മോഹൻ ഭാഗവതിന്റെ ബ്ലൂ ടിക്ക് പുനസ്ഥാപിച്ച് ട്വിറ്റ‍ര്‍; ട്വീറ്റുകൾ നീക്കം ചെയ്തു?

ന്യൂഡൽഹി: ആർഎസ്എസ് മേധാവി മോഹൻ ഭാഗവതിന്റെ അക്കൗണ്ട് വെരിഫിക്കേഷൻ ചിഹ്നമായ ബ്ലൂ ടിക്ക് ട്വിറ്റ‍ര്‍ പുനഃസ്ഥാപിച്ചു. ആ‍ര്‍എസ്എസ് ജനറൽ സെക്രട്ടറി കൃഷ്ണ ഗോപാൽ അടക്കമുള്ളവരുടെ വേരിഫിക്കേഷൻ ചിഹ്നവും പുനഃസ്ഥാപിച്ചിട്ടുണ്ട്. എന്നാൽ മോഹൻ ഭാഗവതിന്റെ ട്വീറ്റുകൾ നീക്കം ചെയ്തതായാണ് കാണുന്നത്. മുൻ ട്വീറ്റുകളൊന്നും അദ്ദേഹത്തിന്റെ അക്കൗണ്ടുകളിൽ കാണ്മാനില്ല.

ശനിയാഴ്ച രാവിലെ മുതലാണ് ആ‍ര്‍എസ്എസ് നേതാക്കളുടെ ബ്ലൂ ടിക്ക് നീക്കം ചെയ്തു തുടങ്ങിയത്. ആർഎസ്എസ് മേധാവി മോഹൻ ഭാഗവത്, ജോയിൻ്റ് ജനറൽ സെക്രട്ടറി കൃഷ്‌ണ ഗോപാൽ, അരുൺ കുമാർ, മുൻ ജനറൽ സെക്രട്ടറി സുരേഷ് ഭയ്യാജി ജോഷി, സമ്പർക്ക് പ്രമുഖ് അനിരുദ്ധ് ദേശപാണ്ഡെ എന്നിവരുടെ അക്കൗണ്ടുകളുടെ ബ്ലൂ ടിക്കാണ് നീക്കം ചെയ്തത്.

ആർഎസ്എസ് നേതാക്കളുടെ അക്കൗണ്ടുകൾക്കെതിരെ കൂട്ട നടപടി; മോഹൻ ഭാഗവതിൻ്റെ ബ്ലൂ ടിക്ക് നീക്കി ട്വിറ്റർ

ഉപരാഷ്ട്രപതി വെങ്കയ്യ നായിഡുവിന്റെ ബ്ലൂ ടിക്ക് നേരത്തെ നീക്കം ചെയ്തിരുന്നു. എന്നാൽ പിന്നീട് പുനഃസ്ഥാപിച്ചു. ആറ് മാസത്തോളം ഉപയോഗിക്കാതിരുന്നതിനെ തുടർന്നാണ് അക്കൗണ്ടിൻ്റെ ബ്ലൂ ടിക്ക് നീക്കം ചെയ്‌തതെന്ന് ഉപരാഷ്‌ട്രപതിയുടെ ഓഫീസ് അറിയിച്ചു.

അക്കൗണ്ടുകൾ ഉപയോഗിക്കാത്തിനെ തുടർന്നാണ് ബ്ലൂ ടിക്ക് നീക്കം ചെയ്‌തതെന്നാണ് റിപ്പോർട്ടുകൾ. അക്കൗണ്ട് ഉപയോഗിക്കാത്തത് ബ്ലൂ ടിക്ക് നീക്കം ചെയ്യുന്നതിന് കാരണമാകുമെങ്കിൽ ഇക്കാര്യം അറിയിക്കേണ്ടതായിരുന്നുവെന്നാണ് ആ‍ര്‍എസ്എസ് പ്രതികരിച്ചത്.