Sumayya P | Samayam Malayalam | Updated: 06 Jun 2021, 04:29:12 PM
തീര്‍ഥാടകര്‍ക്കുള്ള നിര്‍ദ്ദേശങ്ങള്‍ നല്‍കാനും ഖുര്‍ആന്‍ പാരായണത്തിനും മറ്റും ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്തോടെ പ്രവര്‍ത്തിക്കുന്ന റോബോട്ടുകളെ ഉപയോഗപ്പെടുത്തും.
റോബോട്ടുകളെ ഉപയോഗപ്പെടുത്തും
തിരക്കുകള്‍ കുറയ്ക്കാനും തീര്‍ഥാടനവുമായി ബന്ധപ്പെട്ട കര്‍മങ്ങള്‍ നിയന്ത്രിക്കാനും തീര്‍ഥാടകരുടെ പോക്കുവരവുകള്‍ ക്രമീകരിക്കാനും മനുഷ്യവിഭവത്തിന്റെ ഉപയോഗം പരമാവധി കുറയ്ക്കുമെന്ന് ഹജ്ജ് ഉംറ കാര്യ മന്ത്രാലയം അറിയിച്ചു. പകരം ഇതിനായി റോബോട്ടുകളുടെ സഹായം തേടും. തീര്‍ഥാടകര്‍ക്കുള്ള നിര്‍ദ്ദേശങ്ങള്‍ നല്‍കാനും ഖുര്‍ആന്‍ പാരായണത്തിനും മറ്റും ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്തോടെ പ്രവര്‍ത്തിക്കുന്ന റോബോട്ടുകളെ ഉപയോഗപ്പെടുത്തും. തീര്‍ഥാടകരുടെ യാത്രയും കംപ്യൂട്ടര്‍ വഴി നിയന്ത്രിക്കും. കഅബയ്ക്ക് ചുറ്റുമുള്ള പ്രദക്ഷിണം (ത്വവാഫ്), സഫ, മര്‍വ എന്നിവയ്ക്കിടയിലെ വേഗത്തിലുള്ള നടത്തം, അറഫയില്‍ നില്‍ക്കല്‍ തുടങ്ങി ഓരോ തീര്‍ഥാടകന്റെയും ഓരോ നീക്കവും സാങ്കേതികവിദ്യയുടെ സഹായത്തോടെ നിയന്ത്രിക്കുമെന്നും അധികൃതര്‍ അറിയിച്ചു.
ഇത്തവണ വിദേശികള്‍ക്കും അവസരം നല്‍കും
കഴിഞ്ഞ വര്‍ഷത്തില്‍ നിന്ന് വ്യത്യസ്തമായി ഇത്തവണത്തെ ഹജ്ജ് വിദേശത്തു നിന്ന് എത്തുന്നവര്‍ക്കുകൂടി അവസരം നല്‍കി നിയന്ത്രിതമായ രീതിയില്‍ സംഘടിപ്പിക്കാന്‍ സൗദി ഭരണകൂടം നേരത്തേ തീരുമാനമെടുത്തിരുന്നു. വിദേശത്തു നിന്ന് വരുന്ന 45,000 പേരും സൗദിയിലെ താമസക്കാരായ 15,000 പേരും ഉള്‍പ്പെടെ 60,000 തീര്‍ഥാടകരെ മാത്രം സംഘടിപ്പിച്ച് ഹജ്ജ് കര്‍മം നടത്താനാണ് സൗദി ആരോഗ്യ മന്ത്രാലയം ആലോചിക്കുന്നത്. അതേസമയം, കൊവിഡ് നിയന്ത്രണങ്ങളുടെ ഭാഗമായി 18നും 60നും ഇടയില്‍ പ്രായമുള്ളവര്‍ക്ക് മാത്രമേ ഇത്തവണ ഹജ്ജിന് അനുമതി നല്‍കൂ. മാത്രമല്ല ഹജ്ജിന് എത്തുന്നവര്‍ പൂര്‍ണ ആരോഗ്യവാന്‍മാര്‍ ആയിരിക്കണം.
