡെയുമായി ഈയിടെ ഒരു കൂടിക്കാഴ്ച നടത്തിയിരുന്നു.

20 നഗരങ്ങളിൽ ഫോക്കസ്

രാജ്യത്തെ ഇരുപത് നഗരങ്ങളുടെ മൊത്ത ആഭ്യന്തര ഉൽപ്പാദനം വർദ്ധിപ്പിക്കാനുള്ള പദ്ധതിയാണ് നീതി ആയോഗിനുള്ളതെന്ന് റിപ്പോർട്ടുകൾ പറയുന്നു.

മുംബൈ, സൂറത്ത്, വാരാണസി, വിശാഖപട്ടണം എന്നീ നഗരങ്ങളെ ലക്ഷ്യമിട്ടാണ് ആദ്യഘട്ടത്തിൽ നയരൂപീകരണം നടത്തുക. ബാംഗ്ലൂർ, ലഖ്നൗ, ചെന്നൈ തുടങ്ങിയ നഗരങ്ങളും അടുത്ത ഘട്ടങ്ങളിൽ വരും. ഈ നഗരങ്ങളുടെ പട്ടികയിൽ കേരളത്തിലെ നഗരങ്ങളേതെങ്കിലും വരുമോയെന്നത് വ്യക്തമല്ല.

അതെസമയം മുംബൈ നഗരത്തിനുമേൽ കേന്ദ്രം നയം രൂപീകരിക്കുന്നതിന്റെ അപകടം ചൂണ്ടിക്കാട്ടി ശിവസേനാ നേതാവ് ഉദ്ധവ് താക്കറെ രംഗത്തെത്തിയിട്ടുണ്ട്. മഹാരാഷ്ട്രയിൽ നിന്ന് മുംബൈയെ അടർത്തി മാറ്റുന്നതിലേക്കാണ് ഈ നീക്കം നയിക്കുകയെന്ന് അദ്ദേഹം ചൂണ്ടിക്കാട്ടി. ഡൽഹിക്കുമേൽ പുതിയ ബില്ല് അടിച്ചേൽപ്പിച്ചതടക്കമുള്ള ഉദാഹരണങ്ങൾ നിരത്തിയായിരുന്നു താക്കറെയുടെ ആക്രമണം.

ഇന്ത്യയെ 5 ട്രില്യൺ സാമ്പത്തികവ്യവസ്ഥയാക്കി മാറ്റുമെന്ന പ്രധാനമന്ത്രി നരേന്ദ്രമോദിയുടെ പ്രഖ്യാപിത ലക്ഷ്യത്തിലേക്കുള്ള മാർഗ്ഗമെന്ന നിലയിലാണ് കേന്ദ്ര സർക്കാരിന്റെ ഈ ഇടപെടൽ. പരമ്പരാഗതമായി നഗരങ്ങളുടെ സാമ്പത്തികാസൂത്രണം സംസ്ഥാനങ്ങളാണ് ചെയ്തുവന്നിരുന്നത്. ഇതിൽനിന്നുള്ള ഒരു മാറ്റം കേന്ദ്രം ആഗ്രഹിക്കുന്നുണ്ടെന്നാണ് ലഭ്യമാകുന്ന സൂചനകൾ.

പ്രണവ് മേലേതിൽ നെ കുറിച്ച്

പ്രണവ് മേലേതിൽ Digital Content Producer

പതിനൊന്ന് വർഷമായി മാധ്യമപ്രവർത്തകൻ. ലൈഫ്‌സ്റ്റൈൽ, എന്റർടെയ്ൻമെന്റ്, ഗാഡ്ജറ്റ്സ്, ഓട്ടോമൊബൈൽ തുടങ്ങിയ മേഖലകളിൽ ലേഖനങ്ങളെഴുതുന്നു.Read More

Exit mobile version