എടച്ചേരി: നിര്‍മാണത്തിനിടെ കിണര്‍ ഇടിഞ്ഞ് മണ്ണിനിടയില്‍ പെട്ടയാള്‍ മരിച്ചു. കായക്കൊടി മയങ്ങിയില്‍ കുഞ്ഞമ്മദ് (55) ആണ് മരിച്ചത്. എടച്ചേരി പുതിയങ്ങാടി മുതിരക്കാട്ട് അമ്മദിന്റെ വീട്ടുപറമ്പിലാണ് ഇന്ന് രാവിലെ ദുരന്തമുണ്ടായത്. വീടിനോട് ചേര്‍ന്ന് നിര്‍മിച്ച പുതിയ കിണറിന്റെ പണി നടക്കുമ്പോള്‍ മേല്‍ഭാഗം ഇടിഞ്ഞ് തൊഴിലാളികളുടെ ദേഹത്തേക്ക് മണ്ണിടിഞ്ഞു വീഴുകയായിരുന്നു.
ഒരാളെ നാട്ടുകാരും അഗ്‌നിശമന സേനയും ചേര്‍ന്ന് രക്ഷപ്പെടുത്തി. ജെ.സി.ബി.ഉപയോഗിച്ച് മണിക്കൂറുകള്‍ നീണ്ട പരിശ്രമത്തിനിടയിലാണ് കുഞ്ഞമ്മദിന്റെ മൃതദേഹം പുറത്തെടുത്തത്.
കുഞ്ഞമ്മദ് നേരത്തെ കര്‍ണാടകയിലെ ഹുബ്ലിയില്‍ ഹോട്ടല്‍ വ്യാപാരിയായിരുന്നു. ഭാര്യ: ആസ്യ, മക്കള്‍: അസ്മര്‍, അര്‍ഷാദ്, ഷബാന ആസ്മി, നഹ്‌റ, മിന്‍ഹ ഫാത്തിമ. സഹോദരങ്ങള്‍: ഖദീജ , സഫിയ , നൗഷാദ് , നൗഫല്‍ , സക്കീന.
