‘മദ്യശാലകള്‍ മാത്രം തുറന്നത് അശാസ്ത്രീയം’; ആരാധനാലയങ്ങള്‍ തുറക്കണമെന്ന് സുധാകരൻ

തിരുവനന്തപുരം: കേരളത്തിൽ ലോക്ക് ഡൗൺ പിൻവലിച്ച സാഹചര്യത്തിൽ ആരാധനാലയങ്ങള്‍ തുറക്കണമെന്ന ആവശ്യവുമായി കെപിസിസി പ്രസിഡൻ്റ് കെ സുധാകരൻ. പ്രോട്ടോകോള്‍ പാലിച്ചു കൊണ്ട് സിനിമാ തീയേറ്ററുകള്‍ക്ക് ഉള്‍പ്പെടെ പ്രവര്‍ത്തിക്കാൻ അനുമതി നല്‍കണമെന്ന് കെ സുധാകരൻ ആവശ്യപ്പെട്ടു. വലിയ പ്രതിസന്ധിയുടെ സമയത്ത് മദ്യശാലകള്‍ മാത്രം തുറന്നു കൊടുത്തത് അശാസ്ത്രീയ നടപടിയാണെന്നും സുധാകരൻ ആവശ്യപ്പെട്ടു.



മദ്യശാലകള്‍ തുറക്കുകയും ആരാധനാലയങ്ങള്‍ അടച്ചിടുകയും ചെയ്യുന്നതിൻ്റെ യുക്തി എന്താണെന്ന് കെ സുധാകരൻ ചോദിച്ചു. ടിപിആര്‍ അടിസ്ഥാനത്തിൽ ലൈബ്രറികളും സിനിമാ തീയേറ്ററുകളും ആരാധനാലയങ്ങളും ഉള്‍പ്പെടെയുള്ള പൊതുസംവിധാനങ്ങള്‍ തുറന്നു പ്രവര്‍ത്തിക്കാൻ അനുമതി നല്‍കണമെന്നാണ് സുധാകരൻ്റെ ആവശ്യം. പൊതുഇടങ്ങള്‍ തുറക്കുന്നതു സംബന്ധിച്ച സര്‍ക്കാര്‍ മനദണ്ഡം വ്യക്തമാക്കണമെന്നും സുധാകരൻ ആവശ്യപ്പെട്ടു. ജനങ്ങള്‍ക്ക് പ്രയോജനപ്പെടുന്ന പല സ്ഥാപനങ്ങളും അടഞ്ഞു കിടക്കുകയാണെന്നും അദ്ദേഹം ചൂണ്ടിക്കാട്ടി.

Also Read: കേരളത്തിൽ ഇന്ന് 11361 പേര്‍ക്ക് കൊവിഡ് സ്ഥിരീകരിച്ചു; 24 മണിക്കൂറിനുള്ളിൽ 90 മരണം

ടിപിആറിലും കൊവിഡ് കേസുകളുടെ എണ്ണവും കേരളത്തെക്കാള്‍ അധികമുണ്ടായിരുന്ന പല സംസ്ഥാനങ്ങളിലെയും ജനജീവിതം സാധാരണ നിലയിൽ എത്തിയെന്നും എന്നാൽ കേരളത്തിൽ ഇപ്പോഴും കൊവിഡ് ഭീതിയുണ്ടെന്നും സുധാകരൻ പറഞ്ഞു. പൊതുഗതാഗതത്തിൻ്റെ കാര്യത്തിലും സര്‍ക്കാര്‍ സമീപനം പ്രായോഗികമല്ലെന്നും സുധാകരൻ വ്യക്തമാക്കി. കൊവിഡ് മാനദണ്ഡങ്ങള്‍ പാലിച്ച് കൂടുതൽ പേര്‍ക്ക് യാത്ര ചെയ്യാനുള്ള സംവിധാനമൊരുക്കണമെന്നും കെപിസിസി അധ്യക്ഷൻ ആവശ്യപ്പെട്ടു.

Also Read: ചെന്നിത്തല ദേശീയ രാഷ്‌ട്രീയത്തിലേക്കോ? പദവികൾ എന്താകും, സാധ്യതകൾ ശക്തമാക്കി രാഹുലുമായുള്ള കൂടിക്കാഴ്‌ച

വാരാന്ത്യ ലോക്ക് ഡൗൺ സാമാന്യബോധത്തിനു നിരക്കുന്നതല്ലെന്ന് സുധാകരൻ പറഞ്ഞു. വെള്ളിയാഴ്ചത്തെ തിക്കും തിരക്കും സൂപ്പര്‍ സ്പ്രെഡിനു വഴിയൊരുക്കും. ടിപിആറിൻ്റെ അടിസ്ഥാനത്തിൽ ലോക്ക് ഡൗൺ പ്രഖ്യാപിക്കുകയും ഇളവുകള്‍ നല്‍കുകയും ചെയ്യുന്നതിൽ അപ്പുറം സര്‍ക്കാരിന് ദീര്‍ഘവീക്ഷണമില്ലെന്നും കെ സുധാകരൻ കുറ്റപ്പെടുത്തി.