വർക്കല ശിവഗിരി റെയിൽവേ സ്റ്റേഷൻ ഇവയിലൊന്നാണ്. രാജ്യത്ത് ആത്മീയ ടൂറിസത്തിന്റെ സാധ്യതകൾ വർദ്ധിപ്പിക്കുകയെന്ന ലക്ഷ്യത്തോടെ നടത്തുന്ന പ്രവർത്തനങ്ങളുടെ ഭാഗംകൂടിയാണിത്. 600 ലക്ഷം രൂപയുടെ വികസനമാണ് ഈ സ്റ്റേഷനിൽ നടക്കുക. അങ്ങാടിപ്പുറം റെയിൽവേ സ്റ്റേഷനും ആധുനികവ്ൽക്കരണത്തിന് വിധേയമാകും. ഇതും തീർത്ഥാടന ടൂറിസം സാധ്യതകളെ ഉപയോഗപ്പെടുത്താനാണ്. ആദിശങ്കരന്റെ ജന്മദേശമായ കാലടിയിലേക്ക് വരുന്ന തീർത്ഥാടകരെ അങ്കമാലിയിലെ ആധുനികവല്‍ക്കരിക്കപ്പെട്ട റെയിൽവേ സ്റ്റഷനാണ് സ്വീകരിക്കുക. ശബരിമലയോട് അടുത്തുനിൽക്കുന്ന റെയിൽവേ സ്റ്റേഷനെന്ന നിലയിൽ ചെങ്ങന്നൂർ സ്റ്റേഷനും ആധുനികവൽക്കരണത്തിന് വിധേയമാകും.
പല റെയിൽവേ സ്റ്റേഷനുകളിലും ജോലികൾ നടന്നുകൊണ്ടിരിക്കുകയാണ്. ആലപ്പുഴ, ചാലക്കുടി, ചങ്ങനാശ്ശേരി, ചിറയിൻകീഴ്, എറണാകുളം, എറണാകുളം ടൗൺ, ഏറ്റുമാനൂർ, ഫറോക്, ഗുരുവായൂർ, കാസറഗോഡ്, കായംകുളം, കൊല്ലം, കോഴിക്കോട്, കുറ്റിപ്പുറം, മാവേലിക്കര, നെയ്യാറ്റിൻകര, നിലമ്പൂർ റോഡ്, ഒറ്റപ്പാലം, പരപ്പനങ്ങാടി, പയ്യന്നൂർ, പുനലൂർ, ഷോറണൂർ ജങ്ഷൻ, തലശ്ശേരി, തിരുവനന്തപുരം, തൃശ്ശൂർ, തിരൂർ, തിരുവല്ല, തൃപ്പൂണിത്തുറ, വടകര, വർക്കല, വടക്കാഞ്ചേരി എന്നിവയാണ് മറ്റ് സ്റ്റേഷനുകൾ. ഇതിൽ തിരുവനന്തപുരം വിമാനത്താവളം ലോകോത്തര നിലവാരമുള്ളതാക്കി മാറ്റുമെന്ന് റെയിൽവേ തീരുമാനിച്ചതായി റിപ്പോർട്ടുകളുണ്ട്. 400 കോടി രൂപയുടെ പദ്ധതിയായിരിക്കും ഇത്.
നിലമ്പൂർ – നഞ്ചൻകോട് പാത
ബ്രിട്ടീഷുകാരുടെ കാലംതൊട്ട് ആലോചനയിലുള്ള പാതയാണ് നിലമ്പൂർ – നഞ്ചൻകോട് പാത. നിരവധി രാഷ്ട്രീയ താൽപ്പര്യങ്ങളെ മറികടന്ന് ഈ പാത ഇപ്പോൾ യാഥാര്‍ത്ഥ്യമായിരിക്കുകയാണ്. സർവ്വേ നടപടികളിലേക്ക് എത്തിക്കഴിഞ്ഞിട്ടുണ്ട്. ഹൈദരാബാദ് ആസ്ഥാനമായി പ്രവർത്തിക്കുന്ന ആർവി അസോസിയേറ്റ്സാണ് സർവ്വേ ടെൻഡർ പിടിച്ചിരിക്കുന്നത്. 4.3 കോടി രൂപയുടേതാണ് ടെൻഡർ. ഓഗസ്റ്റ് മാസത്തിൽ തന്നെ സർവ്വേ തുടങ്ങിയിട്ടുണ്ട്. 12 മാസത്തിനുള്ളിൽ സർവ്വേ പൂർത്തിയാകും. ഇത്രയും വൈകാതെതന്നെ സർവ്വേ പൂർത്തിയാക്കാനും ഡിപിആർ സമര്‍പ്പിക്കാനും നീക്കം നടത്തുന്നുണ്ട് അധികൃതർ.
