കുവൈറ്റ് സിറ്റി: കുവൈറ്റിലെ പ്രവാസികള്‍ക്ക് നാട്ടിലേക്ക് മടങ്ങുന്നതിന് നിലവിലുള്ള യാത്രാ വിലക്ക് നീക്കുന്നതുമായി ബന്ധപ്പെട്ടുള്ള നിര്‍ണായക യോഗം ഞായറാഴ്ച നടക്കും. ദേശീയ അസംബ്ലിയുടെ ഹെല്‍ത്ത് കമ്മിറ്റിയാണ് ആരോഗ്യ മന്ത്രി ശെയ്ഖ് ഡോ. ബാസില്‍ അല്‍ സബാഹുമായി ഇതേക്കുറിച്ച് ചര്‍ച്ച നടത്തുകയെന്ന് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു.

​വിദേശികള്‍ക്കുള്ള യാത്രാനുമതിയും പരിശോധിക്കും

ഇതോടൊപ്പം കുവൈറ്റ് അന്താരാഷ്ട്ര വിമാനത്താവളം വിദേശ സര്‍വീസുകള്‍ക്കായി തുറക്കുന്നതിനെ കുറിച്ചും വിദേശ യാത്രികള്‍ക്കുള്ള പ്രവേശന വിലക്ക് നീക്കുന്നതിനെ കുറിച്ചും യോഗം ചര്‍ച്ച ചെയ്യും. കൊവിഡ് പ്രതിരോധത്തിന്റെ ഭാഗമായി കഴിഞ്ഞ മൂന്നു മാസമായി പ്രവാസികള്‍ക്ക് യാത്രാ വിലക്ക് ഏര്‍പ്പെടുത്തിയിരിക്കുകയാണ് കുവൈറ്റ്. അതുകൊണ്ടു തന്നെ തിരിച്ചു വരാന്‍ കഴിയില്ലെന്ന ഭീതിയില്‍ പ്രവാസികള്‍ ആരും കുവൈറ്റിന് പുറത്തേക്ക് യാത്ര ചെയ്യുന്നില്ല. അതേസമയം, റെസിഡന്‍സ് വിസയുള്ള ആയിരക്കണക്കിനാളുകള്‍ കുവൈറ്റിലെത്താന്‍ കഴിയാതെ നാടുകളില്‍ കുടുങ്ങിക്കിടക്കുകയുമാണ്. വിദേശികള്‍ക്ക് യാത്രാ വിലക്ക് ഏര്‍പ്പെടുത്തിയത് മൂലം വിമാനത്താവളത്തിനുണ്ടായിട്ടുള്ള സാമ്പത്തിക നഷ്ടത്തെ കുറിച്ചും യോഗം ചര്‍ച്ച ചെയ്യും.

​പ്രവാസികളോടുള്ള വിവേചനം ഭരണഘടനാ വിരുദ്ധം

അതേസമയം, വാക്‌സിനെടുത്ത സ്വദേശികള്‍ക്ക് കുവൈറ്റിന് പുറത്തേക്ക് യാത്രാനുമതി നല്‍കുകയും വാക്‌സിനെടുത്ത പ്രവാസികള്‍ക്ക് അനുമതി നിഷേധിക്കുകയും ചെയ്യുന്ന കുവൈറ്റ് ഭരണകൂടത്തിന്റെ നടപടി വിവേചനപരവും ഭരണഘടനാ വിരുദ്ധവുമാണെന്ന ആക്ഷേപമുയര്‍ന്നു. നിയമവിദഗ്ധര്‍, മനുഷ്യാവകാശ പ്രവര്‍ത്തകര്‍ തുടങ്ങിയവര്‍ ഇതിനെതിരേ രംഗത്തു വന്നിരിക്കുകയാണ്. രാജ്യത്ത് കഴിയുന്ന എല്ലാവര്‍ക്കും നിയമത്തിനു മുമ്പില്‍ തുല്യത നല്‍കുമെന്ന ഭരണഘടനാ മൂല്യത്തിന് എതിരാണ് ഈ യാത്രാ വിലക്കെന്നാണ് അവരുടെ വാദം. നേരത്തേ പ്രവാസികള്‍ക്കെതിരായ യാത്രാ വിലക്ക് നീക്കണമെന്ന് ആവശ്യപ്പെട്ട് പാര്‍ലമെന്റ് അംഗങ്ങളും രംഗത്തു വന്നിരുന്നു.