വെങ്കയ്യ നായിഡുവിൻ്റെ ബ്ലൂ ടിക്ക് നീക്കി ട്വിറ്റര്‍; ഉപരാഷ്ട്രപതിയ്ക്ക് ഇനി വേരിഫൈഡ് ബാഡ്ജില്ല

ന്യൂഡൽഹി: ഉപരാഷ്ട്രപതി വെങ്കയ്യ നായിഡുവിൻ്റെ ട്വിറ്റര്‍ ഹാൻഡിലിൻ്റെ വേരിഫൈഡ് നീല ടിക്ക് നീക്കം ചെയ്ത് ട്വിറ്റര്‍. വെങ്കയ്യ നായിഡുവിൻ്റെ വ്യക്തിപര അക്കൗണ്ടിൻ്റെ വേരിഫിക്കേറ്റനാണ് ട്വിറ്റര്‍ റദ്ദാക്കിയത്. എന്നാൽ മണിക്കൂറുകൾക്ക് ശേഷം ഹാൻഡിലിൽ നീല ടിക്ക് തിരിച്ചെത്തി. ഉപരാഷ്ട്രപതിയുടെ സെക്രട്ടറിയേറ്റ് കൈകാര്യ ചെയ്യുന്ന ഔദ്യോഗിക ട്വിറ്റര്‍ ഹാൻഡിലിന് ഇപ്പോഴും നീല ടിക്കുണ്ട്.

ഉപരാഷ്ട്രപതിയുടെ വ്യക്തിപര അക്കൗണ്ടിൽ നിന്ന് നീല ടിക്ക് നീക്കം ചെയ്തെന്ന വിവരം അദ്ദേഹത്തിൻ്റെ ഓഫീസ് വാര്‍ത്താ ഏജൻസിയായ എഎൻഐയെ അറിയിക്കുകയാൈയിരുന്നു. നിലവിൽ 13 ലക്ഷത്തോളം ഫോളോവേഴ്സാണ് ഈ അക്കൗണ്ടിനുള്ളത്. എന്നാൽ ഔദ്യോഗിക ഹാൻഡിലിനു പത്തു ലക്ഷത്തിൽ താഴെ മാത്രമാണ് ഫോളോവേഴ്സുള്ളത്. കഴിഞ്ഞ വര്‍ഷം ജൂലൈ 23നാണ് വെങ്കയ്യ നായിഡു തന്‍റെ സ്വകാര്യ അക്കൗണ്ടിൽ അവസാനത്തെ ട്വീറ്റ് ചെയ്തത്.

Also Read: ഇന്നു മുതല്‍ കര്‍ശന നിയന്ത്രണം; യാത്ര ചെയ്യാൻ വേണ്ടതെന്ത്? നിർദേശം ഇങ്ങനെ, ആവശ്യ വസ്‌തുക്കൾ വിൽക്കുന്ന കടകൾ തുറക്കും

പുതിയ ഐടി നിയമങ്ങളുടെ പേരിൽ ട്വിറ്റര്‍ ഉള്‍പ്പെടെയുള്ള സമൂഹമാധ്യമങ്ങളും കേന്ദ്രസര്‍ക്കാരും തമ്മിൽ തര്‍ക്കം നിലനിൽക്കുന്നതിനിടെയാണ് പുതിയ നീക്കമെന്നത് ശ്രദ്ധേയതമാണ്. ഈ വര്‍ഷം ഫെബ്രുവരി 25നാണ് പുതിയ നിയമങ്ങള്‍ പുറത്തു വന്നത്.



എന്താണ് ബ്ലൂ ടിക്ക്?



ഒരു ട്വിറ്റര്‍ ഹാൻഡിൽ ഉപയോഗിക്കുന്നത് അതേ പേരിലുള്ള വ്യക്തി തന്നെയാണെന്ന് സ്ഥിരീകരിക്കുന്ന സാഹചര്യത്തിലാണ് ട്വിറ്റര്‍ ബ്ലൂ ടിക്ക് നല്‍കുന്നത്. പ്രമുഖ നേതാക്കളുടെയും സെലിബ്രിറ്റികളുടെയും അക്കൗണ്ടുകള്‍ക്ക് ട്വിറ്റര്‍ ഉള്‍പ്പെടെയുള്ള സമൂഹമാധ്യമങ്ങള്‍ വേരിഫിക്കേഷൻ നല്‍കുന്നുണ്ട്. കൂടാതെ സര്‍ക്കാര്‍ സ്ഥാപനങ്ങളുടെയും പ്രമുഖ സ്വകാര്യ കമ്പനികളുടെയും ട്വിറ്റര്‍ ഹാൻഡിലുകള്‍ക്കും ബ്ലൂ ടിക്കുണ്ട്.

Also Read: 15 ലക്ഷം ചോദിച്ചു, പിന്മാറാൻ തന്നത് 2 ലക്ഷവും ഫോണും; കെ സുരേന്ദ്രനെതിരെ ആരോപണവുമായി അപരൻ

എന്നാൽ ഒരു വ്യക്തിയുടെയോ സ്ഥാപനത്തിൻ്റെ ബ്ലൂ ടിക്ക് എപ്പോള്‍ വേണമെങ്കിലും നീക്കം ചെയ്യാൻ ട്വിറ്ററിനു അധികാരമുണ്ടെന്നാണ് കമ്പനി വ്യക്തമാക്കുന്നത്.

(പുതുതായി ലഭിച്ച വിവരങ്ങൾ ഉൾപ്പെടുത്തി ഈ റിപ്പോർട്ട് അപ്ഡേറ്റ് ചെയ്തിട്ടുണ്ട്.)