ആരോഗ്യവും സുന്ദരമായതുമായ ചർമ്മത്തിന് 3 യോഗാസനങ്ങൾ

ഓരോ കാലാവസ്ഥയിലും ചർമ്മത്തെ മനോഹരമായി നിലനിർത്താൻ അനുയോജ്യമായ ചർമ സംരക്ഷണ രീതികൾ ചെയ്യേണ്ടതുണ്ട്. കാലാവസ്ഥ ഏതായാലും ദിവസവും ധാരാളം വെള്ളം കുടിയ്ക്കുന്നത് ചർമത്തെ മനോഹരമാക്കും. അതുപോലെ ബോളിവുഡ് സുന്ദരി മലൈക അറോറയ്ക്കുമുണ്ട് പതിവായി തുടരുന്ന ഒരു ആരോഗ്യ ശീലം, മറ്റൊന്നുമല്ല, ചർമത്തിന് ആരോഗ്യവും സൗന്ദര്യവും നൽകുന്ന മൂന്ന് യോഗാസനങ്ങളാണ് മലൈക അറോറയുടെ തിളക്കത്തിന് പിന്നിൽ.

രക്തം ശുദ്ധീകരിക്കാനും ആരോഗ്യകരമായ ചർമ്മം നൽകാനും ഈ യോഗാ രീതികൾ സഹായിക്കും. തിളക്കമുള്ളതും മൃദുലവുമായ ചർമം ലഭിക്കുന്നതിനായി ഈ യോഗസനങ്ങൾ തുടർച്ചയായി ചെയ്തത് വളരെയധികം സഹായിച്ചു എന്നാണ് അവർ പറയുന്നത്. ശരീരത്തിൽ അത്രയും സ്വാധീനമുള്ള ആ രീതികൾ പരിചയപ്പെടാം.

1) സർവംഗാസനം:



ആദ്യം മലർന്ന് കിടന്ന്, ശേഷം കാലുകൾ മുകളിലേയ്ക്കുയർത്തി പുറം ഭാഗവും ഉയർത്തി ചുമലിലേയ്ക്ക് മുഴുവൻ ഭാരവും വരുന്ന രീതിയിലാണ് സർവ്വംഗാസനം ചെയ്യുന്നത്. ഇത് ശരീരത്തിന്റെ എല്ലാ ഭാഗങ്ങളുടെയും പ്രവർത്തനത്തെ സ്വാധീനിക്കുന്നു. മാനസികവും ശാരീരികവുമായ ആരോഗ്യം കാത്തുസൂക്ഷിക്കാൻ സഹായിക്കുന്നതിനാൽ ‘ആസനങ്ങളുടെ രാജ്ഞി’ എന്നും സർവംഗാസനം അറിയപ്പെടുന്നു.

തലകീഴായി നിൽക്കുന്ന ഈ രീതിയിൽ മുഖത്തേക്ക് രക്തപ്രവാഹം വർധിക്കുന്നു. കൂടാതെ തോളിലും പുറകിലും കരുത്ത് പകരുന്നതിനൊപ്പം ചർമ്മത്തിന്റെ ഗുണനിലവാരവും ഘടനയും മെച്ചപ്പെടുന്നതിനും ഇത് സഹായിക്കും.

എങ്ങനെ ചെയ്യാം:

*ആദ്യം മലർന്ന് കിടന്നുകൊണ്ട് നിങ്ങളുടെ കൈകൾ ഇരുവശങ്ങളിലും ചേർത്ത് വെയ്ക്കുക.

*ഇനി, നിങ്ങളുടെ കാലുകൾ, നിതംബം എന്നിവ എന്നിവ ഉയർത്തിപ്പിടിക്കുക.

*കൈമുട്ടുകൾ തറയിലേക്കും കൈകൾ നിങ്ങളുടെ പുറകിൽ സപ്പോർട്ട് ചെയ്തും കാലുകളും നട്ടെല്ലും നേരെയാക്കുക.

*ഇതിനിടയിൽ കഴുത്ത് തറയിലേക്ക് അമർത്താതിരിക്കാൻ ശ്രദ്ധിക്കുക

*ആഴത്തിൽ ശ്വസിക്കുന്നത് തുടരുക, ഈ പോസ് 30-60 സെക്കൻഡ് തുടരണം.

* സ്വാഭാവിക രീതിയിൽ വന്നതിനുശേഷം കുറഞ്ഞത് 60 സെക്കൻഡ് വിശ്രമിക്കുക.

