7 കിലോഗ്രാം സദ്യ, 1 മണിക്കൂറിൽ കഴിക്കണം! വെല്ലുവിളി ഏറ്റെടുക്കുന്നോ?

ചിലർക്ക് ഭക്ഷണത്തോട് അടങ്ങാത്ത ആവേശമായിരിക്കും. ഇതുവരെ കഴിക്കാതെ ഭക്ഷണ വിഭവങ്ങൾ ട്രൈ ചെയ്തുനോക്കാൻ ആയിരിക്കും ചിലർക്ക് ഇഷ്ടം. അതെ സമയം മറ്റു ചിലർക്ക് ഭക്ഷണം എന്തായാലും ഒരു പ്രശ്നമല്ല. ഇത്രയൊക്കെ ഒരു മനുഷ്യന് കഴിക്കാൻ പറ്റുമോ എന്ന് കണ്ട് നിൽക്കുന്നവർക്ക് അത്ഭുതം തോന്നും പോലെയാവും ഇക്കൂട്ടർ ഭക്ഷണം അകത്താക്കുക. ഇക്കൂട്ടർക്കായി ഒരു കിടിലൻ ചലഞ്ചുമായി എത്തിയിരിക്കുകയാണ് ഇംഗ്ലണ്ടിലെ ഇന്ത്യൻ ഹോട്ടലായ ലിലിസ് വെജിറ്റേറിയൻ ഇന്ത്യൻ കുസീൻ.



‘ഗ്രാൻഡ് താലി’ എന്ന് പേരിട്ടിരിക്കുന്ന ചലഞ്ചിൽ 24-ഇഞ്ച് വലിപ്പമുള്ള പത്രത്തിലാണ് അൻപതോളം വിഭവങ്ങൾ വിളമ്പുന്നത്. എല്ലാം കൂടെ ചേർത്താൽ ഏകദേശം 7 കിലോഗ്രാം ഭാരം വരും. ഗ്രെയ്റ്റർ മാഞ്ചസ്റ്ററിൽ പ്രവർത്തിക്കുന്ന ലിലിസ് വെജിറ്റേറിയൻ ഇന്ത്യൻ കുസീൻ ചലഞ്ചിനായി ഒരൊറ്റ കണ്ടീഷൻ മാത്രമേ മുന്നോട്ട് വച്ചിട്ടുള്ളൂ. ഗ്രാൻഡ് താലി ഒരു മണിക്കൂർ കൊണ്ട് കഴിച്ചു തീർക്കണം.

സാദാ ഓംലേറ്റിനോട് പോകാൻ പറ! ഇനി ഫാന്റ ഒഴിച്ച ഓംലെറ്റ് ട്രൈ ചെയ്യാം

35 പൗണ്ട് (ഏകദേശം 3,611 രൂപ) ആണ് ഗ്രാൻഡ് താലിയുടെ വില. എട്ട് തരം റൊട്ടികൾ, മൂന്ന് തരം അരിവിഭവങ്ങൾ, പതിനാറോളം കറികൾ, ആറ് മധുരപലഹാരങ്ങൾ, രണ്ട് തരം ലസ്സി, കൊറിക്കാനുള്ള രണ്ട് വിഭവങ്ങൾ എന്നിവ അടങ്ങുന്നതാണ് ഗ്രാൻഡ് താലി.

ഈ മാസം നാലിന് ലിലിസ് വെജിറ്റേറിയൻ ഇന്ത്യൻ കുസീനിലെ സ്ഥിരം സന്ദർശകരായ 3 പേര് ഗ്രാൻഡ് താലി ചലഞ്ചിൽ പങ്കെടുക്കാൻ മുന്നോട്ടെത്തി. 39-കാരനായ ജോഷ് സാണ്ടേഴ്സ് ഗ്രാൻഡ് താലിയിലെ മൂന്ന് കിലോഗ്രാമോളം ഭക്ഷണം കഴിച്ച ശേഷമാണ് പരാജയം സമ്മതിച്ചത്. അതെ സമയം ടോം ഈസ്താം, ലെയ്‌ഗ് ഡ്രെന്നൻ എന്നിവരും പൊരുതി നോക്കിയെങ്കിലും പരാജയപെട്ടു.

ചോക്ലേറ്റ് ബിരിയാണി കഴിച്ച് റിപ്പോർട്ടർ! ലേശം ഓവറല്ലേ എന്ന് സൈബർലോകം

ചലഞ്ചിൽ പങ്കെടുത്തവർ കഴിക്കാതെ ബാക്കിവരുന്ന ഭക്ഷണം പാഴാക്കുകയാണ് എന്ന വിമർശനം ഉയർന്നപ്പോൾ തന്നെ ലിലിസ് വെജിറ്റേറിയൻ ഇന്ത്യൻ കുസീൻ വിശദീകരണവുമായെത്തി. കഴിച്ചു തീർക്കാൻ കഴിയാത്ത ഭക്ഷണം ചലഞ്ചിൽ പങ്കെടുക്കുന്നവർക്ക് വീട്ടിലേക്ക് കൊണ്ടുപോകാം എന്ന് ഹോട്ടൽ വ്യക്തമാക്കി.