വിദേശ വാക്സിനുകൾക്ക് ഇന്ത്യയിൽ പരീക്ഷണം വേണ്ട; ഇളവുകളുമായി ഡിസിജിഐ

ന്യൂഡൽഹി: വിദേശത്തു നിന്ന് ഇറക്കുമതി ചെയ്യുന്ന കൊവിഡ് 19 വാക്സിനുകള്‍ക്ക് ഇന്ത്യയിൽ അധികമായി ക്ലിനിക്കൽ പരീക്ഷണങ്ങള്‍ നടത്തേണ്ടെന്ന് ഡിസിജിഐ. രാജ്യത്ത് കടുത്ത വാക്സിൻ ക്ഷാമത്തിനിടെ ഫൈസര്‍, മൊഡേണ വാക്സിനുകള്‍ ഇറക്കുമതി ചെയ്യുന്ന സാഹചര്യത്തിലാണ് ഡിസിജിഐ വാക്സിൻ നിര്‍മാതാക്കള്‍ക്കായി കൂടുതൽ ഇളവുകള്‍ പ്രഖ്യാപിച്ചത്.

Also Read: കാർട്ടൂണിസ്റ്റ് ഇബ്രാഹിം ബാദുഷ അന്തരിച്ചു

ഈ സാഹചര്യത്തിൽ കൂടുതൽ സ്വകാര്യ വാക്സിൻ നിര്‍മാതാക്കള്‍ക്ക് ഇന്ത്യയിൽ വാക്സിൻ വിതരണം ചെയ്യാൻ അവസരമൊരുങ്ങും. യുഎസിലെ ഫുഡ് ആൻ്റ് ഡ്രഗ് അതോരിറ്റി, യൂറോപ്യൻ മെഡിസിൻസ് ഏജൻസി, യുകെയിലെ എംഎച്ച്ആര്‍എ, ജപ്പാനിലെ പിഎംഡിഎ എന്നീ ഏജൻസികളുടെ അനുമതിയുള്ള വാക്സിനുകള്‍ക്കാണ് ഇന്ത്യയിൽ ഇളവു നല്‍കുന്നതെന്നാണ് ചൊവ്വാഴ്ച പുറത്തിറക്കിയ നോട്ടീസിൽ വ്യക്തമാക്കുന്നത്.

അതേസമയം, വാക്സിൻ സ്വീകരിച്ച ആദ്യ നൂറുപേരുടെ ആരോഗ്യനില നിരീക്ഷിക്കുമെന്ന നിബന്ധനയിൽ മാറ്റമുണ്ടാകില്ല. എന്നാൽ ഓരോ ബാച്ച് വാക്സിനും പ്രത്യേകം പരിശോധിക്കണമെന്ന നിബന്ധന പ്രായോഗികമല്ലെന്ന് വാക്സിൻ നിര്‍മാതാക്കള്‍ അറിയിച്ചിട്ടുണ്ട്. ഇക്കാര്യം കേന്ദ്രം അംഗീകരിച്ചതായാണ് റിപ്പോര്‍ട്ട്.

Also Read: സർക്കാരിന് കിട്ടാത്ത വാക്സിൻ എങ്ങനെ സ്വകാര്യ ആശുപത്രികൾക്ക് ലഭിക്കുന്നു? ചോദ്യവുമായി ഹൈക്കോടതി

നിലവിൽ രാജ്യത്ത് സിറം ഇൻസ്റ്റിറ്റ്യൂട്ട് ഉത്പാദിപ്പിക്കുന്ന കൊവിഷീൽഡ്, ഭാരത് ബയോടെക്കിൻ്റെ കൊവാക്സിൻ എന്നിവയാണ് നിലവിൽ വൻതോതിൽ വിതരണം ചെയ്യുന്നത്. കൂടാതെ റഷ്യയുടെ സ്പുട്നിക് 5 വാക്സിനും വിതരമണം തുടങ്ങിയിട്ടുണ്ട്. ഇന്ത്യൻ ഫാര്‍മസ്യൂട്ടിക്കൽ കമ്പനിയായ സിപ്ലയുമായി ചേര്‍ന്ന് ഇന്ത്യയിൽ വൻതോതിൽ വാക്സിൻ ഉത്പാദിപ്പിക്കാനുള്ള നീക്കത്തിലാണ് ഫൈസര്‍. സ്പുട്നിക് വാക്സിനും ഇന്ത്യയിൽ വൻതോതിൽ ഉത്പാദനം നടത്താനാണ് പദ്ധതി. ഡിസംബര്‍ മാസത്തോടു കൂടി രാജ്യത്ത് എല്ലാവര്‍ക്കും കൊവിഡ് 19 വാക്സിൻ ലഭ്യമാക്കാനുള്ള ശ്രമത്തിലാണ് കേന്ദ്രസര്‍ക്കാര്‍.