സിഐടിയുവിനെ പഴിചാരരുത്; ഐഎസ്ആര്‍ഓയുടെ ഭീമൻ യന്ത്രത്തിനു നോക്കൂകൂലി ചോദിച്ചതിൽ പങ്കില്ലെന്ന് സംഘടന

തിരുവനന്തപുരം: ഐഎസ്ആര്‍ഓയ്ക്കായി എത്തിച്ച ഭീമൻ ഉപകരണം ഇറക്കാൻ നോക്കുകൂലി ആവശ്യപ്പെട്ടതുമായി വിവാദത്തിൽ പ്രതികരിച്ച് സിഐടിയു. സംഘടനയ്ക്ക് ഈ വിവാദത്തിൽ പങ്കില്ലെന്നും എന്നാൽ ചില മാധ്യമങ്ങള്‍ സിഐടിയുവിനെ മനഃപൂര്‍വം പഴിചാരാൻ ശ്രമിക്കുകയാണെന്നും സിഐടിയു വ്യക്തമാക്കി. സിഐടിയു ജില്ലാ പ്രസിഡൻ്റ് ആര്‍ രാമുവും സെക്രട്ടറി സി ജയൻ ബാബുവുമാണ് ഇക്കാര്യം വ്യക്തമാക്കിയത്.



പ്രദേശവാസികളെന്ന് അവകാശപ്പെടുന്ന ചില സ്വതന്ത്ര യൂണിയൻകാരാണ് സ്ഥലത്ത് അമിതമായി കൂലി ആവശ്യപ്പെട്ട് പ്രശ്നമുണ്ടാക്കിയതെന്ന് സിഐടിയു വ്യക്തമാക്കി. ഈ പ്രദേശത്ത് സിഐടിയു പ്രവര്‍ത്തകര്‍ ജോലി ചെയ്യുന്നില്ലെന്നും ഇത് ആര്‍ക്കു വേണമെങ്കിലും അന്വേഷിച്ചു ബോധ്യപ്പെടാമെന്നും സിഐടിയു ജില്ലാ കമ്മിറ്റി പുറത്തിറക്കിയ പ്രസ്താവനയിൽ വ്യക്തമാക്കി. പ്രശ്നപരിഹാരത്തിനായി എത്തിയ തൊഴിൽ വകുപ്പ് ഉദ്യോഗസ്ഥര്‍ക്കും വാസ്തവം അറിയാമെന്നും സിഐടിയു വ്യക്തമാക്കി.

Also Read: ‘പാലായിലെ തോൽവിക്ക് പിന്നിൽ തങ്ങളുടെ വീഴ്ചയും, കേരള കോൺഗ്രസ് വന്നത് മുന്നണിക്ക് നേട്ടമായി’; സിപിഎം അവലോകന റിപ്പോർട്ട്



തുമ്പ വിക്രം സാരാഭായ് ബഹിരാകാശ നിലയത്തിലേയ്ക്ക് വിൻഡ് ടണൽ പദ്ധതിയ്ക്കായി എത്തിച്ച കൂറ്റൻ ഉപകരണം ഇറക്കുന്നതിനു നോക്കുകൂലി വേണമെന്ന് ആവശ്യപ്പെട്ടാണ് പ്രദേശവാസികളായ നിരവധി പേര്‍ തമ്പടിച്ചത്. ടൺകണക്കിന് ഭാരം വരുന്ന ഉപകരണം യന്ത്രം ഉപയോഗിച്ചാണ് ഇറക്കുന്നത് എന്നതിനാൽ പ്രദേശവാസികളായ തൊഴിലാളികള്‍ക്ക് നോക്കുകൂലി വേണമെന്നായിരുന്നു ആവശ്യം. ഇവര്‍ 20 ലക്ഷം രൂപയോളം ഈ ഇനത്തിൽ ആവശ്യപ്പെട്ടെന്നാണ് റിപ്പോര്‍ട്ടുകള്‍. എന്നാൽ ഇതിനു പിന്നിൽ സിഐടിയുവാണെന്നു റിപ്പോര്‍ട്ടുകള്‍ വന്നിരുന്നു.