മണിക്കൂറിൽ 160 കിലോമീറ്റർ വേഗതയിൽ ഓടിക്കാവുന്ന ട്രാക്കിനു വേണ്ടിയുള്ള സാധ്യതാപഠനമാണ് നടക്കുക. അഥവാ വന്ദേഭാരത് വരെ ഓടിക്കാൻ കഴിയുന്നതായിരിക്കും ഈ ട്രാക്ക്.
നേമം കോച്ചിങ് ടെർമിനൽ
2022ൽ റെയിൽവേ ഉപേക്ഷിക്കാനൊരുങ്ങിയ ഈ പദ്ധതി വലിയ സമ്മർദ്ദങ്ങൾക്കൊടുവിലാണ് വീണ്ടും അനുവദിക്കപ്പെട്ടത്. ഏറ്റവും പുതിയ റിപ്പോർട്ടുകൾ പ്രകാരം നേമം കോച്ചിങ് ടെർമിനൽ നിർമ്മാണത്തിന് റെയിൽവേ പച്ചക്കൊടി കാട്ടിയിട്ടുണ്ട്. ഇതിന്റെ ഭാഗമായി ആദ്യം സ്റ്റേഷൻ വികസനമാണ് ആദ്യം നടക്കുക. നേമം സ്റ്റേഷന് പ്രാമുഖ്യം ഏറ്റുന്ന ഒരു പദ്ധതിയാണിത്. നിലവിൽ തമ്പാനൂർ സെൻട്രൽ സ്റ്റേഷനിലുള്ള തിരക്ക് കുറയ്ക്കാൻ ഈ കേന്ദ്രം ഉപകാരപ്പെടുകയും ചെയ്യും. തിരുവനന്തപുരം സെൻട്രൽ റെയിൽവേ സ്റ്റേഷന്റെ ഉപഗ്രഹ സ്റ്റേഷനായി നേമത്തെ മാറ്റുകയാണ് ലക്ഷ്യം.
ഇതിനകം തന്നെ 116.57 കോടി രൂപ പദ്ധതിക്കായി അനുവദിച്ചിട്ടുണ്ട്. ഇതിൽ സിവിൽ എൻജിനീയറിങ് ജോലികൾക്ക് 99.58 കോടി രൂപയാണ് വിഹിതം. ട്രെയിനുകളുടെ അറ്റകുറ്റപ്പണികൾ നടത്താനുള്ള എല്ലാ സജ്ജീകരണങ്ങളും ഇവിടെയൊരുക്കും. കൂടാതെ തിരുവനന്തപുരത്തുനിന്ന് ട്രെയിനുകൾ ഇങ്ങോട്ട് നീക്കി വൃത്തിയാക്കാനും സാധിക്കും. സിഗ്നൽ നവീകരണത്തിന് 8.44 കോടി രൂപയാണ് വിഹിതം. ഇലക്ട്രിക്കൽ ജോലികൾക്ക് 4.25 കോടി രൂപയും, ഇലക്ട്രിക്കൽ ട്രാക്ഷന് 2.85 കോടി രൂപയും മാറ്റിവെച്ചിരിക്കുന്നു.
പാത ഇരട്ടിപ്പിക്കൽ
തിരുവനന്തപുരം – കന്യാകുമാരി റെയിൽപ്പാതയിലെ ഇരട്ടിപ്പിക്കൽ പണികൾ നടന്നുവരികയാണ്. ഇതിനായി തിരുവനന്തപുരം മുതൽ നേമം വരെയുള്ള ഭാഗങ്ങളിൽ സ്ഥലമേറ്റെടുപ്പ് പൂര്‍ത്തിയായിട്ടുണ്ട്. നേമം-നെയ്യാറ്റിൻകര, നെയ്യാറ്റിൻകര-പാറശ്ശാല എന്നീ ഭാഗങ്ങളിൽ അടുത്ത രണ്ട് ഘട്ടങ്ങളിലായി സ്ഥലമേറ്റെടുപ്പ് നടക്കും. മണ്ണിട്ട് നികത്തുന്ന ജോലികളാണ് ഇപ്പോൾ നടക്കുന്നത്. ആദ്യഘട്ടത്തിൽ മേൽപ്പാലങ്ങളാണ് നിർമ്മിക്കുക.
