മുടി കൊഴിച്ചില്‍ പലരേയും അലട്ടുന്ന പ്രശ്‌നമാണ്. എന്നാല്‍ പലപ്പോഴും സ്ത്രീകളില്‍ ഇത് കൂടുതലായി കണ്ടു വരുന്നു. പല സ്ത്രികളേയും ചെറുപ്പത്തില്‍ തന്നെ അലട്ടുന്ന പ്രശ്‌നമാണ് മുടി കൊഴിയുക എന്നത്. മുടി കൊഴിച്ചില്‍ സ്ത്രീകളെ അലട്ടാന്‍ പല കാരണങ്ങളുമുണ്ട്. ഒരു വ്യക്തിയിൽ നിന്ന് ശരാശരി 40 മുതൽ 100 മുടികൾ വരെ ഒരു ദിവസം കൊഴിഞ്ഞു പോകുന്നത് സ്വാഭാവികമാണെന്നാണ് പഠനങ്ങൾ പറയുന്നത്. എന്നാൽ അതിലും അധികമായി മുടി കൊഴിയുന്നുണ്ടെങ്കിൽ തീർച്ചയായും ശ്രദ്ധിക്കണം. ശരിയായ ആരോഗ്യം കാത്തു സൂക്ഷിച്ചാൽ മാത്രമേ ആരോഗ്യമുള്ള മുടിയും വളരുകയുള്ളൂ.ഇത്തരം ചില പ്രധാന കാരണങ്ങളെക്കുറിച്ചറിയൂ. കാരണമറിഞ്ഞ് ചികിത്സ തേടിയാലേ മുടി കൊഴിച്ചില്‍ തടയാനാകൂ എന്നു കൂടി ഓര്‍ക്കുക.

​ആരോഗ്യമുള്ള വ്യക്തിയിൽ

ആരോഗ്യമുള്ള വ്യക്തിയിൽ മൂന്ന് ഘട്ടങ്ങളിലായാണ് മുടിയുടെ വളർച്ച സംഭവിക്കുന്നത്. മുടിവളർച്ചയുടെ ആദ്യഘട്ടമായ അനാജന്‍ ആദ്യത്തെ രണ്ട് മുതൽ പത്ത് വർഷത്തിനുള്ളിൽ നടക്കുന്നു. മൊത്തം മുടി വളർച്ചയുടെ 90 ശതമാനവും ഈ ഘട്ടത്തിലാണ് സംഭവിക്കുന്നത്. രണ്ടാമത്തെ ഘട്ടം കാറ്റജന്‍ എന്നറിയപ്പെടുന്നു. ഒന്ന് മുതൽ രണ്ടാഴ്ച വരെയാണ് ഈ ഘട്ടത്തിൽ മുടി വളരുന്നത്. മുടി വളർച്ചയുടെ ഒരു ശതമാനം മാത്രമാണ് ഈ ഘട്ടത്തിൽ നടക്കുക. ടീലൊജന്‍ എന്നറിയപ്പെടുന്ന മൂന്നാമത്തെ ഘട്ടത്തിൽ മുടി വളർച്ച മന്ദീഭവിക്കും. അതായത് ഈ ഘട്ടത്തിൽ മുടിയുടെ വളർച്ച പൂർണ്ണമായും നിലയ്ക്കും. ഇതോടൊപ്പം ഈ ഘട്ടത്തിൽ മുടിക്ക് കറുപ്പ് നിറം നൽകുന്ന കോശങ്ങളുടെ പ്രവർത്തനവും കുറഞ്ഞുവരും. ടീലൊജന്‍ ഘട്ടത്തിൽ വളരുന്ന മുടിയ്ക്ക് പരമാവധി മൂന്ന് മാസം വരെയേ ആയുസ്സുള്ളൂ. മുടിയുടെ വളർച്ച ഏകദേശം 10 ശതമാനത്തിൽ താഴെ മാത്രമേ ഈ ഘട്ടത്തിൽ നടക്കുന്നുള്ളൂ.