സകല നാഡികളെയും ശുദ്ധീകരിക്കുന്ന നാഡിശുദ്ധി പ്രാണായാമം

2) ഹലാസനം:



ഇത് വളരെ ശാന്തമായ ഒരു യോഗാ രീതിയായി പരിഗണിക്കപ്പെടുന്നു. ഈ ആസനം തോളുകൾ, പുറം, കഴുത്ത് എന്നിവയ്ക്ക് പ്രാധാന്യം നൽകുന്നു. പുറകിലെ പാരാസ്പൈനൽ പേശികളിലേയ്ക്ക് സമ്മർദ്ദം വരുന്നതിനാൽ നടുവേദന ഒഴിവാക്കാനും ഇത് സഹായിക്കുമെന്ന് യോഗ വിദഗ്ധർ പറയുന്നു. മാനസിക സമ്മർദ്ദം കുറയ്ക്കുന്നതിനും മനസ്സിനെ ശാന്തമാക്കുന്നതിനും ദഹന പ്രക്രിയ മെച്ചപ്പെടുത്തുന്നതിനും ഇത് സഹായിക്കുന്നു, ഇവയെല്ലാം ചർമ്മത്തിന്റെ ആരോഗ്യത്തിലും മനോഹരിതയിലും അതിശയകരമായ സ്വാധീനം ചെലുത്തുന്നു.

ചെയ്യേണ്ട വിധം:

*ഇതിനായി ആദ്യം നിങ്ങളുടെ കൈകൾ നിലത്തു പതിച്ചു വെയ്ക്കുക. ശേഷം നിങ്ങളുടെ കൈപ്പത്തികളിലേക്കും കൈത്തണ്ടയിലേക്കും അമർത്തി കാലുകൾ 90 ഡിഗ്രിയിലേക്ക് ഉയർത്തുക.

*ഇങ്ങനെ താൽക്കാലികമായി നിർത്തിയ ശേഷം നിങ്ങളുടെ പിൻഭാഗം ഉയർത്തി നിങ്ങളുടെ കാൽവിരലുകൾ നിങ്ങളുടെ തലയ്ക്ക് പിന്നിൽ തറയിൽ തൊടുന്നതുവരെ കാലുകൾ തലയുടെ പിൻഭാഗത്തേയ്ക്ക് കൊണ്ടുവരിക.

*നിങ്ങളുടെ കാലുകൾ നേരെയായിരിക്കണം, നിങ്ങളുടെ കൈപ്പത്തികൾ ഒന്നിച്ച് വിരലുകൾ പരസ്പരം ബന്ധിപ്പിക്കണം.

*കഴുത്ത് നേരെയാക്കി മുകളിലേക്ക് നോക്കുക.

*അഞ്ച് തവണ ആഴത്തിൽ ശ്വസിക്കുന്നത് വരെ ഈ നിലയിൽ തുടരാൻ ശ്രമിക്കുക.

(നിങ്ങൾ യോഗയിൽ ഒരു തുടക്കക്കാരനാണെങ്കിൽ ഈ രീതി പരീക്ഷിക്കരുത്)

കഷ്ടപ്പെട്ട് വേണ്ട, ഇഷ്ടപ്പെട്ട് ചെയ്യാം സുംബ ഡാൻസ്

3) ത്രികോണാസനം:



നെഞ്ചും തോളും വിരിച്ചുവെച്ച് കാലുകൾ അകത്തി നിൽക്കുന്ന ഒരു രീതിയാണ് ത്രികോണാസനം. നെഞ്ച് തുറന്നുവെയ്ക്കുന്നത് ചർമ്മത്തിലേക്കുള്ള ഒക്സിജൻ ആഗിരണം മെച്ചപ്പെടുത്താൻ സഹായിക്കുന്നു. ചർമ്മത്തിന് ഗുണം ചെയ്യുന്നതിനൊപ്പം, നിങ്ങൾ പതിവായി പരിശീലിക്കുമ്പോൾ ഇത് കൈകൾ, കാലുകൾ, തുടകൾ എന്നീ ഭാഗങ്ങൾക്ക് ബലം നൽകുന്നു.

എങ്ങനെ ചെയ്യാം:

*ഈ യോഗ ചെയ്യുന്നതിനായി നിങ്ങളുടെ പാദങ്ങൾ 4 അടി വരെ വീതിയിൽ അകത്തി വയ്ക്കുക.

*ഇപ്പോൾ, നിങ്ങളുടെ വലതു കാൽ 90 ഡിഗ്രി, ഇടത് കാൽ 15 ഡിഗ്രി എന്നിങ്ങനെ തിരിക്കുക.

* ശേഷം ആഴത്തിൽ ശ്വസിക്കുക, ശ്വാസം എടുക്കുമ്പോൾ, നിങ്ങളുടെ ശരീരം വലതുവശത്തേക്ക് താഴേക്ക് വളച്ച് അരക്കെട്ട് നേരെയാക്കുക. നിങ്ങളുടെ ഇടത് കൈ ഉയർത്തി പിടിക്കണം. നിങ്ങളുടെ വലതു കൈ തറയിലേക്ക് താഴേക്ക്, ഒരു നേർരേഖയായി മാറുന്ന രീതിയിൽ വേണം പിടിക്കാൻ.

*നിങ്ങളുടെ വലതു കൈ കണങ്കാലിന് പുറത്തായി വെയ്ക്കുക.

*ദീർഘനേരം ആഴത്തിലുള്ള ശ്വാസം എടുക്കുന്നത് തുടരുക. മറുവശത്തും ഇത് ആവർത്തിക്കുക.