‘ഡെൽറ്റ വേരിയൻ്റ്’എന്നറിയപ്പെടും; ഇന്ത്യയിൽ കണ്ടെത്തിയ വൈറസ് വകഭേദത്തിന് പേരിട്ട് WHO

ന്യൂഡൽഹി: ഇന്ത്യയിൽ കൊവിഡ്-19 വ്യാപനം രൂക്ഷമായി തുടരുന്നതിനിടെ രാജ്യത്ത് ആദ്യമായി കണ്ടെത്തിയ കൊറൊണ വൈറസ് വകഭേദത്തിന് പേരിട്ട് ലോകാരോഗ്യ സംഘടന (ഡബ്ല്യുഎച്ച്ഒ). ‘ഡെൽറ്റ വേരിയൻ്റ്‘ എന്ന പേരാണ് ഡബ്ല്യുഎച്ച്ഒ നൽകിയിരിക്കുന്നത്. ഇന്ത്യയിൽ കണ്ടെത്തിയ ബി.1.617 ആണ് ഇനി മുതൽ പുതിയ പേരിലറിയപ്പെടുക.
‘യോഗ ചെയ്യുന്നതിനാൽ കൊവിഡ് വാക്‌സിൻ്റെ ആവശ്യമില്ല’: വീണ്ടും വിവാദവുമായി രാംദേവ്
ഇന്ത്യൻ വകഭേദമില്ലെന്ന കേന്ദ്ര സർക്കാരിൻ്റെ വാദം നിലനിൽക്കെയാണ് ഡബ്ല്യുഎച്ച്ഒയുടെ നിർണായക പ്രഖ്യാപനം. വിഷയത്തിൽ ശക്തമായ നിലപാട് ഇന്ത്യയുടെ ഭാഗത്ത് നിന്നും ഉണ്ടാകുകയും ചെയ്‌തിരുന്നു. രാജ്യത്ത് കണ്ടെത്തിയ വൈറസിന് ഡബ്ല്യുഎച്ച്ഒ പുതിയ പേര് നൽകിയ നടപടിയിൽ ഇന്ത്യൻ സർക്കാർ ഇതുവരെ പ്രതികരണം നടത്തിയിട്ടില്ല.

അതിവേഗം വ്യാപിക്കാൻ കഴിയുന്ന ബി.1.617 വകഭേദം 53 രാജ്യങ്ങളിൽ ഔദ്യോഗികമായി കണ്ടെത്തിയിട്ടുണ്ട്. ഈ വൈറസുമായി ബന്ധപ്പെട്ട പഠനവും നിരീക്ഷണവും തുടരുകയാണ്. മുൻപ് കണ്ടെത്തിയ കൊവിഡ് വകഭേദത്തിന് ‘കാപ്പ’ എന്ന പേരാണ് ഡബ്ല്യുഎച്ച്ഒ നൽകിയിരുന്നത്. വൈറസ് കണ്ടെത്തുന്ന രാജ്യങ്ങളുമായി ബന്ധപ്പെടുന്ന പേരുകൾ പുതിയ വകഭേദത്തിന് നൽകാൻ പാടില്ലെന്ന് ലോകാരോഗ്യ സംഘടന നിർദേശം നൽകിയിരുന്നു.

കേന്ദ്രത്തിനും സംസ്ഥാനത്തിനും രണ്ടുവില എങ്ങനെ വന്നു? വാക്‌സിൻ നയത്തിനെതിരെ സുപ്രീം കോടതി
ഇന്ത്യയിൽ കണ്ടെത്തിയ ജനിതകമാറ്റം സംഭവിച്ച വകഭേദത്തിൽ ആശങ്കയുണ്ടെന്ന ലോകാരോഗ്യ സംഘടനയുടെ പരാമർശത്തിൽ കേന്ദ്രം എതിർപ്പ് പരസ്യമാക്കിയിരുന്നു. ‘ഇന്ത്യൻ വകഭേദം’ എന്ന വിശേഷണമാണ് എതിർപ്പിന് കാരണമായത്. ബ്രിട്ടൻ, ബ്രസീൽ, ദക്ഷിണാഫ്രിക്ക എന്നീ രാജ്യങ്ങളിൽ കണ്ടെത്തിയ വകഭേദങ്ങളിലും ലോകാരോഗ്യ സംഘടന ആശങ്ക പങ്കുവച്ചിരുന്നു. കഴിഞ്ഞ ഒക്ടോബറിലാണ് B.1.617 വൈറസിനെ ആദ്യമായി കണ്ടെത്തിയത്.