ഹോർമോണുകളുടെ അളവ്

തൈറോയ്ഡ് ഗ്രന്ഥിയും പിറ്റ്യൂട്ടറി ഗ്രന്ഥിയും ഉത്പാദിപ്പിക്കുന്ന ഹോർമോണുകളുടെ അളവ് കുറയുന്നത് മുടികൊഴിച്ചിലിനു ഇടയാക്കും. ഹോർമോൺ അസന്തുലിതാവസ്ഥ മൂലമുണ്ടാകുന്ന പോളിസിസ്റ്റിക് ഓവേറിയന്‍ സിന്‍ഡ്രോം ഉള്ളവരിലും മുടി കൊഴിച്ചിൽ ധാരാളമായി കണ്ടു വരുന്നുണ്ട്. ദീര്‍ഘനേരം ഹെൽമറ്റ് ഉപയോഗിക്കുന്നവരിൽ മുടി കൊഴിച്ചിൽ അധികമായിരിക്കും. ഹെൽമറ്റ് തലയിൽ അമർന്ന് ശിരോചർമ്മം വിയർക്കുകയും അഴുക്കും പൊടിയും അടിഞ്ഞ് താരനും മുടി കൊഴിച്ചിലും ഉണ്ടാകുകയും ചെയ്യും.

​അമ്മയായ ശേഷം

അമ്മയായ ശേഷം മിക്ക സ്ത്രീകളുടെയും പരാതിയാണ് അമിതമായ മുടി കൊഴിച്ചിൽ. ഗർഭകാലത്ത് മുടി കൊഴിച്ചിൽ അത്ര കാര്യമായി സംഭവിക്കുന്നില്ലെങ്കിലും പ്രസവശേഷം ഇത് പ്രകടമായ അവസ്ഥയിലേയ്ക്ക് നീങ്ങും. അതായത് പ്രസവം കഴിഞ്ഞ് ഏതാണ്ട് മൂന്ന് മാസമാകുമ്പോഴേയ്ക്കും ശക്തമായ മുടി കൊഴിച്ചിൽ അനുഭവപ്പെട്ട് തുടങ്ങും. ഗർഭകാലത്ത് ഈസ്ട്രജന്‍, കോര്‍ട്ടിസാള്‍ തുടങ്ങിയ ഹോര്മോണുകളുടെ പ്രവർത്തനം ത്വരിതഗതിയിൽ നടക്കുന്നതിനാൽ മുടിവളർച്ചയും വേഗത്തിൽ നടക്കും. എന്നാൽ പ്രസവം കഴിയുന്നതോടെ ഈ ഹോർമോണുകളുടെ പ്രവർത്തനം സാധാരണ നിലയിലേയ്ക്ക് വരുകയും മുമ്പ് വളർന്ന മുടിയിഴകൾ അതിവേഗത്തിൽ കൊഴിയാന്‍ തുടങ്ങുകയും ചെയ്യും. പ്രസവശേഷമുള്ള ക്രമാതീതമായ മുടികൊഴിച്ചിൽ കണ്ട്‌ പേടിക്കേണ്ടതില്ല. പ്രസവാനന്തര ചികിത്സകളും പോഷക ഗുണങ്ങളുള്ള ആഹാരശീലവും പിന്തുടരുന്നത് വഴി പ്രസവശേഷമുള്ള മുടി കൊഴിച്ചിലിന്‌ പരിഹാരം കണ്ടെത്താം.

മാനസിക സംഘർഷങ്ങൾ

വീട്ടിൽ നിന്നും ജോലി സ്ഥലത്തു നിന്നും ഉണ്ടാകുന്ന പല തരത്തിലുള്ള മാനസിക ബുദ്ധിമുട്ടുകൾ മുടി വളർച്ചയെ എങ്ങനെ ബാധിക്കുമെന്ന് പലരും ആശ്ചര്യപ്പെടാറുണ്ട്. ഇതിലല്പം കാര്യമുണ്ട്. മുടിയുടെ വളർച്ച മെല്ലെയാകുന്നതിനും ക്രമേണ ഇത് മുടി കൊഴിച്ചിലിലേയ്ക്ക് നയിക്കുന്നതിനും ഒരു പ്രധാനകാരണം മാനസിക പിരിമുറുക്കങ്ങളാണ്. ഇത്തരം മാനസിക സംഘർഷങ്ങൾ കാരണം ചെറിയ സമയത്തിനുള്ളിൽ മുടി ധാരാളം കൊഴിയുന്നത് കണ്ടു വരുന്നുണ്ട്. അതായത് വളർന്നു കൊണ്ടിരിക്കുന്ന മുടിയുടെ കോശ വിഭജനം തടസ്സപ്പെട്ട് മുടി വളർച്ച പൂർണ്ണമായും വിശ്രമാവസ്ഥയിലേയ്ക്ക് നീങ്ങുന്നു. ഇത് മുടി കൊഴിച്ചിലിലേയ്ക്കും നയിക്കുന്നു. ടിലോജന്‍ എഫ്ളൂവിയം എന്നാണു ഈ അവസ്ഥ അറിയപ്പെടുന്നത്.

