ഇന്ത്യയില്‍ നിന്ന് ബഹ്റൈനിലേക്ക് പോകുന്നതിന് പുതിയ മാര്‍ഗ്ഗ നിര്‍ദേശങ്ങള്‍ പുറത്തിറക്കി എയർ ഇന്ത്യ എക്സ്പ്രസ്. ഇന്ത്യയെ റെഡ് ലിസ്റ്റില്‍ നിന്ന് മാറ്റിയ സാഹചര്യത്തിലാണ് പുതിയ നിർദേശങ്ങൾ അധിക‍ൃതര്‍ പുറപ്പെടുവിച്ചരിക്കുന്നത്. സെപ്റ്റംബർ മൂന്നുമുതലാണ് നിയന്ത്രണങ്ങളിൽ നിന്ന് ഇന്ത്യയെ ബഹ്റൈന്‍ ഒഴിവാക്കാൻ തീരുമാനിച്ചത്. ബഹ്റൈനിൽ റസിഡൻസ് പെർമിറ്റുള്ളവർ, ബഹ്റൈനി പൗരന്മാർ ബോർഡിങ്ങിന് മുമ്പ് വിസ ലഭിച്ച ഇന്ത്യക്കാർ , വർക്ക് വിസ, വിസിറ്റ് വിസ, ഇ-വിസ തുടങ്ങിയവ ഉള്‍പ്പെടും ഇവയില്‍ ഏതെങ്കില്‍ ഒന്ന് കെെവശമുള്ളവര്‍ക്ക് ബഹ്റൈനിലേക്ക് വരാം.

​ആ​പ്പി​ലെ ഗ്രീ​ൻ ഷീ​ൽ​ഡ്​​ കാ​ണി​ക്ക​ണം

ജിസിസി രാജ്യങ്ങളില്‍ നിന്ന് പൂർണമായി വാക്സിൻ സ്വീകരിച്ചവർക്ക് ടെസ്റ്റിന്‍റെ ആവശ്യമില്ല. എന്നാല്‍ മൊബൈൽ ആപ്പിലെ ഗ്രീൻ ഷീൽഡ് കാണിക്കണം. ബഹ്റൈനില്‍ നിന്ന് രണ്ടാം ഡോസ് വാക്സിന്‍ സ്വീകരിച്ച് 14 ദിവസം കഴിഞ്ഞവരെയാണ് പൂര്‍ണ്ണമായും വാക്സിൻ സ്വീകരിച്ചവരായി കണക്കാക്കുന്നത്. വാക്സിൻ സ്വീകരിക്കാത്തവരും ഇന്ത്യയിൽ നിന്ന് വാക്സിൻ സ്വീകരിച്ചവരും 72 മണിക്കൂറിനുള്ളിൽ നടത്തിയ ആർടിപിസിആർ നെഗറ്റിവ് സർട്ടിഫിക്കറ്റ് ഹാജരാക്കണം. ക്യൂആർ കോഡ് ഉള്ള സര്‍ട്ടിഫിക്കറ്റ് ആണ് ഹാജറാക്കേണ്ടത്. അധികൃതര്‍ ഇത് സ്കാന്‍ ചെയ്യും. ഓണ്‍ലെെനിലെ റിപ്പോര്‍ട്ടും കൗണ്ടറിൽ കാണിക്കുന്ന പിഡിഎഫ് റിപ്പോർട്ടും ഒരുപോലെ ആയിരിക്കണം.

​ബ​ഹ്​​റൈ​നി​ൽ എ​ത്തി​യാ​ൽ ചെയ്യേണ്ടത്

ബഹ്റൈനിൽ എത്തിയാൽ വിമാനത്താവളത്തിൽ വെച്ച് കൊവിഡ് പരിശോധ നടത്തണം. കൂടാതെ അഞ്ചാമത്തെ ദിവസവും പത്താമത്തെ ദിവസവും കൊവിഡ് പരിശോധന നടത്തണം. വാക്സിൻ സ്വീകരിച്ചവരും സ്വീകരിക്കാത്തവരും പരിശോധന നടത്തണം. ആറ് വയസ്സില്‍ താഴെയുള്ള കുട്ടികള്‍ക്ക് പരിശോധന ആവശ്യമില്ല. മൂന്നു പരിശോധനക്കുമായി 36 ദീനാറാണ് ഫീസ് വരുന്നത്. ഇത് മുൻകൂട്ടി അടക്കുകയോ വിമാനത്താവളത്തിലെ കിയോസ്കിൽ അടക്കുകയോ ചെയ്യാം. ആവശ്യമായ തുക യാത്രക്കാര്‍ തന്നെ കയ്യില്‍ കരുതണം. വാക്സിൻ സ്വീകരിക്കാത്തവരും ഇന്ത്യയിൽനിന്ന് വാക്സിൻ സ്വീകരിച്ചവര്‍ക്കും 10 ദിവസത്തെ ക്വാറൻറീനിൽ അത്യാവശ്യമാണ്. താമസ സ്ഥലത്തോ നാഷനൽ ഹെൽത്ത് റെഗുലേറ്ററി അതോറിറ്റി (എൻ.എച്ച്.ആർ.എ) അംഗീകൃത ഹോട്ടലിലോ ആയിരിക്കണം ക്വാറൻറീൻ കഴിയേണ്ടത്.

​കൊവിഡ് പരിശോധനകളുടെ എണ്ണം 60 ലക്ഷം കടന്നു

ബഹ്‌റൈനില്‍ കൊവിഡ് കേസുകളുടെ എണ്ണം കുറവാണ്. കൊവിഡ് പരിശോധനകളുടെ എണ്ണം 60 ലക്ഷം കടന്നു. തുടക്കം മുതല്‍ ഇതുവരെയുള്ള കണക്ക് ആണ് അധികൃതര്‍ ഇപ്പോള്‍ പുറത്തുവിട്ടിരിക്കുന്നത്. 60 ലക്ഷം പിസിആര്‍ പരിശോധനകള്‍ ആണ് രാജ്യത്ത് നടത്തിയത്. കിരീടാവകാശി ,ഹമദ് രാജാവ്, എന്നിവരുടെ നേതൃത്വത്തില്‍ രൂപികരിച്ച കൊവിഡ് പ്രതിരോധത്തിനായുള്ള നാഷണല്‍ ടാസ്‌ക് ഫോഴ്‌സിന്റെ പരിശ്രമങ്ങളുടെ ഫലമായാണ് ഈ നേട്ടം. എല്ലാവരും മുന്‍ കരുതല്‍ നടപടികള്‍ സ്വീകരിക്കണമെന്നും വാക്‌സിനും ബൂസ്റ്റര്‍ ഡോസുകളും സ്വീകരിക്കാന്‍ മുന്നോട്ടുവരണം എന്നും അധികൃതര്‍ ജനങ്ങളോട് അഭ്യര്‍ത്ഥിച്ചു.