ഇതുകൂടാതെ അമ്പലപ്പുഴ – എറണാകുളം പാതയിലും ഇരട്ടിപ്പിക്കൽ നടക്കുന്നുണ്ട്. ഈ പദ്ധതി ഇപ്പോൾ ടെൻഡർ ഘട്ടത്തിലാണ്. എറണാകുളം മുതൽ തുറവൂർ വരെ സ്ഥലമേറ്റെടുപ്പ് നടന്നിട്ടുണ്ട്. ഇതിന്റെ നഷ്ടപരിഹാരം ഉടൻ നൽകും. ആലപ്പുഴയിൽ സർവ്വേ നടപടികൾ വേഗത്തിലല്ലെന്ന് പരാതിയുണ്ട്.
2850 കോടി രൂപയാണ് ഈ പദ്ധതിക്ക് ചെലവ് പ്രതീക്ഷിക്കുന്നത്.
എറണാകുളം-ഷൊറണൂർ മൂന്നാംപാത
കേരളത്തിലെ ഏറ്റവും വേഗത കുറവുള്ള റൂട്ടാണ് എറണാകുളം-ഷൊറണൂർ റെയിൽവേ റൂട്ടെന്നു പറയാം. ബ്രിട്ടീഷുകാരുടെ കാലത്ത് വളവുകളെയും കുന്നുകളെയുമെല്ലാം ബഹുമാനിച്ച് നിർമ്മിച്ച പാതയാണിത്. അതിന്റെ പ്രശ്നങ്ങൾ ഇപ്പോഴാണ് അനുഭവപ്പെടുന്നതെന്നു മാത്രം. വന്ദേഭാരത് ട്രെയിൻ ഇവിടെയെത്തുമ്പോൾ വേഗത കുറയ്ക്കേണ്ടി വരുന്നു. ട്രെയിനുകളുടെ എണ്ണവും വളരെ കൂടുതലാണ്. ഇവിടെ ഒരു മൂന്നാംപാത നിർമ്മിക്കാനുള്ള നീക്കങ്ങൾ നടക്കുകയാണ്. എന്നാൽ ഈ പദ്ധതി റെയിൽവേ വൈകിപ്പിക്കുകയാണെന്ന ആക്ഷേപമുണ്ട്. 1500 കോടിയിലേറെ രൂപ ചെലവ് വരും ഈ പദ്ധതിക്ക്. കഴിഞ്ഞ മൂന്ന് റെയിൽവേ ബജറ്റുകളിൽ ഈ പദ്ധതിക്ക് ടോക്കൺ തുക നീക്കിവെച്ചിരുന്നതാണ്.
വളവിനൊപ്പിച്ച് ട്രെയിനിന് വേഗതയിൽത്തന്നെ ചെരിഞ്ഞ് പോകാൻ സഹായിക്കുന്ന ടില്‍റ്റിങ് സാങ്കേതിക വിദ്യയും ഇവിടെ പ്രയോഗിച്ചേക്കുമെന്ന് ചില റിപ്പോർട്ടുകൾ പറയുന്നു. ഇത് നടപ്പായില്ലെങ്കിൽ പരമാവധി വളവുകൾ നിവർത്തി പാതയെ ശരിപ്പെടുത്തും. മണിക്കൂറിൽ 110 മുതൽ 130 വരെ കിലോമീറ്റർ വേഗതയിൽ ട്രെയിനുകൾക്ക് സഞ്ചരിക്കാൻ സൗകര്യമുണ്ടാക്കുകയാണ് ലക്ഷ്യം.