ആഹാരത്തിൽ

ആരോഗ്യമുള്ള ശരീരത്തിൽ മാത്രമേ ആരോഗ്യമുള്ള മുടിയും വളരുകയുള്ളൂ. ആഹാരത്തിൽ ഇരുമ്പിന്റെയും പ്രോട്ടീനിന്റെയും മാംസ്യത്തിന്റെയും അളവ് കുറയുമ്പോൾ മുടിയുടെ വളർച്ച മുരടിക്കും. ക്രമേണ മുടി കൊഴിച്ചിൽ ആരംഭിക്കുകയും ചെയ്യും. പോഷഗുണങ്ങൾ ധാരാളമുള്ള ഭക്ഷണങ്ങൾ ഡയറ്റിൽ ഉൾപ്പെടുത്തുന്നത് രോമവളർച്ചയെ പരിപോഷിപ്പിക്കും. ചില സ്ത്രീകൾ വണ്ണം കുറയ്ക്കുന്നതിന്റെ ഭാഗമായി ഭക്ഷണത്തിന്റെ അളവ് ക്രമാതീതമായി കുറയ്ക്കുന്നത് വഴി പോഷക ദാരിദ്ര്യത്തിലേക്ക് നീങ്ങുന്നു. ഇത് അമിത മുടി കൊഴിച്ചിലിലേയ്ക്കും നയിക്കും.

താരൻ

പല സ്ത്രീകളിലെയും മുടി കൊഴിച്ചിലിന്‌ പിന്നിലെ പ്രധാന വില്ലൻ താരൻ തന്നെയാണ്. ശിരോചർമ്മത്തിലെ (scalp) വൃത്തിയില്ലായ്മ തന്നെയാണ് താരനുണ്ടാകാനുള്ള അടിസ്ഥാന കാരണം. ശരീരത്തിൽ എണ്ണമയം ഉത്പാദിപ്പിക്കുന്ന ഗ്രന്ഥിയുടെ പ്രവർത്തനഫലമായി ശിരോചർമ്മത്തിലും എണ്ണമയം ഉണ്ടാകുകയും ക്രമേണ അതിൽ പൊടിയും അഴുക്കും അടിഞ്ഞു കൂടി താരൻ ഉണ്ടാകുകയും ചെയ്യും. വിയർപ്പുതുള്ളികൾ ശിരോചർമ്മത്തിലടിഞ്ഞും തലയിൽ താരൻ പെരുകാം. കൗമാരപ്രായത്തിൽ തന്നെ പലർക്കും താരന്റെ ശല്യം തുടങ്ങും.

മരുന്നുകളുടെ പ്രതിപ്രവർത്തനം

ഉറക്കകുറവും മുടി കൊഴിച്ചിലിന്റെ ഒരു പ്രധാന കാരണമാണ്. ഉറക്ക കുറവ് മൂലം മുടി കൊഴിയുക, മുടിയുടെ വളർച്ച നിൽക്കുക, മുടിയുടെ തിളക്കം കുറയുക തുടങ്ങിയവ സംഭവിക്കുന്നു. ഷാംപൂവിന്റെ അമിത ഉപയോഗവും മുടി ശക്തമായി തോർത്തുന്നതും മുടി കൊഴിച്ചിലിന്‌ കാരണമായേക്കാം.കുളി കഴിഞ്ഞ ശേഷം മുടിയുണക്കാന്‍ ഡ്രയര്‍ ഉപയോഗിക്കുന്നവരിൽ മുടികൊഴിച്ചില്‍ കൂടും. മുടിയിൽ പെര്‍മെനന്‍റ് കളറുകള്‍ കൂടുതലായി ഉപയോഗിക്കുന്നതും തുടർച്ചയായി ഹെയർ സ്‌ട്രെയിറ്റനിങ് നടത്തുന്നതും മുടി കൊഴിച്ചിലിന്‌ കാരണമാകും.ചില രോഗങ്ങൾക്ക് കഴിക്കേണ്ടി വരുന്ന മരുന്നുകളുടെ പ്രതിപ്രവർത്തനം മുടികൊഴിച്ചിലിന് രൂപത്തിലെത്താം.