നിങ്ങളുടെ ചർമത്തിലുണ്ടാകുന്ന പ്രശ്നങ്ങൾ പരിഹരിക്കാൻ സഹായിക്കുന്ന ഒരു പ്രകൃതിദത്ത ചേരുവ? ആന്റി-ഏജിംഗ്, ആൻറി ഓക്സിഡൻറ് ഗുണങ്ങൾക്ക് പേരുകേട്ട ചെമ്പരത്തിയെ കുറിച്ചാണ് പറഞ്ഞുവരുന്നത്.
കാലാവസ്ഥ മാറി വരുന്നത് ചിലപ്പോഴെങ്കിലും ചർമ്മത്തെയും ദോഷകരമായി ബാധിക്കാറുണ്ട്. വേനൽക്കാലത്തെ എന്ന പോലെ തന്നെ ഈ മഴക്കാലത്തും ചർമ്മത്തിന് അധിക പരിചരണം അത്യാവശ്യമാണ്. അധികം പുറത്തിറങ്ങാതെ വീട്ടിൽ തന്നെ കൂടുതൽ സമയം ചെലവഴിക്കുന്നവരാണ് നിങ്ങളെങ്കിൽ പോലും ഈ ദിനങ്ങളിൽ ഉണ്ടാകാൻ സാധ്യതയുള്ള ചർമപ്രശ്നങ്ങൾ നിങ്ങളെ വളരെയേറെ അലട്ടുന്നതായിരിക്കും. സാധാരണ നാം പാലിക്കുന്ന ദൈനംദിന നാ അടിസ്ഥാന ചർമസംരക്ഷണ സമ്പ്രദായങ്ങൾ ഒന്നും ചിലപ്പോൾ ഈ ദിനങ്ങളിൽ അത്രതന്നെ ഗുണം ചെയ്തെന്നു വരില്ല. കാരണം ഈ സമയത്ത് ചർമം നേരിടുന്ന പ്രശ്നങ്ങളെ മറികടക്കാൻ ഇവയൊന്നും ചിലപ്പോൾ പര്യാപ്തമല്ലായിരിക്കാം. അതുകൊണ്ട് തന്നെ ചർമത്തിന് തണുപ്പിക്കൽ ഗുണങ്ങൾ നൽകിക്കൊണ്ട് ഈയൊരു പ്രശ്നത്തെ മറികടക്കുന്നതിനായി നമുക്ക് സ്വാഭാവിക പോഷണങ്ങൾ നൽകുന്ന ചേരുവകൾ ആവശ്യമാണ്.ചർമ്മത്തിന്റെ പ്രശ്നങ്ങൾ എന്തുമാകട്ടെ അവ പരിഹരിക്കാൻ സഹായിക്കുന്ന ഒരു മാന്ത്രിക പ്രതിവിധിയാണ് ചെമ്പരത്തി. ചെമ്പരത്തിയുടെ ഇലകളും പൂക്കളുമൊക്കെ നിങ്ങൾക്ക് ചർമ്മത്തെ പരിപോഷിപ്പിക്കാനായി പരീക്ഷിച്ചു നോക്കാൻ കഴിയുന്ന മികച്ച പരിഹാര മാർഗമാണ്.
ചെമ്പരത്തി എങ്ങനെ ഉപയോഗിക്കാം?
ചർമ്മത്തെ തണുപ്പിക്കുന്നതും പരിപോഷിപ്പിക്കുന്നതുമായ പ്രകൃതിദത്ത ഗുണങ്ങൾ ചെമ്പരത്തിയിൽ ഉണ്ട്. അതുകൊണ്ടുതന്നെ നമ്മുടെ ഏത് സമയത്തും ചർമസംരക്ഷണ ദിനചര്യയിൽ ഉൾപ്പെടുത്താൻ കഴിയുന്ന ഒരു മികച്ച ഘടകമാണിത്. ചെമ്പരത്തി ഇലകളും പൂക്കളും നന്നായി ഉണക്കി പൊടിച്ചെടുക്കുകയാണ് ഉപയോഗിക്കുന്നതിനുള്ള ഏറ്റവും നല്ല മാർഗം. ഇത് നിങ്ങൾക്ക് കുറച്ച് തുള്ളി വെള്ളത്തോടൊപ്പം കലർത്തി മുഖത്ത് പുരട്ടാം. അല്ലെങ്കിൽ തിളക്കമാർന്ന ചർമ്മം ലഭിക്കുന്നതിനായി മറ്റു ചേരുവകളോടൊപ്പം ചേർത്ത് ഒരു ഫെയ്സ് പായ്ക്കായി പോലും പരീക്ഷിക്കാം. ചർമപ്രശ്നങ്ങൾ കുറയ്ക്കാനായി നിങ്ങൾക്ക് പരീക്ഷിക്കാൻ കഴിയുന്ന കുറച്ചു ചെമ്പരത്തി ഫെയ്സ് പാക്കുകൾ ഇവിടെ പരിചയപ്പെടാം.
