കഫക്കെട്ടും മൂക്കടപ്പും മാറാൻ ഇങ്ങനെയൊന്ന് ആവി പിടിച്ച് നോക്കൂ

ശ്വാസകോശസംബന്ധമായ ആരോഗ്യപ്രശ്നങ്ങൾ നേരിടുന്നവർക്കുള്ള ഏറ്റവും നല്ല പരിഹാരമാണ് ആവി പിടിക്കുന്നത് എന്നത് നമുക്കെല്ലാം അറിയാമായിരിക്കും. കഫക്കെട്ട്, മൂക്കടപ്പ്, സൈനസ് പ്രശ്നങ്ങൾ, തുമ്മൽ തുടങ്ങുന്ന അസ്വസ്ഥതകൾ എന്ത് തന്നെയായാലും അതിനെ നേരിടാൻ ഏറ്റവും നല്ലതാണ് ചിലവൊന്നും ഇല്ലാത്ത ഈ പ്രതിവിധി. പനി ചുമ ജലദോഷം തുടങ്ങിയ രോഗലക്ഷണങ്ങളുമായി ചെല്ലുമ്പോൾ ഡോക്ടർമാർ പോലും നമ്മളോട് അസ്വസ്ഥതകളിൽ നിന്ന് ആശ്വാസം നേടാൻ ആവി പിടിക്കാൻ നിർദ്ദേശിക്കാറുണ്ട്.



കൊറോണവൈറസിനെ തുരത്താൻ ആവി പിടിച്ചാൽ മതിയോ?



ഇന്ന് ലോകം മുഴുവൻ നേരിടുന്ന ഏറ്റവും വലിയ മഹാമാരിയായ കൊറോണ വൈറസ് രോഗവ്യാപനത്തിൻ്റെ അടിസ്ഥാന ലക്ഷണങ്ങളായി കണക്കാക്കുന്നത് സാധാരണ ലക്ഷണങ്ങളായ മൂക്കടപ്പ്, തലവേദന, ജലദോഷം, പനി ശ്വാസതടസം, തുടങ്ങിയവയൊക്കെ തന്നെയാണ്. മറ്റ് രോഗങ്ങൾ പോലെ മരുന്നു കഴിച്ചു മാറ്റാൻ കഴിയുന്നതല്ല ഇത്. അതിനാൽ തന്നെ ഈ ദിനങ്ങളിൽ ഒരാളുടെ വീട്ടിൽ കൊറോണ രോഗം സ്ഥിരീകരിച്ചാൽ രോഗിയും വീട്ടിലുള്ള മറ്റെല്ലാവരും സ്വയം സുരക്ഷയ്ക്കും, സാമൂഹിക സുരക്ഷയ്ക്കുമായി വീട്ടിൽ തന്നെ സെൽഫ് ഐസൊലേഷനിൽ കഴിയേണ്ടതുണ്ട്. പ്രത്യേകിച്ച് മരുന്ന് ഒന്നും ഇല്ലാത്തതിനാൽ തന്നെ വേണ്ടത്ര വിശ്രമവും പോഷക ലഭ്യതയും ഉറപ്പാക്കുകയാണ് രോഗത്തിൽ നിന്ന് പുറത്തു കടക്കാൻ ഏറ്റവും അത്യാവശ്യം.

വീട്ടിൽ രോഗം ഉണ്ടെങ്കിലും ഇല്ലെങ്കിലും ഈ ദിനങ്ങളിൽ നന്നായി ആവി പിടിക്കേണ്ടത് വളരെ പ്രധാനമാണെന്ന് പല ആരോഗ്യ വിദഗ്ധരും ഒരുപോലെ അഭിപ്രായപ്പെടുന്നുണ്ട്. പ്രത്യേകിച്ചും നിങ്ങൾ രോഗബാധിതനാണെങ്കിൽ ഇതുമായി ബന്ധപ്പെട്ട് ഉണ്ടാക്കുന്ന ലക്ഷണങ്ങളായ കഫക്കെട്ട്, തലവേദന, എന്നിവയുടെ അസ്വസ്ഥതകൾക്കെല്ലാം വലിയ രീതിയിൽ ആശ്വാസം പകരാനായി ഇടയ്ക്കിടെ പതിവായി ആവി പിടിക്കുന്നത് ഗുണം ചെയ്യും. എന്നാൽ ശ്രദ്ധിക്കുക, ആവി പിടിക്കുന്നത് കൊണ്ട് മാത്രം കൊറോണവൈറസ്സിനെ തുരത്താൻ കഴിയില്ല എന്നതും ഓർമ്മ വേണം.

