കൊവിഡ് 19 മൂന്നാം തരംഗം വരുമെന്ന് ഉറപ്പ്; മുന്നൊരുക്കങ്ങൾ തുടങ്ങിയതായി ഡൽഹി മുഖ്യമന്ത്രി

ന്യൂഡൽഹി: കൊവിഡ് 19 മൂന്നാം തരംഗം ഉണ്ടാകുമെന്ന് ഉറപ്പാണെന്നും ഇതിനെ പ്രതിരോധിക്കാനുള്ള നടപടികള്‍ യുദ്ധകാലാടിസ്ഥാനത്തിൽ തുടങ്ങിയെന്നും ഡൽഹി മുഖ്യമന്ത്രി അരവിന്ദ് കെജ്രിവാള്‍. 45 ശതമാനത്തോളം പേര്‍ക്ക് വാക്സിൻ നല്‍കിയ യുകെയിൽ പോലും പുതിയ കൊവിഡ് 19 കേസുകളുടെ എണ്ണത്തിൽ വലിയ വര്‍ധനവുണ്ടെന്നും ഇത് മൂന്നാം തരംഗത്തിൻ്റെ സൂചനയാണെന്നും കെജ്രിവാള്‍ പറഞ്ഞു. ഈ സാഹചര്യത്തിൽ വെറുതെയിരിക്കാൻ കഴിയില്ലെന്നും അദ്ദേഹം പറഞ്ഞു.



Also Read: സംസ്ഥാനത്ത് വീരപ്പൻ ഭരണം; മുട്ടിൽ മരം മുറിയിൽ സിപിഐക്കും സിപിഎമ്മിനും പങ്ക്: കെ സുരേന്ദ്രൻ

ഡൽഹിയിലെ വിവിധ ആശുപത്രികളിലായി തയ്യാറാക്കിയ 22 പുതിയ ഓക്സിജൻ പ്ലാൻ്റുകളുട ഉദ്ഘാടനം നിര്‍വഹിച്ചു കൊണ്ട് സംസാരിക്കുകായയിരുന്നു അദ്ദേഹം. 9 ആശുപത്രികളിൽ പുതുതായി നിര്‍മിച്ച പ്ലാൻ്റുകള്‍ കൊവിഡ് പ്രതിരോധത്തിൽ സഹായകമാകുമെന്നും കെജ്രിവാള്‍ പറഞ്ഞു.

Also Read: കേരളം വാക്സിൻ വീടുകളിലെത്തിക്കുന്നു; മറ്റ് സംസ്ഥാനങ്ങൾക്ക് നടപ്പാക്കാൻ എന്താണ് തടസമെന്ന് ബോംബെ ഹൈക്കോടതി

കൊവിഡ് 19 മൂന്നാം തരംഗത്തെ പ്രതിരോധിക്കേണ്ടതുണ്ടെന്നും വെറുതെ ഇരുന്നാൽ ഇതിനു വലിയ വില കൊടുക്കേണ്ടി വരുമെന്നും കെജ്രിവാള്‍ വ്യക്തമാക്കി. മൂന്നാം തരംഗമുണ്ടായാൽ നേരിടാനായി ഓക്സിജൻ ടാങ്കറുകളും ഡൽഹി സര്‍ക്കാര്‍ സന്നദ്ധമാക്കിയിട്ടുണ്ട്. രണ്ടാം തരംഗം നേരിടുന്നതിൽ ജനങ്ങള്‍ ഒറ്റക്കെട്ടായി നിന്നെന്നും വ്യവസായമേഖലയിൽ നിന്ന് വലിയ പിന്തുണ ലഭിച്ചെന്നും മുഖ്യമന്ത്രി പറഞ്ഞു. ജനങ്ങളുടെ അച്ചടക്കമാണ് രോഗവ്യാപനം തടയാൻ സഹായകമായതെന്നും കെജ്രിവാള്‍ വ്യക്തമാക്കി. കൊവിഡ് 19 മൂന്നാം തരംഗം ഉണ്ടാകാതിരിക്കാൻ നമുക്ക് പ്രാര്‍ഥിക്കാമെന്നും എന്നാൽ തരംഗമുണ്ടായാൽ ഒറ്റക്കെട്ടായി നേരിടണമെന്നും ഡൽഹി മുഖ്യമന്ത്രി കൂട്ടിച്ചേര്‍ത്തു.