അങ്കമാലി – എരുമേലി ശബരി പാത
ഏറെ നാളുകളായി കേരളം ചർച്ച ചെയ്തുകൊണ്ടിരിക്കുന്ന പാതയാണിത്. ഈ പാതയ്ക്കായി രണ്ട് എലൈൻമെന്റുകൾ നിർദ്ദേശിക്കപ്പെടുകയുണ്ടായി. ചെങ്ങന്നൂരില്‍ നിന്ന് പമ്പാതീരത്തുകൂടി വയഡക്ടുകളിലൂടെ പോകുന്ന പാതയാണ് ഇവയിലൊന്ന്. എന്നാൽ ഈ പാതയിലെ ജനവാസകേന്ദ്രങ്ങളെ സ്പർശിക്കുന്നത് കുറവായതിനാൽ ഒരു ശബരിമല ഡെഡിക്കേറ്റഡ് കോറിഡോർ പോലെയാണ് പ്രവർത്തിക്കുക. അഥവാ, ശബരിമല സീസണിൽ മാത്രം ലാഭത്തിലോടിക്കാം. അങ്കമാലി – എരുമേലി നിർദ്ദിഷ്ട പാതയെക്കാൾ 100 കിലോമീറ്റർ അധികം വരും ഈ പാത. നിർമ്മാണച്ചെലവ് രണ്ടിരട്ടിയാകുകയും ചെയ്യും.
അതെസമയം, 25 കൊല്ലം മുമ്പ് (1997–98) പദ്ധതിയിട്ടതാണ് അങ്കമാലിയിൽ നിന്ന് എരുമേലിയിലേക്കുള്ള പാത. ഇത് സീസണല്ലാത്ത കാലത്തും ജനങ്ങൾക്ക് ഉപകാരപ്പെടുന്ന ഒന്നാണ്. പദ്ധതിക്കായി 7 കിലോമീറ്ററോളം സ്ഥലമേറ്റെടുപ്പും നടന്നിട്ടുണ്ട്. ഇടയിലൊരുനാൾ റെയിൽവേമന്ത്രി അശ്വിനി വൈഷ്ണവ് രണ്ട് പ്രോജക്ടുകളും പരിഗണനയിലുണ്ടെന്ന് പ്രസ്താവിച്ചിരുന്നു. ഇതിലേതാണ് നടപ്പാകുക, എപ്പോഴാണ് നടപ്പാകുക എന്ന കാര്യത്തിൽ വ്യക്തത ഇനിയും വരേണ്ടതുണ്ട്.
അങ്കമാലി – എരുമേലി റൂട്ടിൽ കല്ലിട്ട് തിരിച്ച സ്ഥലം റെയിൽവേ ഇനിയും ഏറ്റെടുത്തിട്ടില്ല. കഴിഞ്ഞ കാൽനൂറ്റാണ്ടായി ഈ സ്ഥലത്തിന്റെ ഉടമകൾ ഭൂമികൊണ്ട് ഒന്നും ചെയ്യാനാകാതെ കഷ്ടത്തിലാണ്.
നിർദ്ദിഷ്ട ചെങ്ങന്നൂർ – പമ്പ പാത.
2016ൽ പ്രധാനമന്ത്രി നരേന്ദ്രമോദി തന്റെ നേരിട്ടുള്ള നിരീക്ഷണത്തിലുള്ള പദ്ധതിയായി ശബരി പാതയെ പ്രഖ്യാപിച്ചു. എന്നാൽ പദ്ധതിയുടെ മുഴുവൻ ചെലവും കേന്ദ്രം വഹിക്കണമെന്ന് സംസ്ഥാനം ആവശ്യപ്പെട്ടതിനു പിന്നാലെ 2019ൽ പദ്ധതി മരവിപ്പിക്കപ്പെട്ടു. പിന്നീട് പദ്ധതി നടപ്പാക്കാൻ കിഫ്ബി വഴി 2000 കോടി രൂപ അനുവദിച്ചതായി സംസ്ഥാനം ബജറ്റിൽ പ്രഖ്യാപിച്ചു. ഇതോടെ കേന്ദ്രം പദ്ധതിയുടെ എസ്റ്റിമേറ്റ് പുതുക്കി രംഗത്തെത്തി. 3810 കോടി രൂപയുടെ പദ്ധതി. എന്നാൽ, 2023ൽ വന്ദേഭാരത് ഓടിക്കാൻ കഴിയുന്വ വിധത്തിൽ ട്രാക്ക് നിർമ്മിക്കാൻ പദ്ധതി വീണ്ടും പുതുക്കി.