ചുമട്ടു തൊഴിൽ മേഖലയിൽ നടക്കുന്ന തെറ്റായ പ്രവര്‍ത്തനങ്ങളുടെ മൊത്തം ഉത്തരവാദിത്തം സിഐടിയുവിൻ്റെ മേൽ കെട്ടിവെക്കാനുള്ള ശ്രമമാണ് നടക്കുന്നതെന്നും ഇത് അവസാനിപ്പിക്കണമെന്നും ജില്ലാ കമ്മിറ്റി ആവശ്യപ്പെട്ടു. സിഐടിയുവിന് അമിതകൂലി, നോക്കുകൂലി എന്നിവയോടു വിട്ടുവീഴ്ചയില്ലാത്ത സമീപനമാണ് ഉള്ളതെന്നും ജില്ലാ കമ്മിറ്റി വ്യക്തമാക്കി. തൊഴിൽ ദാതാക്കളോടു മാന്യമായി പെരുമാറണമെന്നാണ് സിഐടിയുവിൻ്റെ കര്‍ശന നിലപാട്. എന്നാൽ മറ്റാരെങ്കിലും തെറ്റായ പ്രവണതകള്‍ കൈക്കൊണ്ടാൽ ഇതിൻ്റെ ഉത്തരവാദിത്തം സിഐടിയുവിൻ്റെ മേൽ കെട്ടിവെക്കുന്നതിൽ കടുത്ത പ്രതിഷേധം രേഖപ്പടുത്തുന്നുവെന്നും സംഘടന വ്യക്തമാക്കി.

Also Read: പഞ്ച്ഷീർ കീഴടക്കാൻ താലിബാന് പാക് സഹായം? പാക് വ്യോമസേന ബോംബിട്ടെന്ന് റിപ്പോർട്ട്

ഇന്നലെ രാവിലെയായിരുന്നു തുമ്പ ഐസ്ആര്‍ഓ കവാടത്തിനു മുന്നിൽ നാടകീയ സംഭവങ്ങള്‍ അരങ്ങേറിയത്. മുംബൈയിൽ നിന്ന് 184 ടൺ ഭാരം വരുന്ന ഉപകരണവുമായി എത്തിച്ച ട്രെയിലര്‍ ഒരു സംഘം ആളുകള്‍ തടഞ്ഞിടുകയായിരുന്നു. കൊല്ലം തുറമുഖം വരെ കടൽ മാര്‍ഗം എത്തിച്ച ഉപകരണം തുമ്പയിലേയ്ക്ക് ഏറെ ദിവസമെടുത്താണ് കൊണ്ടുവന്നത്. വാഹനമെത്തിയതിനു പിന്നാലെ സ്ഥലത്ത് നിരവധി പേര്‍ തടിച്ചു കൂടിയതോടെ സംഘര്‍ഷാവസ്ഥ രൂപപ്പെട്ടു. ഉടൻ തന്നെ പോലീസും സ്ഥലത്തെത്തി.

ഒരു ടൺ ചരക്കിറക്കാൻ 2000 രൂപ എന്ന കണക്കിൽ നോക്കുകൂലി വേണമെന്നാണ് പ്രദേശവാസികള്‍ ആവശ്യപ്പെട്ടതെന്നാണ് വിഎസ്എസ്‍സി അധികൃതര്‍ വ്യക്തമാക്കുന്നത്. സംഭവം നിയന്ത്രിക്കാൻ കഴിയതെ വന്നതോടെ തൊഴിൽമന്ത്രി വി ശിവൻകുട്ടി അടക്കമുള്ളവരും വിഷയത്തിൽ ഇടപെട്ടു. അതേസമയം, വാഹനം തടയുകയും ഞായറാഴ്ച ലോക്ക് ഡൗൺ ലംഘിച്ച് പരിസരത്ത് തടിച്ചു കൂടുകയും ചെയ്ത അൻപതോളം പേര്‍ക്കെതിരെ പോലീസ് കേസെടുത്തിട്ടുണ്ട്. അന്യായമായി സംഘം ചേര്‍ന്നതിനും ഔദ്യോഗിക വാഹനം തടഞ്ഞതിനുമാണ് കേസ്.