കേന്ദ്രത്തിൻ്റെ വിരട്ടലിൽ ട്വിറ്റർ വഴങ്ങി; പുതിയ ഐടി നിയമം പാലിക്കും, സമയം ചോദിച്ച് കമ്പനി

ന്യൂഡൽഹി: കേന്ദ്ര സർക്കാരിൻ്റെ അന്ത്യശാസനം ഉണ്ടായതിന് പിന്നാലെ ഇന്ത്യയിലെ പുതിയ ഐടി നിയമങ്ങളോട് സഹകരിക്കാൻ തയ്യാറാണെന്ന് ട്വിറ്റർ. ഇക്കാര്യം അധികൃതർ കേന്ദ്രത്തെ അറിയിച്ചു. എന്നാൽ കുറച്ച് സമയം കൂടി അനുവദിക്കണമെന്ന് ആവശ്യപ്പെട്ടിട്ടുണ്ടെന്ന് ദേശീയ മാധ്യമങ്ങൾ വ്യക്തമാക്കി. കൊവിഡ്-19 സാഹചര്യം നിലനിൽക്കുന്നതിനാണ് സമയം ആവശ്യപ്പെടുന്നതെന്നും ട്വിറ്റർ അറിയിച്ചു.

പൂനെയിൽ രാസവസ്തു നിര്‍മാണകേന്ദ്രത്തിൽ തീപിടിത്തം: 17 പേര്‍ മരിച്ചു

പുതിയ ഐടി നിയമങ്ങൾ പാലിച്ചില്ലെങ്കിൽ കർശന നടപടികൾ നേരിടേണ്ടി വരുമെന്ന് വ്യക്തമാക്കി കേന്ദ്ര സർക്കാർ കഴിഞ്ഞയാഴ്‌ച ട്വിറ്ററിന് കത്ത് നൽകിയിരുന്നു. ഇതിന് പിന്നാലെയാണ് ട്വിറ്റർ മുൻ നിലപാടിൽ നിന്ന് അയഞ്ഞത്. കേന്ദ്രം അനുശാസിക്കുന്ന പുതിയ മാർഗനിർദേശങ്ങൾ പാലിക്കാൻ എല്ലാ ശ്രമങ്ങളും തുടരുകയാണെന്ന് ട്വിറ്റർ വക്‌താവ് വ്യക്തമാക്കി. ” കേന്ദ്രം നൽകിയ പുതിയ മാർഗനിർദേശങ്ങൾ പാലിക്കാൻ ട്വിറ്ററിൻ്റെ ഭാഗത്ത് നിന്നും എല്ലാവിധ ശ്രമങ്ങളും തുടരുകയാണ്. ഇക്കാര്യത്തിൽ ഇന്ത്യൻ സർക്കാരിന് ഉറപ്പ് നൽകി. കൂടുതൽ കാര്യങ്ങളിൽ സർക്കാരുമായി ചേർന്ന് ക്രിയാത്മക ചർച്ചകൾ തുടരും” – എന്നും അദ്ദേഹം പറഞ്ഞു.

പുതിയ ഐടി നിയമങ്ങൾ പാലിക്കും. ഇതുമായി ബന്ധപ്പെട്ട പുരോഗതികൾ സർക്കാരിനെ അറിയിച്ചിട്ടുണ്ട്. വിഷയത്തിൽ സർക്കാരുമായി ആശയവിനിമയം തുടരുകയാണെന്നും ട്വിറ്റർ വക്‌താവ് വ്യക്തമാക്കി. കേന്ദ്രം നിലപാട് കടുപ്പിച്ചതോടെയാണ് ട്വിറ്റർ നിലപാട് മയപ്പെടുത്തിയത്. ഫേസ്‌ബുക്ക്, വാട്ട്‌സാപ്പ്, ഗൂഗിൾ എന്നീ കമ്പനികൾ ഐടി നിയമങ്ങൾ പാലിക്കാൻ തയ്യാറാണെന്ന് കേന്ദ്രത്തെ അറിയിച്ചിരുന്നു. ഈ സാഹചര്യവും നിലപാട് മാറ്റുന്നതിൽ ട്വിറ്ററിനെ പ്രേരിപ്പിച്ചു.

സൗജന്യ വാക്സിൻ പ്രഖ്യാപനം; പ്രധാനമന്ത്രിയോട് ഹൃദയപൂർവം നന്ദി പറയുന്നെന്ന് മുഖ്യമന്ത്രി പിണറായി

അഭിപ്രായം തുറന്ന് പറയുന്നതിൽ തടസം നിൽക്കുന്നതാണ് കേന്ദ്രത്തിൻ്റെ പുതിയ ഐടി നിയമമെന്ന് ട്വിറ്റർ പരസ്യപ്രസ്‌താവന നടത്തിയതോടെ കേന്ദ്രവുമായി ഏറ്റുമുട്ടൽ ആരംഭിച്ചത്. ഇതിനിടെ രാജ്യത്തെ നിയമങ്ങൾ പാലിക്കാൻ ട്വിറ്റർ ബാധ്യസ്ഥരാണെന്ന് ഡൽഹി ഹൈക്കോടതി വ്യക്തമാക്കി. നിയമം അനുസരിച്ചില്ലെങ്കിൽ ഐടി നിയമം 2000ലെ 79മത് അനുഛേദം അനുസരിച്ചുള്ള ആനുകൂല്യങ്ങൾ പിൻവലിക്കുമെന്ന് കേന്ദ്രവും വ്യക്തമാക്കിയിരുന്നു.