“മാമന്ദ് ഖിലാഫത്തിന് കീഴിലായിരുന്നപ്പോള്‍ ഞാന്‍ സന്തുഷ്‍ടയായിരുന്നു. ഖിലാഫത്ത് തെറ്റാണെന്ന് ഞാന്‍ പറയില്ല. കാരണം എനിക്ക് വളരെ സന്തുഷ്‍ടമായ ഒരു ജീവിതം ഉണ്ടായിരുന്നു. ഇപ്പോള്‍ സാഹചര്യം വ്യത്യസ്‍തമാണ്… ഈ നിമിഷം ഇവിടെ നിന്നിട്ട് ഒരു കാര്യവുമില്ല, അതേസമയം ഒരു ഖിലാഫത് ഉണ്ടായാല്‍ അങ്ങോട്ടേക്ക് പലയാനം ചെയ്യില്ലെന്ന് പറയാൻ എനിക്കാവില്ല” ആശയക്കുഴപ്പം നേരിട്ട ഒരു സ്‍കൂള്‍ കുട്ടിയെപ്പോലെ പുഞ്ചിരിയോടെ ഫാത്തിമ ഇസ പറയുന്നു.
2019ല്‍ ഇന്ത്യയില്‍ നിന്നുള്ള അന്വേഷണ ഉദ്യോഗസ്ഥര്‍ ചോദ്യം ചെയ്യുമ്പോഴായിരുന്നു ഫാത്തിമ ഇസയുടെ മറുപടി. ഈ അഭിമുഖം വീഡിയോ ആയി സ്ട്രാറ്റ്‍ന്യൂസ് ഗ്ലോബല്‍ എന്ന വെബ്‍സൈറ്റ് പുറത്തുവിട്ടിരുന്നു.
ഭീകരസംഘടന ഇസ്ലാമിക് സ്റ്റേറ്റ് അഫ്‍ഗാന്‍ മേഖലയില്‍ വ്യാപിച്ചത് ഇസ്ലാമിക് സ്റ്റേറ്റ് ഖൊറസാന്‍ എന്ന പേരിലാണ്. ഇറാനും അഫ്‍ഗാനും ഉള്‍പ്പെടുന്ന മധ്യേഷ്യയിലെ തന്ത്രപ്രധാനമായ മേഖലയാണ് ഖൊറസാന്‍. ഇവിടുത്തെ മാമന്ദ് എന്ന പട്ടണത്തിലേക്കാണ് 2016ല്‍ ഫാത്തിമ ഇസ, ഭര്‍ത്താവിനും മലയാളികളായ ഐ.എസ് ഭീകരവാദികള്‍ക്കും ഒപ്പം ഖിലാഫത്ത് ജീവിതം തേടിപ്പോയത്. കാബൂളിലെ ജയിലിലാണ് യാത്ര അവസാനിച്ചത്.
—
“പ്രധാനമന്ത്രി നരേന്ദ്ര മോദി കനിവുള്ളയാളാണെന്നാണ് ഞാന്‍ കേട്ടത്. എനിക്ക് അദ്ദേഹത്തില്‍ സമ്പൂര്‍ണ വിശ്വാസമുണ്ട്. …മോദിയെ കണ്ട് നിവേദനം നല്‍കണം, പക്ഷേ, ആരും സഹായിക്കാനില്ല. ഞാന്‍ സുപ്രീംകോടതിയിലെ അഭിഭാഷകരെ സമീപിച്ചിരുന്നു. നിയമവഴികളുണ്ടെന്നാണ് അവര്‍ പറഞ്ഞത്” ഫാത്തിമ ഇസയെ മടക്കിക്കൊണ്ടുവരാനുള്ള ശ്രമത്തെക്കുറിച്ച് അമ്മ ബിന്ദു, വാര്ത്താ ഏജന്‍സി പി.ടി.ഐയോട് ജൂൺ 13ന് പറഞ്ഞു.
അഫ്‍ഗാനിസ്ഥാന്‍ ജയിലില്‍ കഴിയുന്ന നാല് മലയാളി സ്ത്രീകളെയും മടക്കിക്കൊണ്ടുവരാനില്ലെന്ന് കേന്ദ്ര സര്‍ക്കാര്‍ നിലപാട് സ്വീകരിച്ചെന്ന് ദ് ഹിന്ദു ദിനപത്രമാണ് റിപ്പോര്‍ട്ട് ചെയ്‍തത്.