രോഗബാധിതരാണെങ്കിലും ഇല്ലെങ്കിലും അസ്വസ്ഥതകൾ തോന്നിയാൽ ആവി പിടിക്കുന്നത് നല്ലതാണ്. ആവി പിടിക്കുന്നത് വഴി നിങ്ങളുടെ ഉള്ളിലുള്ള രോഗാണുക്കളെ പൂർണമായി നശിപ്പിക്കുവാനോ നിർവീര്യമാക്കുകയോ കഴിയുകയില്ല. എന്നാൽപോലും രോഗം മൂലം നമുക്ക് ഉണ്ടാകുന്ന അസ്വസ്ഥതകളെല്ലാം ഒരു പരിധി വരെ കുറയ്ക്കാൻ ഈയൊരു പ്രവർത്തി മികച്ച രീതിയിൽ സഹായിക്കും. പ്രത്യേകിച്ചും ആവി പിടിക്കുമ്പോൾ നമ്മുടെ മൂക്കിനകത്തും തൊണ്ടയുടെ ഭാഗത്തും അടിഞ്ഞുകൂടിയിട്ടുള്ള കഫം ഇളകി പോകാൻ സഹായിക്കുന്നു. ഈ കൊറോണ കാലത്ത് ഏറ്റവും ഫലപ്രദമായ രീതിയിൽ എങ്ങനെ ആവി പിടിക്കേണ്ടത് എങ്ങനെയെന്നറിയാം.

ആവി പിടിക്കാൻ വേണ്ടത്



നിങ്ങൾ ആവി പിടിക്കാനെടുക്കുന്ന വെള്ളത്തിൽ പ്രകൃതിദത്ത ഗുണങ്ങൾ അടങ്ങിയതും ശരീരത്തിന് ആശ്വാസം നൽകുന്നതുമായ ചില ചേരുവകൾ കൂട്ടി ചേർക്കുകയാണെങ്കിൽ ഇതിൽ നിന്ന് കൂടുതൽ മികച്ച ഫലങ്ങൾ ലഭിക്കും. ആവി പിടിക്കുന്നതിനായി നമുക്ക് വീടുകളിൽ തന്നെ കണ്ടെത്താവുന്ന പോഷകങ്ങൾ നിറഞ്ഞ മൂന്ന് ചേരുവകൾ തിരഞ്ഞെടുക്കാം. ഇവ മൂന്നും നിങ്ങളുടെ ശരീരത്തിന് ആശ്വാസ ഗുണങ്ങൾ നൽകുന്നതും രോഗപ്രതിരോധശേഷി വർധിപ്പിക്കാൻ സഹായിക്കുന്നതുമാണ്. ഇതിനായി എന്തെല്ലാം ആവശ്യമാണെന്ന് നോക്കാം.

>

രണ്ടോ മൂന്നോ കഷണം ഇഞ്ചി

> 3 – 4 തുളസി ഇലകൾ

> 1 ടീസ്പൂൺ അയമോദകം

ഒരു പാത്രത്തിൽ ആവശ്യത്തിന് വെള്ളം തിളപ്പിക്കാൻ വെക്കുക. ചെറുതായി ചൂടായി വരുമ്പോൾ തന്നെ ഇതിലേക്ക് നിങ്ങൾക്ക് രണ്ടോ മൂന്നോ ഇഞ്ച് കഷണങ്ങൾ ഇടാം. ഇഞ്ചിയിലെ ആൻറി ഓക്സിഡൻ്റൽ ഗുണങ്ങൾ ശരീരത്തിന് ഏറ്റവും നല്ലതാണ്. പലതരത്തിലുള്ള രോഗാണുക്കളിൽ നിന്നും ശരീരത്തെ സംരക്ഷിച്ചു നിർത്താനും മൂക്കടപ്പ് ജലദോഷം തുടങ്ങിയ ലക്ഷണങ്ങൾ കുറയ്ക്കാനുമെല്ലാം നല്ലതാണ് ഇഞ്ചിയുടെ ഉപയോഗം.

