അമേരിക്ക ഇന്ത്യക്ക് കൊവിഡ് വാക്സിൻ നൽകും; മോദിയെ ഫോണിൽ വിളിച്ച് കമല ഹാരിസ്

ജൂണ്‍ അവസാനത്തോടെ 80 മില്യണ്‍ ഡോസ്

ജൂണ്‍ അവസാനത്തോടെ 80 മില്യണ്‍ ഡോസ് വാക്സിൻ വിതരണം ചെയ്യുമെന്ന് അമേരിക്ക നേരത്തെ പ്രഖ്യാപിച്ചിരുന്നു. ഐക്യരാഷ്ട്ര സഭയുടെ വാക്സിൻ പങ്കിടൽ പദ്ധതിയുടെ ഭാഗമായാണ് വിദേശ രാജ്യങ്ങളിലേക്ക് വാക്സിൻ കയറ്റി അയക്കുക. പല രാജ്യങ്ങളിലും വാക്സിൻ ക്ഷാമം അനുഭവപ്പെടുന്ന സമയത്ത് തന്നെയാണ് 25 മില്യൺ ഡോസ് വിതരണം ചെയ്യുന്നെന്ന ജോ ബൈഡന്‍റെ പ്രഖ്യാപനം വരുന്നത്.

ആദ്യഘട്ടത്തിൽ 25 മില്യൺ ഡോസ്

ജൂൺ അവസാനത്തോടെ 80 മില്യൺ ഡോസ് കൊവിഡ് വാക്സിൻ വിവിധ രാജ്യങ്ങൾക്ക് വിതരണം ചെയ്യാനാണ് അമേരിക്ക ലക്ഷ്യമിടുന്നത്. ഇതിന്‍റെ ആദ്യപടിയെന്നോണമാണ് 25 മില്യൺ ഡോസ് കൊവിഡ് വാക്സിൻ ആഗോള തലത്തിൽ വിതരണം ചെയ്യുക. നരേന്ദ്ര മോദിക്ക് പുറമേ മെക്സിക്കോ പ്രസിഡന്‍റ് അൻഡ്രസ് മാനുവൽ ലോപസ്, ഗ്വാട്ടിമാല പ്രസിഡന്‍റ് അലജാൻഡ്രോ ജിയാമട്ടി, ട്രിനിഡാഡ് ആൻഡ് ടൊബാഗോ പ്രധാനമന്ത്രി കീത്ത് റൗളി എന്നിവരെയും കമല ഹാരിസ് നേരിട്ട് വാക്സിൻ നൽകുമെന്ന് അറിയിച്ചു.

ആദ്യഘട്ടത്തിൽ ഈ രാജ്യങ്ങൾക്ക്

മെക്സിക്കോ, കാനഡ, റിപ്പബ്ലിക് ഓഫ് കൊറിയ, വെസ്റ്റ് ബാങ്ക്, ഗാസ, ഇന്ത്യ, ഉക്രൈന്‍, കൊസോവോ, ഹെയ്തി, ജോര്‍ജ്ജിയ, ഈജിപ്ത്, ജോര്‍ദ്ദാന്‍, ഇറാഖ്, യെമന്‍ തുടങ്ങിയ രാഷ്ട്രങ്ങള്‍ക്കും യുഎന്നിലെ മുൻനിര പോരാളികൾക്കുമാണ് അമേരിക്ക കൊവിഡ് വാക്സിൻ വിതരണം ചെയ്യുക. ആദ്യഘട്ടത്തിലെ 25 മില്യൺ ജോസിൽ 7 മില്യൺ ഡോസ് വാക്സിൻ ഏഷ്യയിലേക്ക് എത്തുമെന്നാണ് കരുതുന്നത്. 5 മില്യൺ ഡോസ് ആഫ്രിക്കയിലേക്ക് പോകും.

നന്ദി പറഞ്ഞ് നരേന്ദ്ര മോദി

അമേരിക്കൻ വൈസ് പ്രസിഡന്‍റ് കമല ഹാരിസുമായുള്ള ടെലിഫോൺ സംഭാഷണത്തിന് പിന്നാലെ ഇക്കാര്യം പ്രധാനമന്ത്രി നരേന്ദ്ര മോദി ട്വിറ്ററിലൂടെ പങ്കുവെച്ചു. ഇന്ത്യയ്ക്ക് വാക്സിൻ കൈമാറാനുള്ള തീരുമാനത്തെ അഭിനന്ദിക്കുന്നതായും അമേരിക്കയുടെ പിന്തുണയ്ക്കും ഐക്യദാർഢ്യത്തിനും നന്ദി അറിയിക്കുന്നതായും പ്രധാനമന്ത്രി ട്വീറ്റ് ചെയ്തു.

നന്ദി പറഞ്ഞ് മോദി