ഓട്സ് + ചെമ്പരത്തി
നിർജീവ ചർമ്മ കോശങ്ങളെ പുറംതള്ളികൊണ്ട് ചർമത്തിന് എക്സ്ഫോളിയേറ്റിംഗ് ഗുണങ്ങൾ നൽകുന്ന ഒരു ഫെയ്സ് മാസ്ക് ആണിത്. ഈ ഫേസ് പാക്ക് തയ്യാറാക്കാനായി നിങ്ങൾക്ക് ഉണക്കിപ്പൊടിച്ച ചെമ്പരത്തിയും ഓട്സും ആവശ്യമാണ്. ചെമ്പരത്തിയുടെ ഇതളുകളോ ഇലകളോ ഏതും നിങ്ങൾക്ക് ഇതിനായി ഉണക്കിപ്പൊടിച്ച് എടുക്കാം. കുറച്ച് ഓട്സിനോടൊപ്പം ഒരു പാത്രത്തിൽ പൊടിച്ചെടുത്ത ചെമ്പരത്തി ചേർക്കുക. കുറച്ച് റോസ് വാട്ടർ കൂട്ടിചേർത്ത് എല്ലാ ചേരുവകളും നന്നായി ഇളക്കുക. തയ്യാറായ ഫേസ് പാക്ക് നിങ്ങളുടെ മുഖത്ത് പുരട്ടി 20 മിനിറ്റ് നേരം സൂക്ഷിക്കുക. മികച്ച ഫലങ്ങൾക്കായി ആഴ്ചയിൽ രണ്ടുതവണ നിങ്ങൾക്കിത് ഉപയോഗിക്കാം.
കറ്റാർ വാഴ + ചെമ്പരത്തി
ചർമ്മത്തെ തണുപ്പിക്കുന്നതും ശാന്ത ഗുണങ്ങൾ പകരുന്നതുമായ സവിശേഷതകൾക്ക് പേരുകേട്ട ചേരുവയാണ് കറ്റാർ വാഴ. അതുകൊണ്ടുതന്നെ നിങ്ങളുടെ വേനൽകാലത്തുള്ള വീട്ടുവൈദ്യങ്ങൾക്ക് ഏറ്റവും അനുയോജ്യമാണ് ഈ ഘടകം. ഒരു നല്ല ഫേസ് പാക്ക് തയ്യാറാക്കാനായി ഒരു പാത്രത്തിൽ 2 ടേബിൾസ്പൂൺ ചെമ്പരത്തി പൊടിയും നിങ്ങൾക്ക് ആവശ്യമായ അളവിൽ കറ്റാർ വാഴ ജെല്ലും ചേർത്ത് മിക്സ് ചെയ്യുക. ചേരുവകൾ രണ്ടും നന്നായി കലർത്തി നിങ്ങളുടെ മുഖത്ത് പുരട്ടുക. ഏകദേശം 15-20 മിനിറ്റ് ഇത് നിങ്ങളുടെ മുഖത്ത് ഇരിക്കട്ടെ. സ്വാഭാവികമായതും തിളക്കമുള്ളതുമായ ചർമ്മത്തിനായി ആഴ്ചയിൽ മൂന്ന് തവണ വരെ നിങ്ങൾക്കിത് പ്രയോഗിക്കാൻ കഴിയും.
തൈര് + ചെമ്പരത്തി
തൈരിന് ചർമത്തിന് സ്വാഭാവിക മോയ്‌സ്ചറൈസിംഗ് ഗുണങ്ങളെ നൽകാൻ കഴിവുണ്ട്. ഇതു ചർമത്തിൽ കൂടുതൽ സമയം ജലാംശം നിലനിർത്താൻ വഴിയൊരുക്കുന്നു. ഈ ഫേസ് പാക്ക് തയ്യാറാക്കാനായി ഒരു പാത്രത്തിൽ 1-2 ടേബിൾസ്പൂൺ ചെമ്പരത്തി ഉണക്കിപ്പൊടിച്ചതും ഒപ്പം ആവശ്യമായ അളവിൽ തൈരും ചേർക്കുക. ചേരുവകൾ നന്നായി കലർത്തി മാസ്ക് നിങ്ങളുടെ മുഖത്ത് പുരട്ടി 15 മിനിറ്റ് നന്നായി മസാജ് ചെയ്യുക. തുടർന്ന് 10 മിനിറ്റ് ഇത് മുഖത്തുതന്നെ സൂക്ഷിക്കാം. ശേഷം തണുത്ത വെള്ളത്തിൽ കഴുകിക്കളയാം.
പാൽ + തേൻ + ചെമ്പരത്തി
വേനൽക്കാലത്തെ നിങ്ങളുടെ വരണ്ട ചർമ്മം അകറ്റി വശ്യമായ തിളക്കം നൽകാൻ ഈ മാസ്ക് മികച്ചതാണ്. ഈ പ്രതിവിധി തയ്യാറാക്കുന്നതിനായി ഉണക്കിപ്പൊടിച്ച ചെമ്പരത്തി ഇലകളോ പുഷ്പങ്ങളോ രണ്ട് ടീസ്പൂൺ ഒരു പാത്രത്തിൽ എടുത്ത് ഇതിലേക്ക് ഒരു ടേബിൾ സ്പൂൺ തേനും ആവശ്യത്തിന് പാലും ചേർക്കുക. എല്ലാ ചേരുവകളും നന്നായി കൂട്ടിക്കലർത്തിയ ശേഷം നിങ്ങളുടെ മുഖത്ത് പുരട്ടി 20 മിനിറ്റ് സൂക്ഷിക്കാം. തുടർന്ന് തണുത്ത വെള്ളത്തിൽ കഴുകിക്കളയുക. വാർദ്ധക്യത്തിന്റെ ആദ്യ ലക്ഷണങ്ങളെ നേരിടാനും ഗുണം ചെയ്യും ഈ ഫേസ്പാക്ക്.