“എനിക്ക് അമ്മയോട് കാര്യമായി ഒന്നും പറയാനില്ല. സത്യത്തില്‍ അമ്മയുടെ ആഗ്രഹമാണ് എന്നെ കാണണം എന്നത്.” ഫാത്തിമ ഇസ തുടരുന്നു;
“…അഫ്‍ഗാനിസ്ഥാന്‍ അല്ല എന്‍റെ സ്ഥലം. ഇന്ത്യയായിരുന്നു എന്‍റെ സ്ഥലം. എന്നെ അവര്‍ ജയിലില്‍ ഇടില്ലെന്നും അടിച്ചമര്‍ത്തില്ലെന്നും ഉറപ്പുണ്ടെങ്കില്‍ ഞാൻ തിരിച്ചുപോകാൻ ആഗ്രഹിക്കുന്നുണ്ട്. … എനിക്ക് ഭര്‍ത്താവിന്‍റെ കുടുംബത്തെയും എന്‍റെ കുടുംബത്തെയും ആശ്രയിക്കാന്‍ പറ്റില്ല. എനിക്കൊരു വരുമാനം വേണമല്ലോ. അള്ളാ ഇതുവരെ എന്നെ സഹായിച്ചതുപോലെ ഇനിയും തുടരും എന്നാണ് ഞാൻ കരുതുന്നത്”
—
ഫാത്തിമ ഇസ, ഒരു ആഗോള പ്രശ്‍നത്തിന്‍റെ ചെറിയൊരു ശിഖരം മാത്രമാണ്. ഇസ്ലാമിക് സ്റ്റേറ്റിന്‍റെ പതനത്തോടെ സിറിയയിലും ഇറാഖിലും അഫ്‍ഗാനിസ്ഥാനിലും എല്ലാമായി ബാക്കിയാക്കപ്പെട്ട ലക്ഷങ്ങളില്‍ ഒരാള്‍ മാത്രം. യൂറോപ്പും, യു.എസും സമാനമായ പ്രശനങ്ങള്‍ നേരിടുന്നു. അതുകൊണ്ട് തന്നെ ഫാത്തിമ ഇസയെ കൈയ്യൊഴിയാന്‍ ഇന്ത്യയ്‍ക്ക് അധികം ബുദ്ധിമുട്ടുകളില്ല.
മോചിപ്പിക്കപ്പെട്ട ഇസ്ലാമിക് സ്റ്റേറ്റ് അധീന പ്രദേശങ്ങളില്‍ 52,808 ഫാത്തിമ ഇസയെപ്പോലെയുള്ള വിദേശികള്‍ തുടരുന്നുണ്ടെന്നാണ് ഐ.സി.എസ്.ആര്‍ (ഇന്‍റര്‍നാഷണല്‍ സെന്‍റര്‍ ഫോര്‍ സ്റ്റഡി ഓഫ് റാഡിക്കലൈസേഷൻ) 2019ല്‍ പുറത്തുവിട്ട റിപ്പോര്‍ട്ട് പറയുന്നത്. അഫ്‍ഗാനിസ്ഥാനില്‍ 2200 ഐ.എസ് ഭീകരവാദികള്‍ ഉണ്ടെന്നാണ് ഫെബ്രുവരിയില്‍ ഐക്യരാഷ്ട്ര സഭ പുറത്തുവിട്ട കണക്കുകള്‍. ഇസ്ലാമിക് സ്റ്റേറ്റ് അംഗങ്ങളില്‍ 13 ശതമാനം സ്ത്രീകളാണ്. ഏതാണ്ട് അത്രയും തന്നെ ശതമാനം കുട്ടികളും.
2019 നവംബറില്‍ ആണ് അഫ്‍ഗാനിസ്ഥാനിലെ ഇസ്ലാമിക് സ്റ്റേറ്റ് ഭീകരവാദികളും കുടുംബങ്ങളും കീഴടങ്ങിയത്. 600 പേര്‍ കീഴടങ്ങിയതയില്‍ 13 പേരായിരുന്നു ഇന്ത്യക്കാര്‍. ഇവരെ ഇന്ത്യയിലേക്ക് നാടുകടത്താന്‍ ചര്‍ച്ചകള്‍ നടന്നിരുന്നു. — ഇക്കണോമിക് ടൈംസ് റിപ്പോര്‍ട്ട് ചെയ്‍തു.
ഫാത്തിമ ഇസയുടെ ഭര്‍ത്താവ് ബെക്സിന്‍, ആയിഷ (മുൻപ് സോണിയ സെബാസ്റ്റ്യൻ) യുടെ ഭര്‍ത്താവ് അബ്‍ദുള്‍ റഷീദ് അബ്‍ദുള്ള, ഷിഹാസ് കല്ലുകെട്ടിയപുരയില്‍, ബെക്സിന്‍റെ സഹോദരനനും മറിയ (മെറിന്‍ ജേക്കബ്) ത്തിന്‍റെ ഭര്‍ത്താവുമായ യഹിയ (ബെസ്റ്റിന്‍) തുടങ്ങിയവര്‍ അഫ്‍ഗാനിസ്ഥാനില്‍ കൊല്ലപ്പെട്ടതായാണ് റിപ്പോര്‍ട്ടുകള്‍.
