ഓണസദ്യയ്ക്ക് വാഴയിലയിൽ ഇഡ്ഡലിയും ദോശയും, പൊങ്കാലയിട്ട് മലയാളികൾ

മലയാളികളെ സംബന്ധിച്ച് ഓണം വെറും ഒരാഘോഷമല്ല. ഒത്തൊരുമയുടെ ഉത്സവമാണ് ഓണം. ജാതിമതഭേദമന്യേ കേരളത്തിലുള്ള മലയാളികളും കേരളത്തിന് പുറത്തുള്ള മലയാളികളും ഓണം കെങ്കേമമായി ആഘോഷിക്കും. അതുകൊണ്ട് തന്നെ ബ്രാൻഡുകളെ സംബന്ധിച്ച് ഓണം തങ്ങളുടെ ഉത്പന്നങ്ങൾ വൻതോതിൽ വിറ്റഴിക്കാനുള്ള ഒരവസരമാണ്. വമ്പിച്ച ഓഫർ പ്രഖ്യാപിക്കുക മാത്രമല്ല മലയാളത്തനിമ വിളിച്ചോതുന്ന ചിത്രങ്ങൾ പോസ്റ്റ് ചെയ്തും ബ്രാൻഡുകൾ ശ്രദ്ധ പിടിച്ചുപറ്റാൻ ശ്രമിക്കും. ഇത്തരത്തിൽ ഒരു ചിത്രം പോസ്റ്റ് ചെയ്തതതാണ് കോട്ടൺസ് ജയ്‌പൂർ എന്ന വസ്ത്ര ബ്രാൻഡ്. പക്ഷെ പ്രതീക്ഷിച്ച പ്രതികരണമല്ല മലയാളികളിൽ നിന്നും ലഭിച്ചത്.



കസവ് പോലെ തോന്നിപ്പിക്കുന്ന ചുരിദാർ ധരിച്ച് രണ്ട് സ്ത്രീകൾ ഓണസദ്യ കഴിക്കുന്നതാണ് ചിത്രം. അവർ ധരിച്ചിരിക്കുന്ന ഉർവശി & രംഭ കോട്ടൺ കുർത്തയുടെ പ്രചാരണാർത്ഥമാണ് ചിത്രം പോസ്റ്റ് ചെയ്തിരിക്കുന്നത്. ഓണം കളക്ഷന്റെ ഭാഗമായാണ് ഈ വസ്ത്രങ്ങൾ അവതരിപ്പിച്ചിരിക്കുന്നത്. പക്ഷെ അവരുടെ മുൻപിൽ വിളമ്പിയിരിക്കുന്ന സദ്യയാണ് പ്രശ്നം. ചോറും, സാമ്പാറും, പപ്പടവും, അവിയലും എന്നിങ്ങനെ ഓണ സദ്യയിലെ സ്ഥിരം വിഭവങ്ങൾ പലതും ഇല്ല എന്ന് മാത്രമല്ല വിളമ്പിയിരിക്കുന്നത് ദോശയും ഇഡ്ഡലിയും, പോരെ പൂരം. കുറച്ച് പാത്രങ്ങളിലായി ദോശയും ഇഡ്ഡലിയും കഴിക്കാൻ സാമ്പാറും, ചട്നിയും വാഴയിലയിൽ വിളമ്പിയിട്ടുണ്ട്.

7 കിലോഗ്രാം സദ്യ, 1 മണിക്കൂറിൽ കഴിക്കണം! വെല്ലുവിളി ഏറ്റെടുക്കുന്നോ?

ഓണം കളക്ഷൻ എന്ന പേരിൽ തെറ്റായ ചിത്രം പോസ്റ്റ് ചെയ്തതോടെ മലയാളികൾ പൊങ്കാല തുടങ്ങി. ഉടനെ ഇൻസ്റ്റാഗ്രാമിൽ പോസ്റ്റ് ചെയ്ത ചിത്രം കോട്ടൺസ് ജയ്‌പൂർ പിൻവലിച്ചു എങ്കിലും ഫേസ്ബുക്കിൽ പോസ്റ്റ് ചെയ്ത ചിത്രങ്ങൾ പിൻവലിച്ചിട്ടില്ല. നിരവധി പേരാണ് ഒട്ടും പരിശോധിക്കാതെ പോസ്റ്റ് ചെയ്ത ഫോട്ടോയെ വിമർശിക്കുന്നത്.

ജപ്പാൻകാരെ, സൂഷി വിഭവം ഡൽഹിയിൽ എത്താതെ സൂക്ഷിച്ചോ! കാരണം

‘കുറഞ്ഞ പക്ഷം വാഴയില ഇട്ടിരിക്കുന്നത് ശരിയായ വിധമാണ്, സമാധാനം’ എന്നാണ് ഒരാളുടെ കമന്റ്. ‘ഇന്ത്യയുടെ തെക്കേ സംസ്ഥാനങ്ങളെപ്പറ്റി യാതൊരു വിവരവും ഇല്ലാത്തയാളാണ്‌ ചിത്രം തയ്യാറാക്കിയത് എന്ന് വ്യക്തം’ എന്നാണ് മറ്റൊരാളുടെ കമന്റ്. ‘ ഇഡ്ഡലിയ്ക്കും ദോശയ്ക്കും പകരം മീൻ പൊരിച്ചത് വച്ചാലും സാരമില്ലായിരുന്നു. വടക്കൻ കേരളത്തിൽ അത്തരം പതിവുണ്ട്’ എന്നാണ് മൂന്നാമതൊരാളുടെ കമന്റ്. ‘ഇലയിൽ വിളമ്പുന്നത് എല്ലാം സദ്യ അല്ലെന്ന് ആരേലുമൊന്ന് പറഞ്ഞുകൊടുക്കടാ’ നാലാമതൊരാളുടെ കമന്റ്.