വയറുവേദനയെത്തുടർന്ന് ആശുപത്രിയിലെത്തി, ആറാം ക്ലാസുകാരി ഗർഭിണി; അധ്യാപകൻ പീഡിപ്പിച്ചെന്ന് വെളിപ്പെടുത്തൽ

ജയ്പൂര്‍: ആറാംക്ലാസ് വിദ്യാര്‍ഥിനിയെ സർക്കാർ സ്കൂൾ അധ്യാപകന്‍ പീഡിപ്പിച്ച് ഗര്‍ഭിണിയാക്കി. രാജസ്ഥാനിലെ ജോധ്പൂരിൽ ഷേർഗഡ് സബ് ഡിവിഷൻ പരിധിയിലാണ് സംഭവം. വയറുവേദനയെ തുടര്‍ന്ന് രക്ഷിതാക്കൾ കുട്ടിയെ ആശുപത്രിയിൽ കൊണ്ടുപോയപ്പോഴാണ് ഞെട്ടിക്കുന്ന വാർത്ത പുറത്തറിയുന്നത്.



ഡോക്ടർമാർ മകൾ ഗർഭിണിയാണെന്ന് പറഞ്ഞതോടെയാണ് കുട്ടി അധ്യാപകനിൽ നിന്ന് നേരിടേണ്ടിവന്ന ദുരനുഭവത്തക്കുറിച്ച് രക്ഷിതാക്കളോട് വിവരിക്കുന്നത്. ബാലേസർ പോലീസ് സ്റ്റേഷൻ പരിധിയിലാണ് സംഭവം. സർക്കാർ അപ്പർ പ്രൈമറി സ്കൂളിലെ ആറാം ക്ലാസ് വിദ്യാർഥിയായ പതിമൂന്നുകാരിയാണ് പീഡനത്തിനിരയായതെന്ന് ഇംഗ്ലീഷ് വാർത്താ ചാനലായ ന്യൂസ്18യാണ് റിപ്പോർട്ട് ചെയ്തത്.

Also Read : ജാർഖണ്ഡിൽ ബിജെപി നേതാവിന്‍റെ മകൾ മരിച്ച നിലയിൽ; ‘കണ്ണ് ചൂഴ്ന്നെടുത്തു മരത്തിൽ കെട്ടിത്തൂക്കി’



അധ്യാപകന്‍ കുട്ടിയെ തുടര്‍ച്ചയായി ബലാത്സംഗത്തിനിരയാക്കിയിരുന്നെന്നാണ് റിപ്പോർട്ട്. പീഡന വിവരം പുറത്ത് പറയരുതെന്ന് ഇയാള്‍ പെണ്‍കുട്ടിയെ ഭീഷണിപ്പെടുത്തകയും ചെയ്തു. മറ്റൊരു അധ്യാപകനും ഇയാൾക്ക് സഹായം ചെയ്തിരുന്നു. സംഭവം പുറത്തറിഞ്ഞതിന് പിന്നാലെ രണ്ട് അധ്യാപകരും ഒളിവിൽ പോയിരിക്കുകയാണ്.

Also Read : ഒരു രൂപ പോലും സംഭാവനയില്ല; തെരഞ്ഞെടുപ്പ് പ്രചാരണത്തിന് കാസർകോട് ഏറ്റവുമധികം തുക ചെലവഴിച്ചത് സുരേന്ദ്രൻ

പെണ്‍കുട്ടിയുടെ പിതാവ് നൽകിയ പരാതിയില്‍ പ്രതികള്‍ക്കെതിരെ പോക്‌സോ വകുപ്പുകള്‍ പ്രകാരം കേസ് എടുത്തതായി പോലീസ് പറഞ്ഞു. മാര്‍ച്ച് മാസത്തില്‍ അധ്യാപകന്‍ മൂന്ന്- നാല് തവണ പെണ്‍കുട്ടിയെ പീഡിപ്പിച്ചെന്നാണ് പോലീസ് പറയുന്നത്. മറ്റേ അധ്യാപകന്‍ ഈ സമയം ഇയാൾക്ക് കാവല്‍ നില്‍ക്കുകയുമായിരുന്നു. കേസുമായി ബന്ധപ്പെട്ട് ഇതുവരെയും ആരെയും അറസ്റ്റ് ചെയ്തിട്ടില്ലെന്നും അന്വേഷണം ഊർജ്ജിതമാക്കിയെന്നും പോലീസ് പറഞ്ഞു.