—
സിറിയയിലെ 300ഓളം ക്യാമ്പുകളിലും ജയിലുകളിലുമായി കഴിയുന്ന 43,000ത്തോളം വരുന്ന വിദേശികളെ തിരികെ കൊണ്ടുപോകണമെന്ന് 57 രാജ്യങ്ങളോട് ഐക്യരാഷ്ട്ര സംഘടന കഴിഞ്ഞ ഫെബ്രുവരിയില്‍ ആവശ്യപ്പെട്ടിരുന്നു. ഇതില്‍ 27,500 പേര്‍ കുട്ടികളാണെന്നാണ് അന്താരാഷ്ട്ര മനുഷ്യാവകാശ സംഘടന ഹ്യൂമൻ റൈറ്റ്‍സ് വാച്ച് മാര്‍ച്ചില്‍ വ്യക്തമാക്കിയത് . ഐ.എസ് അനുകൂലികളാണെങ്കിലും ഇവരില്‍ ആര്‍ക്കും ഇതുവരെ കോടതി വിചാരണ പോലും സിറിയ നല്‍കിയിട്ടില്ല. ഇത് മനുഷ്യാവകാശ ലംഘനമാണെന്നും എച്ച്‍.ആര്‍.ഡബ്ല്യു കുറ്റപ്പെടുത്തുന്നു.
കസാഖ്‍സ്ഥാന്‍, കൊസോവോ, റഷ്യ, ഉസ്‍ബെക്കിസ്ഥാന്‍ രാജ്യങ്ങള്‍ 1200 പേരെ തിരികെ കൊണ്ടുപോയി — വിവിധ മാധ്യമങ്ങള്‍ റിപ്പോര്‍ട്ട് ചെയ്യുന്നു. ഫ്രാൻസ് കുട്ടികളെ മാത്രമേ കൊണ്ടുപോകു എന്ന നിലപാടാണ് സ്വീകരിച്ചത്. 2021 ജനുവരി വരെ 35 കുട്ടികളെയാണ് ഫ്രാൻസ് രാജ്യത്ത് എത്തിച്ചത്. ഇതില്‍ അധികവും ഫ്ര‍ഞ്ച് ജിഹാദികളുടെ അനാധരായ കുട്ടികളെയാണ് – ഫ്രാൻസ് 24 വാര്ത്താ ചാനല്‍ റിപ്പോര്‍ട്ട് ചെയ്യുന്നു. 2020 ഡിസംബറില്‍ ജര്‍മ്മനിയും ഫിൻലാൻഡും 5 അമ്മമാരെയും 18 കുട്ടികളെയും നാട്ടിലെത്തിച്ചു. സമാനമായ രക്ഷാപ്രവര്‍ത്തനം ബ്രിട്ടനും നടത്തിയിരുന്നു.
ഓസ്ട്രേലിയയും ന്യൂസിലന്‍ഡും തമ്മില്‍ ഇതേ വിഷയത്തില്‍ കൊമ്പുകോര്‍ത്തിരുന്നു. സുഹൈറ ഏദന്‍ എന്ന ഇസ്ലാമിക് സ്റ്റേറ്റ് അംഗത്തെ ന്യൂസിലന്‍ഡിലേക്ക് അയക്കാന്‍ തുര്‍ക്കി തീരുമാനിച്ചിരുന്നു. ശക്തമായ ഭാഷയിലാണ് ന്യൂസിലന്‍ഡ് പ്രധാനമന്ത്രി ജസീന്ത ആര്‍ഡേൻ പ്രതികരിച്ചത്.
ന്യൂസിലന്‍ഡില്‍ ജനിച്ച് ആറാം വയസ്സുമുതല്‍ ഓസ്ട്രേലിയയില്‍ ജീവിച്ച സുഹൈറ ഏദന്‍, ഐ.എസില്‍ ചേരാന്‍ പോയത് ഓസ്ട്രേലിയന്‍ പാസ്‍പോര്‍ട്ടില്‍ ആണ്. അതുകൊണ്ട് തന്നെ അവരെ ഏറ്റെടുക്കാന്‍ സൗകര്യമില്ലെന്നായിരുന്നു ജസീന്തയുടെ നിലപാട്. ഇതിന് മുൻപ് തന്നെ ഓസ്ട്രേലിയ സുഹൈറയുടെ പൗരത്വം റദ്ദാക്കിയിരുന്നു. ഗുരുതരമായ ആഭ്യന്തര സുരക്ഷയുടെ പ്രശനമാണിതെന്നായിരുന്നു ഓസ്ട്രേലിയയുടെ നിലപാട്. ഇതോടെ രാജ്യമില്ലാത്ത അവസ്ഥയിലായി സുഹൈറ. ഇതേ നയം തന്നെ കാനഡയും ബ്രിട്ടണും സ്വീകരിച്ചു.
