വണ്ണപ്രയിലെ കെഎസ്ആർടിസി കണ്ടക്ടറെ മർദ്ദിച്ചതുമായി ബന്ധപ്പെട്ട് പിടിയിലായ പ്രതികളുടെ ഫോൺ പരിശോധിച്ചപ്പോഴാണ് വിവര ചോർച്ചയുടെ വഴി കണ്ട് അന്വേഷണ ഉദ്യോഗസ്ഥർ അമ്പരന്നത്. ഡിജിറ്റൽ തെളിവുകൾ ശേഖരിച്ച് പഴുതടച്ച അന്വേഷണത്തിലൂടെയാണ് അനസിനെതിരെ പോലീസ് നടപടി സ്വീകരിച്ചത്. 2021 ഡിസംബർ മാസത്തിലായിരുന്നു കേസിനാസ്പദമായ സംഭവം.
അനസിനെ പിരിച്ചുവിട്ട് മാസങ്ങൾക്കുള്ളിലാണ് സമാനമായ കേസിൽ മൂന്ന് ഉദ്യോഗസ്ഥർ അന്വേഷണം നേരിടുന്നത്. ഔദ്യോഗിക വിവരങ്ങളുടെ ചോർത്ത നിസാരമായല്ല ഉന്നത ഉദ്യോഗസ്ഥർ കാണുന്നത്. ദിവസങ്ങളായി മൂന്നാർ സ്റ്റേഷനിലെ മൂന്ന് ഉദ്യോഗസ്ഥരും രഹസ്യാന്വേഷണ വിഭാഗത്തിന്റെ നിരീക്ഷണത്തിലായിരുന്നുവെന്നാണ് വിവരം. സംഭവം പുറത്തായതിനെത്തുടർന്ന് ജില്ലാ പോലീസ് മേധാവി ആർ കുറുപ്പസ്വാമിയാണ് അന്വേഷണത്തിന് ഉത്തരവിട്ടത്.
ഔദ്യോഗിക വിവരങ്ങൾ ചോർത്തി നൽകുന്നത് ഗുരുതരമായ കുറ്റകൃത്യമായാണ് പോലീസ് കരുതുന്നതെന്ന് ഒരു ഉന്നത ഉദ്യോഗസ്ഥൻ സമയം മലയാളത്തോട് പറഞ്ഞു. ഏതെങ്കിലും ഒരു കേസുമായി ബന്ധപ്പെട്ട വിവരമോ മറ്റെന്തെങ്കിലും ഔദ്യോഗിക രേഖകളോ ചോർത്തുകയെന്നത് നിസാരമല്ല. ഔദ്യോഗിക കാര്യങ്ങളുടെ രഹസ്യാത്മകത സംരക്ഷിക്കുമെന്ന് സത്യപ്രതിജ്ഞ ചെയ്താണ് ഒരാൾ പോലീസുകാരനാകുന്നത്. ഒരു രാഷ്ട്രീയ പാർട്ടിക്കായാലും സംഘടനകൾക്കായാലും വ്യക്തിക്കായാലും ഔദ്യോഗിക വിവരം ചോർത്തി നൽകുന്നത് കുറ്റകൃത്യമാണെന്ന് അദ്ദേഹം പറഞ്ഞു. ഇത്തരം കേസുകളിൽ നടപടി നേരിട്ട ശേഷം സർവീസിൽ തിരികെയെത്തിയ ആളുകളെപ്പറ്റി തനിക്ക് അറിയില്ലെന്നും ഉദ്യോഗസ്ഥൻ പറഞ്ഞു.
സേനയിലെ ഉദ്യോഗസ്ഥരെ നിരീക്ഷിക്കുന്ന രഹസ്യാന്വേഷണ സംവിധാനം വളരെയധികം ശക്തമാണ്. സേനയിൽ വഴിവിട്ട നീക്കങ്ങൾ നടത്തുന്നവരെ കണ്ടെത്തുകയെന്നത് പ്രയാസമുള്ള കാര്യമല്ലെന്നും ഉന്നത ഉദ്യോഗസ്ഥൻ പ്രതികരിച്ചു.
മൂന്നാറിൽ ഉദ്യോഗസ്ഥരിൽ നിന്നും പിടിച്ചെടുത്ത ഫോണുകൾ പരിശോധിച്ചാൽ മാത്രമേ വിവര ചോർച്ചയുടെ തീവ്രത മനസിലാക്കാനാകൂ. വിശദ പരിശോധനയ്ക്ക് ഫോണുകൾ സൈബർ സെല്ലിന് കൈമാറിയിരിക്കുകയാണ്. തുടർച്ചയായി സേനയ്ക്കുള്ളിൽ ഔദ്യോഗിക വിവരങ്ങൾ ചോരുന്ന പശ്ചാത്തലത്തിൽ ‘ചാരന്മാരെ’ കണ്ടെത്താൻ പോലീസ് വിപുലമായ പദ്ധതി ആവിഷ്കരിക്കുമോയെന്നുള്ളത് വ്യക്തമല്ല.
