ശ്രീലങ്കയില്‍ നിന്ന് ആയുധങ്ങളുമായി ബോട്ട് എത്തുന്നുവെന്ന് വിവരം; തീരങ്ങളിൽ അതീവ സുരക്ഷ

ചെന്നൈ: ശ്രീലങ്കയിൽ നിന്ന് ആയുധങ്ങളുമായി ബോട്ട് എത്തുന്നുവെന്ന വിവരത്തെ തുടർന്ന് തമിഴ്നാട്-കേരള തീരങ്ങളിൽ അതീവ സുരക്ഷാ നിർദേശം. തമിഴ്നാട് പോലീസും സെൻട്രൽ ഇന്‍റലിജൻസ് ഏജൻസികളുമാണ് തീരത്ത് സുരക്ഷ ശക്തമാക്കിയതെന്ന് ഇംഗ്ലീഷ് വാർത്താ ചാനലായ ന്യൂസ്18യാണ് റിപ്പോർട്ട് ചെയ്തത്.



ആയുധങ്ങളുമായി ബോട്ട് വരുന്നെന്ന രഹസ്യാന്വേഷണ ഏജൻസികളുടെ വിവരത്തിന്‍റെ അടിസ്ഥാനത്തിലാണ് സുരക്ഷ ശക്തമാക്കിയത്. ഇന്നലെ വൈകീട്ടോടെയാണ് പോലീസിന് വിവരം ലഭിച്ചതെന്നാണ് റിപ്പോർട്ട്. കോസ്റ്റ് ഗാർഡും നിരീക്ഷണം കർശനമാക്കിയിട്ടുണ്ട്.

Also Read : സംസ്ഥാനത്ത് അതിശക്തമായ മഴയ്ക്ക് സാധ്യത; രണ്ട് ദിവസം എല്ലാ ജില്ലകളിലും യെല്ലോ അലേർട്ട്



ആയുധങ്ങളുമായി ബോട്ട് രാമേശ്വരം തീരം ലക്ഷ്യമാക്കിയാണ് വരുന്നതെന്നാണ് രഹസ്യാന്വേഷണ ഏജന്‍സികള്‍ക്ക് ലഭിച്ച വിവരം. അതേസമയം ബോട്ടിലുള്ള ആളുകളെക്കുറിച്ചോ ഇവർ ഏത് സംഘടനയുമായി ബന്ധമുള്ളവരാണെന്നോ എന്നതിൽ വ്യക്തത ഇല്ലെന്നാണ് ഐഎഎൻഎസ് റിപ്പോർട്ട് ചെയ്യുന്നത്.

കന്യാകുമാരി, തൂത്തിക്കുടി, രാമേശ്വരം, ചെന്നൈ എന്നിവിടങ്ങളിലെ തീരപ്രദേശത്താണ് സുരക്ഷ ശക്തമാക്കിയിരിക്കുന്നത്. മുന്നറിയിപ്പ് ലഭിച്ചിട്ടുണ്ടെന്ന് ചെന്നൈ പോലീസ് ഹെഡ് ക്വാട്ടേഴ്സിലെ മുതിർന്ന ഉദ്യോഗസ്ഥൻ പറഞ്ഞതായി ഐഎഎൻഎസ് റിപ്പോർട്ടിലുണ്ട്. സായുധരായ പോലീസ് സംഘത്തെ പ്രദേശത്ത് വിന്യസിച്ചതായും കൂടുതൽ വിവരങ്ങൾ ഇപ്പോൾ വെളിപ്പെടുത്താൻ ആകില്ലെന്നുമാണ് ഉദ്യോഗസ്ഥൻ പ്രതികരിച്ചത്.

Also Read : ‘യുഡിഎഫ് കയ്യും കെട്ടി നോക്കിയിരിക്കില്ല’; രമ്യ ഹരിദാസിനെ ഭീഷണിപ്പെടുത്തിയതിൽ വിഡി സതീശൻ



കേന്ദ്ര ഏജൻസികളിൽ നിന്ന് വിവരം ലഭിച്ചതോടെ സംസ്ഥാനത്തെ തീരപ്രദേശങ്ങളിൽ ജാഗ്രത പുലർത്തുന്നതായി കേരള പോലീസിന്‍റെ രഹസ്യാന്വേഷണ വൃത്തങ്ങളും അറിയിച്ചു.