15-ാം വയസ്സില്‍ ഐ.എസില്‍ ചേരാന്‍ പോയ ഷമീമ ബീഗം എന്ന പെൺകുട്ടി സിറിയയില്‍ നിന്ന് തിരികെ വരാന്‍ സര്‍ക്കാര്‍ സഹായം തേടിയത് വലിയ കോലാഹലമാണ് ഉണ്ടാക്കിയത്. ബ്രിട്ടണില്‍ പൊതുജനം കൂട്ടത്തോടെ ഷമീമയ്ക്ക് എതിരെ തിരിഞ്ഞു. അധികം വൈകാതെ സര്‍ക്കാര്‍ അവരുടെ പൗരത്വം റദ്ദാക്കി. സര്‍ക്കാരിന് എതിരെ കീഴ്‍ക്കോടതി വിധി വന്നെങ്കിലും, ഷമീമയുടെ വഴിയടച്ച് സുപ്രീംകോടതി ഉത്തരവിട്ടു.
—
മറ്റു രാജ്യങ്ങള്‍ നേരിടുന്നത് പോലെയുള്ള കടുത്ത സമ്മര്‍ദ്ദം ഇക്കാര്യത്തില്‍ ഇന്ത്യ നേരിടുന്നില്ല. സിറിയയിലല്ല, അഫ്‍ഗാനിസ്ഥാനിലാണ് ഇന്ത്യക്കാരായ ഐ.എസ് ഭീകരവാദികളും കുടുംബങ്ങളും ഉള്ളതെന്നതാണ് ഇതിന് കാരണം. ഇന്ത്യയും അഫ്‍ഗാനിസ്ഥാനും തമ്മില്‍ കുറ്റവാളികളെ കൈമാറുന്നതിനുള്ള വ്യവസ്ഥകള്‍ 2016 മുതല്‍ നിലവിലുണ്ട്.
ഫാത്തിമ ഇസ പറയുന്നതുപോലെ ഇന്ത്യയില്‍ വിചാരണ നേരിടില്ലെന്നതാണ് ഐ.എസ് ബന്ധമുള്ള വനിതകളുടെ നിലപാട് എങ്കില്‍ കേന്ദ്രസര്‍ക്കാര്‍, വിദേശ നിയമങ്ങള്‍ക്ക് തന്നെ പൗരന്മാരെ വിട്ടുകൊടുക്കാന്‍ ആണ് സാധ്യത. കാരണം മറ്റു രാജ്യങ്ങള്‍ നിലവില്‍ പിന്തുടരുന്ന നയം അതാണ്.
ഭീകരവാദ പ്രവര്‍ത്തനങ്ങളില്‍ ഏര്‍പ്പെട്ടവര്‍ വിചാരണം നേരിടണം എന്നത് തന്നെയാണ് അന്താരാഷ്ട്ര സംഘടനകളുടെയും നിലപാട്. പക്ഷേ, ഫാത്തിമയ്‍ക്കൊപ്പം ജയിലില്‍ കഴിയുന്ന ആയിഷ എടുക്കുന്ന നിലപാട്, തന്‍റെ ഭര്‍ത്താവ് ചെയ്‍ത കാര്യങ്ങളില്‍ പങ്കില്ലെന്നതാണ്. ഇസ്ലാമിക നിയമം അനുസരിച്ച് ജീവിക്കുക എന്ന ആശയത്തോടെ മാത്രമാണ് ഇന്ത്യ വിട്ടത്. ഐ.എസ് അതിക്രമങ്ങളില്‍ പങ്കില്ല. ഇപ്പോള്‍ ആശയം പിന്തുടരുന്നുമില്ല എന്നതാണ് ആയിഷ അഭിമുഖത്തിലും പറഞ്ഞത്. ഫാത്തിമ ഇസയുടെ മാതാവ് കോടതിയെ സമീപിച്ചാല്‍, ബ്രിട്ടണില്‍ ഷമീമ ബീഗം കേസിലുണ്ടായത് പോലെ സങ്കീര്‍ണമായ ഒരു നിയമപോരാട്ടമായിരിക്കും ഇന്ത്യയിലും പ്രതീക്ഷിക്കേണ്ടി വരിക.
***
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : india on repatriation of islamic state widows in afghanistan kerala mother seeks legal route
Malayalam News from malayalam.samayam.com, TIL Network
