ലേബര്‍ കോടതിയില്‍ കേസുകള്‍ കുറഞ്ഞു
സ്പോണ്സര്ഷിപ്പ് (കഫാല) സമ്പ്രദായം എടുത്തുകളഞ്ഞതും തൊഴിലുടമയുടെ അനുവാദമില്ലാതെ തൊഴിലാളിക്ക് മറ്റൊരു തൊഴിലിലേക്ക് മാറാന്‍ നിബന്ധനകള്‍ക്കു വിധേയമായി അവകാശം നല്‍കുന്നതും ഉള്‍പ്പെടെയുള്ള നിയമപരിഷ്‌കാരങ്ങളിലെ മാറ്റങ്ങളാണ് കേസുകള്‍ ഇത്ര കണ്ട് കുറയ്ക്കാന്‍ സഹായകമായതെന്ന് റിയാദിലെ ലേബര്‍ എക്‌സിക്യൂട്ടീവ് കോടതി തലവന്‍ സുലൈമാന്‍ അല്‍ ദഫസ് അഭിപ്രായപ്പെട്ടു. തൊഴില്‍ പരിഷ്‌ക്കാരങ്ങള്‍ തൊഴിലാളികളും തൊഴിലുടമകളും തമ്മിലുള്ള ബന്ധം ഏറെക്കുറെ ഊഷ്മളമാക്കാന്‍ സഹായകമായി. ലേബര്‍ കോടതികളിലെ കേസുകളിലുണ്ടായ ഗണ്യമായ കുറവ് ഇതിന്റെ പ്രകടമായ തെളിവാണെന്നും അദ്ദേഹം ചൂണ്ടിക്കാട്ടി. നേരത്തേ ലേബര്‍ കോടതികളില്‍ എത്തുന്ന തൊഴില്‍ തര്‍ക്കങ്ങളില്‍ ഏറെയും ഫൈനല്‍ എക്സിറ്റ്, സ്പോണ്സര്ഷിപ്പ് മാറ്റം തുടങ്ങിയവയുമായി ബന്ധപ്പെട്ടവയായിരുന്നു. എന്നാല്‍ അത്തരം കേസുകളുടെ എണ്ണം നാമമാത്രമായി ചുരുങ്ങി.
തൊഴില്‍ പരിഷ്‌ക്കാരം നിലവില്‍ വന്നിട്ട് രണ്ടര മാസം
ഇക്കഴിഞ്ഞ മാര്‍ച്ച് 14 മുതലാണ് സൗദിയിലെ ഒരു കോടിയിലേറെ വരുന്ന വിദേശികള്‍ക്ക് ഗുണകരമാവും വിധം ചരിത്രപരമായ മാറ്റങ്ങളോടെ പുതിയ തൊഴില്‍ നിയമം നിലവില്‍ വന്നത്. കഴിഞ്ഞ നവംബറില്‍ മനുഷ്യ വിഭവ- സാമൂഹിക വികസന മന്ത്രാലയം പ്രഖ്യാപിച്ച പരിഷ്‌ക്കാരങ്ങള്‍ മാര്‍ച്ചില്‍ നടപ്പില്‍ വരുത്തുകയായിരുന്നു. തൊഴിലുടമയും തൊഴിലാളിയും തമ്മിലുള്ള ബന്ധങ്ങള്‍ മെച്ചപ്പെടുത്തുകയും, തൊഴില്‍ വിപണിയിലെ പ്രശ്നങ്ങള്‍ പരിഹരിക്കുകയും ചെയ്യുന്നതിലൂടെ രാജ്യത്തെ തൊഴില്‍ വിപണിയെ സജീവവും ആകര്‍ഷകവുമാക്കുകയെന്നതായിരുന്നു പുതിയ പരിഷ്‌കാരങ്ങളിലൂടെ അധികൃതര്‍ ലക്ഷ്യമിട്ടത്. രണ്ടര മാസത്തിനിടയില്‍ തന്നെ പരിഷ്‌ക്കാരങ്ങളുടെ ഗുണഫലങ്ങള്‍ ലഭ്യമായിത്തുടങ്ങിയതായാണ് അധികൃതരുടെ വിലയിരുത്തല്‍.
ചരിത്രപരമായ നിയമ പരിഷ്‌ക്കാരങ്ങള്‍
തൊഴിലാളികള്‍ക്ക് മേല്‍ തൊഴിലുടമകള്‍ക്കുണ്ടായിരുന്ന നിരവധി നിയന്ത്രണങ്ങള്‍ പുതിയ പരിഷ്‌കാരങ്ങളിലൂടെ എടുത്തു കളഞ്ഞിരുന്നു. ഏഴ് പതിറ്റാണ്ടിലേറെയായി നിലനിന്ന കഫാല സമ്പ്രദായം ഒഴിവാക്കിയതായിരുന്നു അതില്‍ ഏറ്റവും പ്രധാനം. അതോടെ ഒരു സൗദി പൗരന്റെ സ്പോണ്സര്ഷിപ്പ് ഉണ്ടെങ്കില്‍ മാത്രമേ വിദേശികള്‍ക്ക് തൊഴിലില്‍ ഏര്‍പ്പെടാനാവൂ എന്ന നിയമം ഇല്ലാതെയായി. ഇത് സൗദി ജനസംഖ്യയുടെ മൂന്നിലൊന്ന് വരുന്ന പ്രവാസികള്‍ക്ക് വലിയ ആശ്വാസമായി. അതോടൊപ്പം കരാര്‍ കാലാവധി അവസാനിച്ച തൊഴിലാളിക്ക് തൊഴിലുടമയുടെ അനുമതിയില്ലാതെ പുതിയ തൊഴിലിലേക്ക് മാറാനും തൊഴിലുടമയുടെ അനുവാദമില്ലാതെ എക്സിറ്റ്-റീ എന്‍ട്രി വിസയില്‍ നാട്ടില്‍ പോയിവരാനും മറ്റുമുള്ള അവകാശങ്ങളും തൊഴില്‍ രംഗത്ത് വലിയ മാറ്റങ്ങളുണ്ടാക്കിയതായും വിലയിരുത്തപ്പെടുന്നു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : saudi government has granted more rights to workers
Malayalam News from malayalam.samayam.com, TIL Network