റെയിൽവേ തയ്യാറാക്കിയ ഡിപിആർ പ്രകാരം പദ്ധതി ലാഭകരമായി നടപ്പാക്കാനാകും.
തിരുവനന്തപുരത്തേക്ക് നീട്ടൽ
എരുമേലിയിൽ നിന്ന് ഈ പാത തിരുവനന്തപുരത്തേക്ക് നീട്ടാനുള്ള ആലോചനയും ഇടയിൽ നടക്കുന്നുണ്ട്. നിലവിലെ എറണാകുളം – തിരുവനന്തപുരം റെയിൽപ്പാതയ്ക്ക് സമാന്തരമായി നെടുമങ്ങാട് സ്പർശിക്കുന്ന തരത്തിൽ. തൊടുപുഴ, നെടുമങ്ങാട്, പത്തനംതിട്ട ജില്ലാ ആസ്ഥാനം, ഇടുക്കി ജില്ല എന്നിവിടങ്ങളെ സ്പർശിക്കുന്ന ഈ പാത വലിയതോതിൽ ജനോപകാരപ്രദമായിരിക്കും. നിലവിൽ റെയിൽവേ റൂട്ടില്ലാത്ത ഈ മേഖലയുടെ സാമ്പത്തികവളര്‍ച്ചയ്ക്കും പാത വഴിയൊരുക്കും.
തലശ്ശേരി – മൈസൂർ പാത
തീരുമാനമാകാതെ കിടക്കുന്ന മറ്റൊരു സ്വപ്നമാണ് തലശ്ശേരി – മൈസൂർ പാത. ഈ പാതയോട് സംസ്ഥാന സര്ക്കാരിന് പ്രത്യേക താല്‍പ്പര്യമുണ്ടെന്ന് റിപ്പോർട്ടുകളുണ്ട്. ഈ പാതയ്ക്കു വേണ്ടി നിലമ്പൂർ-നഞ്ചൻകോട് പാത അട്ടിമറിക്കാൻ സംസ്ഥാനം ശ്രമിക്കുകയാണെന്നും ആരോപണമുണ്ടായിരുന്നു. തലശ്ശേരി – മൈസൂർ പാതയ്ക്കായി പ്രാഥമികപഠനം നടത്താൻ 50 ലക്ഷം രൂപ അനുവദിക്കുകയുമുണ്ടായി. അതെസമയം മൈസൂരിലേക്ക് നേരിട്ട് ട്രെയിനിൽ പോകാൻ അവസരം നൽകുന്ന ഒരു പദ്ധതിയെന്ന നിലയിൽ ഈ പദ്ധതിയെ അനുകൂലിക്കുന്നവർ ഏറെയാണ്. തെക്കൻ കേരളത്തിൽ നിന്നുള്ളവർക്ക് മൈസൂരിലേക്ക് 400 കിലോമീറ്റർ യാത്ര കുറയ്ക്കാനാകും. ബാംഗ്ലൂരിലേക്കും ഹുബ്ലിയിലേക്കും 130 കിലോമീറ്റർ കുറയ്ക്കാം. കൂടാതെ സേലം വഴിയുള്ള റൂട്ടുകളെല്ലാം നിബിഡമായിക്കഴിഞ്ഞെന്നത് ഈ പാതയ്ക്ക് അനുകൂലമായ ഘടകമാണ്.
തിരൂർ – ഗുരുവായൂർ പാത
ഏറെക്കാലമായി പറഞ്ഞുകേൾക്കുന്ന മറ്റൊരു പാതയാണ് ഗുരുവായൂരിനെ തിരൂരുമായി ബന്ധിപ്പിക്കുന്ന ട്രാക്ക്. ഈ പാതയ്ക്ക് വേണ്ടിയുള്ള സര്‍വ്വേ ദക്ഷിണ റെയിൽവേ ആരംഭിച്ചുകഴിഞ്ഞിട്ടുണ്ട്. മലപ്പുറം, കോഴിക്കോട്, തൃശൂർ ജില്ലകളിലെ റെയിൽവേ യാത്രകളെ വലിയതോതിൽ മാറ്റിത്തീർക്കും ഈ പാത.