മത്സ്യബന്ധന ബോട്ടുകളിൽ സർക്കാർ ഉദ്യോഗസ്ഥരെ നിയമിക്കണം; ലക്ഷദ്വീപിൽ പുതിയ ഉത്തരവ്

കൊച്ചി: ലക്ഷദ്വീപിലെ എല്ലാ മത്സ്യബന്ധന ബോട്ടുകളിലും സർക്കാർ ഉദ്യോഗസ്ഥരെ നിയമിക്കണമെന്ന് ഉത്തരവ്. സുരക്ഷ വർദ്ധിപ്പിക്കുന്നതിന്റെ ഭാഗമാണ് നീക്കം എന്നാണ് ഔദ്യോഗിക വിശദീകരണം. പോർട്ട് ഡയറക്ടർ സച്ചിൻ ശർമ്മയാണ് ഉത്തരവ് പുറപ്പെടുവിച്ചിരിക്കുന്നത്.

മത്സ്യബന്ധന ബോട്ടുകളിൽ ദ്വീപിലേക്ക് പുറത്തു നിന്നും ആരെങ്കിലും എത്തുന്നുണ്ടോ, മത്സ്യ തൊഴിലാളികൾ ആരെയൊക്കെ ബന്ധപ്പെടുന്നു തുടങ്ങിയ വിവരങ്ങൾ ഉദ്യോഗസ്ഥനിലൂടെ ശേഖരിക്കുകയാണ് ലക്ഷ്യം. ബോട്ടുകൾ നങ്കൂരമിടുന്ന സ്ഥലങ്ങളിൽ സിസിടിവി സ്ഥാപിക്കണമെന്നും നിർദ്ദേശത്തിൽ പറയുന്നു.

നിരാഹാര സമരം തിങ്കഴാഴ്ച; പരമാവധി ജനപങ്കാളിത്തം ഉറപ്പാക്കാൻ സേവ് ലക്ഷദ്വീപ് ഫോറം

കൊച്ചി പോർട്ടിലേതിന് സമാനമായ പരിശോധനകൾ ബേപ്പൂരും മംഗലാപുരത്തും നടത്തണമെന്നും ഉത്തരവിൽ പറയുന്നു. ലക്ഷദ്വീപ് അഡ്മിനിസ്ട്രേറ്റർ പ്രഫുൽ പട്ടേലിന്റെ വിവാദ ഉത്തരവുകൾക്കെതിരെ വ്യാപക പ്രതിഷേധം ഉയരുമ്പോഴാണ് പുതിയ ഉത്തരവ്.

അതേസമയം, ലക്ഷദ്വീപിലെ ഭരണ പരിഷ്കാരങ്ങൾക്കെതിരെ തിങ്കളാഴ്ച നിരാഹാര സമരം നടക്കും. ആളുകൾ സംഘടിക്കുന്നത് നിരീക്ഷിക്കുന്നതിനാണ് പുതിയ നീക്കമെന്നാണ് പ്രദേശവാസികളുടെ ആരോപണം. കൊച്ചിയിൽ നിന്നും മംഗലാപുരത്തേക്ക് ചരക്ക് നീക്കം മാറ്റുന്നത് കിൽത്താൻ, ബിത്ര, കടമത്ത് അടക്കമുള്ള ദ്വീപുകാർക്ക് പണവും സമയവും ലാഭിക്കാൻ സഹായകരമാകുമെന്നാണ് അഡ്മിനിസ്ട്രേഷന്റെ ന്യായീകരണം.