യോഗ്യതാ റൗണ്ടിലെ ഇന്ത്യയുടെ ആദ്യ വിജയം; ആര്‍പ്പുവിളിച്ച് മലയാളികള്‍ ഉള്‍പ്പെടെയുള്ള കാണികള്‍

ദോഹ: ലോക കപ്പ് യോഗ്യതാ റൗണ്ടില്‍ ഇന്ത്യക്ക് ആദ്യ ജയം. ദോഹയിലെ ജാസിം ബിന്‍ ഹമദ് സ്റ്റേഡിയത്തില്‍ നടന്ന ആവേശകരമായ മല്‍സരത്തില്‍ അയല്‍ രാജ്യമായ ബംഗ്ലാദേശിനെ ഇന്ത്യ എതിരില്ലാത്ത രണ്ട് ഗോളുകള്‍ക്ക് പരാജയപ്പെടുത്തി. ആദ്യാവസാനം വരോടെ കളിച്ച ഇന്ത്യ കളിയുടെ 79ാം മിനിറ്റിലും ഇഞ്ചുറി ടൈമിലുമാണ് രണ്ട് ഗോളുകള്‍ നേടിയത്. നായകന്‍ സുനില്‍ ഛെത്രി തന്നെയായിരുന്നു ഇന്ത്യക്കു വേണ്ടി ഇരട്ട ഗോള്‍ സ്വന്തമാക്കിയത്.

മല്‍സരത്തിന്റെ ആദ്യപകുതിയില്‍ ഇന്ത്യയുടെ കൈയിലായിരുന്നു കളിയെങ്കിലും ബംഗ്ലാദേശിന്റെ പ്രതിരോധത്തില്‍ വിള്ളല്‍ വീഴ്ത്താന്‍ ഇന്ത്യയ്ക്കായില്ല. 35-ം മിനുട്ടില്‍ ചിങ്കളസേനയുടെ ഗോളാകുമെന്നുറച്ച ഒരു ഉഗ്രന്‍ ഹെഡര്‍ ക്ലിയര്‍ ചെയ്യപ്പെടുകയായിരുന്നു. രണ്ടാം പകുതിയില്‍ ആക്രമണം ശക്തമാക്കിയ ഇന്ത്യയ്ക്ക് 79ാം മിനുട്ടിലാണ് ശ്വാസം നേരെ വീണത്. മികച്ചൊരു ഹെഡറിലൂടെ സുനില്‍ ഛെത്രി ബംഗ്ലാദേശ് വല കുലുക്കുകയായിരുന്നു. ആദ്യ ഗോള്‍ വീണതോടെ പതറിപ്പോയ ബംഗ്ലാദേശി പ്രതിരോധനിരയുടെ അമ്പരപ്പ് മാറും മുമ്പെ 36കാരനായ സുനില്‍ ഛെത്രിയുടെ ഒരു വലംകാല്‍ ഷോട്ട് ഗോളിയെ നിസ്സഹയനാക്കി പോസ്റ്റിന്റെ ഇടതു മൂല ലക്ഷ്യമാക്കി കുതിക്കുകയായിരുന്നു.

Also Read: ഇരട്ടഗോളടിച്ച് നായകൻ സുനിൽ ഛേത്രി; ബംഗ്ലാദേശിനെ തകർത്ത് ഇന്ത്യ

ഇതോടെ ഏഴ് മല്‍സരങ്ങളില്‍ മൂന്ന് സമനിലയും ഒരു ജയവുമായി ആറു പോയിന്റുകളോടെ ഇന്ത്യ ഗ്രൂപ്പ് ഇ-യില്‍ മൂന്നാം സ്ഥാനത്തെത്തി. 2022 ലോക കപ്പ് യോഗ്യത നേടാനുള്ള സാധ്യത ഇതിനകം അവസാനിച്ച ഇന്ത്യക്ക് 2023 ഏഷ്യന്‍ കപ്പ് യോഗ്യതാ മല്‍സരത്തിലേക്ക് പ്രവേശനം കിട്ടണമെങ്കില്‍ ആദ്യ മൂന്ന് സ്ഥാനങ്ങളിലെത്തണം. ജൂണ്‍ 15ന് അഫ്ഗാനിസ്താനുമായാണ് ഇന്ത്യയുടെ അടുത്ത മല്‍സരം. നിലവില്‍ ഖത്തറാണ് ഗ്രൂപ്പ് ഇയില്‍ ഒന്നാമത്. അഞ്ചു മല്‍സരങ്ങളില്‍ നിന്ന് 12 പോയിന്റുകള്‍ നേടിയ ഒമാന്‍ രണ്ടാം സ്ഥാനത്താണ്. ആറ് മല്‍സരങ്ങളില്‍ നിന്ന് അഞ്ചു പോയിന്റുമായി അഫ്ഗാനിസ്താന്‍ നാലാമതും ഏഴു മല്‍സരങ്ങളില്‍ നിന്ന് രണ്ടു പോയിന്റുമായി ബംഗ്ലാദേശ് അഞ്ചാമതുമാണ്.

ഏഷ്യന്‍ ചാംപ്യന്‍മാരായ ഖത്തറിനോട് 10 പേരുമായി പൊരുതിക്കളിച്ച് ഒരു ഗോള്‍ മാത്രം വഴങ്ങിയ ശേഷം, ബംഗ്ലാദേശിനെതിരായ കളിയില്‍ പൂര്‍ണ മേധാവിത്തം ഇന്ത്യയ്ക്കായിരുന്നു. ഒരു ഘട്ടത്തില്‍ പോലും കളിയില്‍ മേല്‍ക്കൈ നേടാന്‍ ഇന്ത്യ എതിരാളികളെ അനുവദിച്ചില്ല. മലയാളികള്‍ ഉള്‍പ്പെടെയുള്ള കാണികളാവട്ടെ മികച്ച പിന്തുണയാണ് ഇന്ത്യക്ക് നല്‍കിയത്. ലോകകപ്പ് യോഗ്യതാ റൗണ്ടിലെ ഇന്ത്യയുടെ ആദ്യ വിജയത്തിന് സാക്ഷികളായതിന്റെ ആവേശത്തിലായിരുന്നു ഗ്യാലറിയും.