‘ജനങ്ങളെ സഹായിക്കാനാകുന്നില്ല’; കോൺഗ്രസിൽ തുടരാനില്ല, ജിതിൻ പ്രസാദ ബിജെപിയിൽ ചേർന്നു

ന്യൂഡൽഹി: മുൻ കേന്ദ്രമന്ത്രിയും കോൺഗ്രസ് നേതാവുമായ ജിതിൻ പ്രസാദ കോൺഗ്രസ് വിട്ട് ബിജെപിയിൽ ചേർന്നു. രാഹുൽ ഗാന്ധിയുടെ വിശ്വസ്തരിൽ ഒരാളെന്ന് അറിയപ്പെടുന്ന നേതാവാണ് ജിതിൻ പ്രസാദ. അടുത്ത വർഷം യുപിയിൽ നിയമസഭ തെരഞ്ഞെടുപ്പ് നടക്കാനിരിക്കെ കോൺഗ്രസിന് തിരിച്ചടിയേകുന്നതാണ് ജിതിൻ പ്രസാദ പാർട്ടി വിട്ട് ബിജെപിയിൽ ചേർന്ന നടപടി.



ഡൽഹിയിൽ ബിജെപി ആസ്ഥാനത്തെത്തിയാണ് 47കാരനായ ജിതിൻ പ്രസാദ പാർട്ടി അംഗത്വം സ്വീകരിച്ചത്. കോൺഗ്രസിനെതിരെ രൂക്ഷ വിമർശനം ഉന്നയിച്ചും ബിജെപിയെയും മോദിയെയും പുകഴ്ത്തിയുമാണ് ‘കോൺഗ്രസ് നേതാവിന്‍റെ’ ചുവടുമാറ്റം.

Also Read: പുതിയ തെരഞ്ഞെടുപ്പ് കമ്മീഷണറായി അനൂപ് ചന്ദ്ര പാണ്ഡേയ്ക്ക് നിയമനം



“ബിജെപി മാത്രമാണ് യഥാർഥ രാഷ്ട്രീയ പാർട്ടി. ഒരേയൊരു രാഷ്ട്രീയ പാർട്ടിയും ഇതാണ്. മറ്റു പാർട്ടികളെല്ലാം പ്രാദേശിമാണ്. ബിജെപിയ്ക്കും പ്രധാനമന്ത്രി നരേന്ദ്ര മോദിയ്ക്കും മാത്രമാണ് രാജ്യം ഇപ്പോൾ അഭിമുഖീകരിക്കുന്ന വെല്ലുവിളികളെ നേരിടാൻ കഴിയുക.” ജിതിൻ പ്രസാദ പറഞ്ഞു.

പ്രതിനിധീകരിക്കുന്ന ജനങ്ങളെ സഹായിക്കാൻ പറ്റുന്നില്ലെങ്കിൽ പിന്നെ ഈ പാർട്ടിയിൽ തുടരുന്നതിൽ കാര്യമെന്താണെന്നും ജിതിൻ പ്രസാദ ചോദിക്കുന്നു. ജ്യോതിരാദിത്യ സിന്ധ്യയ്ക്ക് ശേഷം കോൺഗ്രസ് വിടുന്ന രാഹുൽ ഗാന്ധിയുടെ വിശ്വസ്തരിൽ ഒരാൾ കൂടിയാണ് ജിതിൻ പ്രസാദ.

Also Read : കോൺഗ്രസ് ഉണർന്നാൽ സിപിഎമ്മിന് പിടിച്ചു നിൽക്കാനാവില്ല; ബൂത്ത് തലം മുതൽ പുനഃസംഘടിപ്പിക്കും: സുധാകരൻ



2019ല്‍ ജിതിന്‍ പ്രസാദ പാര്‍ട്ടി വിടുന്നുവെന്ന് വാര്‍ത്തകളുണ്ടായിരുന്നു. എന്നാൽ പ്രിയങ്ക ഗാന്ധി ഇടപെട്ട് അനുനയിപ്പിച്ചെന്നായിരുന്നു അന്ന് പുറത്ത് വന്ന റിപ്പോർട്ട്. നേരത്തെ കോണ്‍ഗ്രസിൽ മാറ്റം ആവശ്യപ്പെട്ട് സോണിയ ഗാന്ധിക്ക് കത്ത് അയച്ച 23 നേതാക്കളിൽ ജിതിന്‍ പ്രസാദയും ഉണ്ടായിരുന്നു.