ക്ഷേത്രവളപ്പിലുണ്ടായ ധാന്യങ്ങൾ വിൽക്കണോ? ദൈവത്തിന്റെ ആധാർ കാർഡ് വേണം

ദേവന്മാർക്കും ദേവതകൾക്കും ആധാർ കാർഡുകൾ നിർമിക്കുന്നത് എങ്ങനെ എന്നത് സംബന്ധിച്ച് നിങ്ങൾക്ക് ഏതെങ്കിലും ഐഡിയയുണ്ടോ? എങ്കിൽ നിങ്ങളെ കാത്ത് ഉത്തർപ്രദേശിലെ ബന്ദ ജില്ലയിലെ ഒരു പൂജാരിയുണ്ട്. ക്ഷേത്രഭൂമിയിൽ വിളയിച്ചെടുത്ത ധാന്യങ്ങൾ വിൽക്കാൻ മണ്ഡിയിൽ (പ്രാദേശിക വില്പന/സംഭരണ കേന്ദ്രം) എത്തിയതാണ് കക്ഷി. പക്ഷെ ധാന്യങ്ങൾ വിൽക്കണമെങ്കിൽ കൃഷിസ്ഥലമുടമയുടെ ആധാർ കാർഡ് സമർപ്പിക്കണം എന്ന നിബന്ധനയുള്ളതിനാൽ പെട്ടിരിക്കുകയാണ് പൂജാരി.

ബന്ദ ജില്ലയിലെ അത്താര തഹ്‌സിലിലെ കുർഹാര ഗ്രാമത്തിലാണ് സംഭവം. ക്ഷേത്രത്തോട് ചേർന്ന് കിടക്കുന്ന കൃഷിഭൂമിയിൽ വിളയിച്ച 100 ക്വിന്റൽ ഗോതമ്പ് വിൽക്കാനാണ് രാം ജങ്കി ക്ഷേത്രത്തിലെ പുരോഹിതനും പരിപാലകനുമായ മഹാന്ത് രാംകുമാർ ദാസ് എത്തിയത്. ഗോതമ്പ് വിൽക്കാൻ അദ്ദേഹം മണ്ഡിയിൽ എത്തിയപ്പോൾ ആണ് ഉടമയുടെ ആധാർ കാർഡ് വേണം എന്ന നിയമത്തെപ്പറ്റി അറിയുന്നത്. ക്ഷേത്രഭൂമി പ്രതിഷ്ഠ നടത്തുന്ന ദേവന്റേതായതിനാൽ ആ ദേവന്റെ ആധാർ കാർഡ് വേണം എന്നാണ് ചട്ടം.

‘ബാബ കാ ധാബ’ ഓർമ്മയുണ്ടോ? കാന്ത പ്രസാദും ഭാര്യയും വീണ്ടും തട്ടുകട തുടങ്ങി
ഏഴു ഹെക്ടർ ക്ഷേത്രഭൂമി പ്രതിഷ്ഠകളായ രാമന്റെയും ജാൻകിയുടെയും പേരിലാണ് രജിസ്റ്റർ ചെയ്തിരിക്കുന്നത്. “എനിക്ക് ആധാർ കാർഡ് ഹാജരാക്കാൻ കഴിയാത്തതിനാൽ രജിസ്ട്രേഷൻ റദ്ദാക്കി, എനിക്ക് ദൈവത്തിന്റെ ആധാർ കാർഡ് എവിടെ നിന്ന് ലഭിക്കും?” ദാസ് ഐഎഎൻഎസ്സിനോട് പറഞ്ഞു. സബ് ഡിവിഷണൽ മജിസ്‌ട്രേറ്റ് ആയ സൗരഭ് ശുക്ലയോട് സംസാരിച്ച പൂജാരി ആധാർ കാർഡ് നിർബന്ധമാണ് എന്ന് മനസ്സിലാക്കി.

ഗതികെട്ടാൽ പുലി പുല്ലും തിന്നും! ആന ചിലപ്പോൾ ഒരു ഹെൽമെറ്റും
കഴിഞ്ഞ വർഷം 150 ക്വിന്റൽ ധാന്യങ്ങൾ സർക്കാർ മണ്ഡിയിൽ ഒരു കുഴപ്പവുമില്ലാതെ വിറ്റതായും ദാസ് പറഞ്ഞു. കുറേ വർഷങ്ങളായി ദാസ് ഈ രീതിയിൽ ധാന്യങ്ങൾ വിൽക്കുന്നു എന്നും ഇതാദ്യമായാണ് ആധാർ കാർഡ് പ്രശ്നം ഉടലെടുത്തത് എന്നും ദാസ് വ്യക്തമാക്കി. അതെ സമയം, ദേവന്റെ ആധാർ കാർഡ് ഹാജരാക്കാൻ ദാസിനോട് ആവശ്യപ്പെട്ടിട്ടില്ലെന്നും എന്നാൽ നടപടി ക്രമത്തെക്കുറിച്ച് വിശദീകരിക്കുക മാത്രമാണ് ചെയ്തത് എന്നുമാണ് സബ് ഡിവിഷണൽ മജിസ്‌ട്രേറ്റ് പറയുന്നത്.

ഒടുവിൽ മണ്ഡിയിൽ വിൽക്കാൻ കഴിയില്ല എന്ന് മനസ്സിലാക്കിയതോടെ കമ്മീഷൻ ഏജന്റുമാർക്ക് കുറഞ്ഞ വിലയ്ക്ക് വിറ്റ് ധാന്യങ്ങൾ വിട്ടു പൂജാരി.