അടുത്തതായി ചേർക്കേണ്ട ചേരുവ തുളസിയാണ്. 2-3 തുളസി ഇലകൾ വെള്ളത്തിലേക്ക് ചേർത്ത് കൊടുക്കുക ആൻ്റി ബാക്ടീരിയൽ ഗുണങ്ങൾ നൽകാനും ശരീരത്തിൻറെ വേദനകളും അസ്വസ്ഥതയും കുറയ്ക്കാനുമുള്ള ഗുണങ്ങളെ തുളസി നൽകും. ചുമ ജലദോഷം തുടങ്ങിയവ ഉള്ള സമയത്ത് തുളസിയില ഇട്ട് ആവിപിടിക്കുന്നത് ഏറ്റവും നല്ലതാണെന്ന് ആയുർവേദം പോലും പറയുന്നുണ്ട്.

അടുത്ത ചേരുവയായ അയമോദകം നിങ്ങളുടെ മൂക്കടപ്പ് വളരെ മാറ്റാൻ നല്ലതാണ്. മൂന്ന് ചേരുവകളും ചേർത്ത് കൊടുത്തത് ഈ വെള്ളം നന്നായി തിളപ്പിക്കണം. കുറഞ്ഞത് ഒരു 5 മിനിറ്റ് ഇത് നന്നായി തിളപ്പിച്ചതിന് ശേഷം തീ ഓഫാക്കാം. നിങ്ങളുടെ ആവിപിടിക്കൽ പ്രക്രിയ കൂടുതൽ മികച്ചതാക്കാനായി ചെറിയ വാവട്ടം ഉള്ള ( പുട്ടുകുറ്റി പോലെയുള്ള ) പാത്രങ്ങളിലേക്ക് വെള്ളം പകർത്തി ഒഴിച്ച ശേഷം ആവി പിടിക്കുക. ഇത്തരം പാത്രങ്ങൾ നിങ്ങളുടെ പക്കൽ ഇല്ലാത്ത പക്ഷം വലിയ വാവട്ടമുള്ള സാധാരണ പാത്രങ്ങൾ ഉപയോഗിക്കാവുന്നതാണ്. ഇങ്ങനെ വെള്ളം എടുത്തതിനു ശേഷം ഒരു ടവ്വൽ തലയ്ക്കു മുകളിലൂടെ ഇട്ട് മൂടി നന്നായി ആവി പിടിക്കുക.

അധിക ഭാരം കുറയ്ക്കാൻ ഫ്‌ളാക്‌സ് സീഡ്സ്; കഴിക്കേണ്ടത് ഇങ്ങനെ

ഗുണങ്ങൾ



രോഗലക്ഷണങ്ങൾ ഉള്ളപ്പോൾ ഇങ്ങനെ ആവി പിടിക്കുന്നത് അസ്വസ്ഥമായിരിക്കുന്ന നമ്മുടെ ശരീരത്തിന് വളരെയധികം ആശ്വാസം പകരുന്ന ഒരു പ്രവർത്തിയാണ്. ആവി പിടിക്കാൻ ഉള്ള വെള്ളത്തിൽ പ്രകൃതിദത്ത ഗുണങ്ങൾ അടങ്ങിയ ചേരുവകൾ കൂടി ചേർക്കുമ്പോൾ ശ്വാസകോശത്തിലും തൊണ്ടയിലും മറ്റും കട്ടി പിടിച്ചിരിക്കുന്ന കഫത്തെ വളരെ എളുപ്പത്തിൽ ഇളക്കാൻ സഹായിക്കുകയും ചെയ്യും.

ശ്രദ്ധിക്കേണ്ടത്



എല്ലാറ്റിലും ഉപരി ആവി പിടിക്കുന്ന സമയങ്ങളിൽ സുരക്ഷയ്ക്കായി പ്രത്യേകം ശ്രദ്ധ പാലിക്കേണ്ട ചില കാര്യങ്ങൾ കൂടിയുണ്ട്. പ്രത്യേകിച്ച് ചൂടുള്ള വെള്ളം ആയതിനാൽ തന്നെ നിങ്ങളുടെ ശരീര ഭാഗങ്ങൾ പൊള്ളാതിരിക്കാനായി കൃത്യമായ അകലം പാലിച്ച് വേണം ആവി പിടിക്കാൻ. അതുപോലെതന്നെ ഒരു തവണ ആവി പിടിക്കാൻ ഉപയോഗിച്ച വെള്ളം ഉപയോഗിച്ച് വീണ്ടും ആവി പിടിക്കുകയോ കുടുംബാംഗങ്ങളിലെ മറ്റാരെങ്കിലും ഇത് വീണ്ടും ഉപയോഗിക്കുകയോ ചെയ്യരുത്. കൂടാതെ 4 വയസ്സിൽ താഴെയുള്ള കുട്ടികൾക്ക് ആവി പിടിക്കാൻ കൊടുക്കുകയും അരുത്.