കടകളും മാളുകളും തുറക്കാം; ലോക്ക് ഡൗൺ നിയന്ത്രണങ്ങളിൽ ഇളവുകളുമായി ഡൽഹി

ന്യൂഡല്‍ഹി: കൊവിഡ് കേസുകള്‍ കുറയുന്ന സാഹചര്യത്തില്‍ ലോക്ക് ഡൗൺ നിയന്ത്രണങ്ങളില്‍ ഇളവ് പ്രഖ്യാപിച്ച് ഡൽഹി. കടകള്‍, മാളുകള്‍, റെസ്റ്റോറന്‍റുകള്‍ എന്നിവയ്ക്കാണ് മുഖ്യമന്ത്രി അരവിന്ദ് കെജ്രിവാൾ ഇളവ് പ്രഖ്യാപിച്ചത്. മാളുകളും മാർക്കറ്റുകളും നാളെ മുതൽ ദിവസവും തുറന്ന് പ്രവർത്തിക്കാം. രാവിലെ 10മുതൽ രാത്രി 8 വരെയാണ് പ്രവർത്തനാനുമതി.

ഓൺലൈൻ വാർത്താ സമ്മേളനത്തിലാണ് കെജ്രിവാൾ ഇക്കാര്യം വ്യക്തമാക്കിയത്. ഒരാഴ്ചക്കാലത്തേക്ക് പരീക്ഷണാടിസ്ഥാനത്തിലാണ് ഇളവുകള്‍ അനുവദിച്ചിരിക്കുന്നത്. കൊവിഡ് കേസുകള്‍ ഉയരുകയാണെങ്കില്‍ വീണ്ടും നിയന്ത്രണങ്ങൾ ഏർപ്പെടുത്തുമെന്നും മുഖ്യമന്ത്രി പറഞ്ഞു.

Also Read : ഐഷയ്ക്ക് പിന്തുണ; ലക്ഷദ്വീപ് ബിജെപിയിൽ കൂട്ട രാജി തുടരുന്നു; 15 പേർ പാർട്ടി വിട്ടു



മെയ് 31 മുതലാണ് ഡൽഹി ഘട്ടംഘട്ടമായുള്ള അൺലോക്ക് പ്രക്രീയ ആരംഭിച്ചത്. കഴിഞ്ഞയാഴ്ച കടകൾക്ക് ഒന്നിടവിട്ട ദിവസങ്ങളിൽ പ്രവർത്തനാനുമതി നൽകിയിരുന്നു. ഈ നിയന്ത്രണങ്ങളിൽ മാറ്റം വരുത്തിയാണ് നാളെ മുതൽ എല്ലാ ദിവസവും പ്രവർത്തിക്കാമെന്ന് സർക്കാർ വ്യക്തമാക്കിയിരിക്കുന്നത്.

സ്വകാര്യ ഓഫീസുകൾക്ക് രാവിലെ 9 മുതൽ വൈകീട്ട് 5വരെ 50 ശതമാനം ജീവനക്കാരെ മാത്രം ഉൾക്കൊള്ളിച്ച് പ്രവർത്തിക്കാം. റെസ്റ്റോറന്‍റുകളിൽ 50 ശതമാനം പേര്‍ക്ക് മാത്രമായിരിക്കും പ്രവേശന അനുമതി. സ്കൂൾ, കോളേജുകൾ, മറ്റു വിദ്യാഭ്യാസ സ്ഥാപനങ്ങൾ എന്നിവ അടഞ്ഞ് കിടക്കും.

Also Read : ഐഎസിൽ ചേർന്നവരെ തിരികെ കൊണ്ടുവരില്ല; നിലപാടിൽ ഉറച്ച് കേന്ദ്രം

പൊതുസമ്മേളനങ്ങള്‍ക്കും ആഘോഷങ്ങള്‍ക്കും ഏർപ്പെടുത്തിയ നിരോധനം തുടരും. പാര്‍ക്ക്, ജിം, സ്പാ, തിയേറ്റര്‍, സ്റ്റേഡിയം, സ്‌പോര്‍ട്‌സ് കോംപ്ലക്‌സ് എന്നിവ അടഞ്ഞുകിടക്കും. കേസുകള്‍ ക്രമാനുഗതമായി കുറയുകയാണെങ്കില്‍ പതിയെ ജീവിതം പഴയനിലയിലേക്കെത്തുമെന്നും കെജ്‌രിവാള്‍ പറഞ്ഞു.