കൊവിഡ് നിയന്ത്രണങ്ങള്‍ പാലിക്കണം
വിദേശത്ത് നിന്ന് ഹജ്ജിനെത്തുന്നവര്‍ കൊവിഡ് പ്രതിരോധത്തിന്റെ ഭാഗമായി നടപ്പിലാക്കിയ നിയന്ത്രണങ്ങള്‍ പാലിക്കണം. വാക്സിനേഷനും ക്വാറന്റൈനും പിസിആര്‍ പരിശോധനയും നിര്‍ബന്ധമാണ്. സൗദി ആരോഗ്യ മന്ത്രാലയം അംഗീകരിച്ച വാക്സിന്‍ സ്വീകരിച്ചവര്‍ക്കു മാത്രമേ അനുമതി ലഭിക്കൂ. കഴിഞ്ഞ ചെറിയ പെരുന്നാളിന് മുമ്പായി ഒന്നാം ഡോസ് എടുത്തിരിക്കണം. രണ്ടാം ഡോസ് എടുത്ത ശേഷം 14 ദിവസം പിന്നിട്ടവര്‍ക്ക് മാത്രമേ പ്രവേശനം അനുവദിക്കൂ. വാക്സിനെടുത്ത തീയതികള്‍ ഉള്‍പ്പെടെ വ്യക്തമാക്കുന്ന വാക്സിനേഷന്‍ സര്‍ട്ടിഫിക്കറ്റ് ഹാജരാക്കിണമെന്നും വ്യവസ്ഥയുണ്ട്. വിദേശത്തു നിന്നെത്തുന്ന തീര്‍ഥാടകര്‍ സൗദിയിലെത്തിയ ഉടന്‍ മൂന്ന് ദിവസത്തെ ക്വാറന്റീനും നിര്‍ബന്ധമാണ്. ഇതിനു വേണ്ട താമസ സൗകര്യം മുത്വവ്വഫ് ഒരുക്കിയിരിക്കണം. മൂന്നാം ദിവസം കൊവിഡ് പിസിആര്‍ പരിശോധന നടത്തി നെഗറ്റീവാണെന്ന് ഉറപ്പാക്കുകയും വേണം.
മക്കയിലേക്കുള്ള പ്രവേശനത്തില്‍ നിയന്ത്രണം
സാമൂഹിക അകലം പാലിക്കാനുള്ള സൗകര്യം പരിഗണിച്ച് വ്യത്യസ്ത ബാച്ചുകളായി മാത്രമേ മക്കയിലേക്കും അവിടെ നിന്ന് തീര്‍ഥാടന കേന്ദ്രങ്ങളിലേക്കും പ്രവേശനം അനുവദിക്കൂ. ഓരോ തീര്‍ഥാടകനും മക്കയില്‍ എത്തിച്ചേരേണ്ട സമയം, ഗേറ്റ് തുടങ്ങിയവ മുന്‍കൂട്ടി എസ്എംഎസ്സായി അറിയിക്കും. അതിനനുസരിച്ച് മാത്രമേ അകത്തുകടക്കാനാവൂ. തീര്‍ഥാടകര്‍ക്കുള്ള താമസ സൗകര്യങ്ങള്‍ ആരോഗ്യ നിബന്ധനകള്‍ പാലിച്ചുള്ളവ ആയിരിക്കണം. താമസ സ്ഥലങ്ങളിളിലും ഭക്ഷണ ഹാളുകളിലും ആളുകള്‍ ഒരുമിച്ച് കൂടുന്നത് ഒഴിവാക്കണം. ഇരു ഹറമുകളിലേക്ക് ഭക്ഷണം കൊണ്ടുവരുന്നതിനും വിലക്കുണ്ട്. തമ്പുകളും പരിശോധന സ്ഥലങ്ങളും അണുവിമുക്തമാക്കി നവീകരിക്കണം. തീര്‍ഥാടകരുടെ ബാഗുകളും അവ കൊണ്ടുപോകുന്ന വാഹനങ്ങളും ഇടയ്ക്കിടെ അണുവിമുക്തമാക്കുന്നതിനും സംവിധാനം ഏര്‍പ്പെടുത്തിയിട്ടുണ്ട്. തീര്‍ഥാടനവുമായി ബന്ധപ്പെട്ട കൂടുതല്‍ നിര്‍ദ്ദേശങ്ങള്‍ ഉടന്‍ പുറത്തിറക്കുമെന്നും അധികൃതര്‍ അറിയിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : covid-19 saudi arabia plans digital hajj
Malayalam News from malayalam.samayam.com, TIL Network
