ക്രിക്കറ്റ് താരങ്ങളുടെ പരിക്കിന്റെ കാരണം ഇതോ?

ക്രിക്കറ്റ് താരങ്ങൾക്ക് അടിക്കടി ഉണ്ടാകുന്ന പരിക്കിനെ കുറിച്ചും കാരണങ്ങളെ കുറിച്ചും ഇത് തടയാനാകുമോ എന്നുമൊക്കെ വിശദമാക്കുകയാണ്Dr. Sanjay Prasad Hedge(Orthopedic Consultant, Manipal Hospital, Varthur Road, Bengaluru).

അത്യധ്വാനം അത്, കളിക്കളത്തിൽ ആണെങ്കിലും കളിക്കളത്തിനു പുറത്താണെങ്കിലും അത് മനുഷ്യന്റെ ആരോഗ്യത്തെ പ്രതികൂലമായി ബാധിക്കും. പണിയുടെ കാഠിന്യമനുസരിച്ച് മനുഷ്യ ശരീരത്തിനു വളവ് വരെ ഉണ്ടാകുന്നു എന്നതിന് ഉദാഹരങ്ങൾ ഏറെ. ക്രിക്കറ്റ് എന്നത് ട്വന്റി-20യുടെ വരവോടെ മത്സരാധിഷ്ഠിതമായി മാറി. ടെസ്റ്റ്, ഏകദിനം എന്നിവയെ അപേക്ഷിച്ച് ട്വന്റി-20യിൽ തീവ്രത കൂടുതലാണ്. അതുപോലെ തുടർച്ചയായ പരമ്പരകളും മത്സരങ്ങളും. നിരന്തരം മത്സരങ്ങൾ കളിക്കുമ്പോൾ ഉണ്ടാകുന്ന പ്രശ്‌നങ്ങളാണ് ഇന്ത്യൻ ക്രിക്കറ്റർമാർ ഇപ്പോൾ അനുഭവിക്കുന്നത്.

കാരണം?

1980, 1990 – കളിൽ ക്രിക്കറ്റ് കളിക്കാർക്ക് പരിക്കേൽക്കാത്തത് എന്തുകൊണ്ട്? അതേസമയം, ഇന്നത്തെ കളിക്കാർ പരിക്കിൽനിന്ന് മുക്തമല്ലാതാകുന്നതും എന്തുകൊണ്ട്? ഈ പരിക്ക് പ്രശ്‌നം ക്രിക്കറ്റ് താരങ്ങൾക്ക് മറികടക്കാൻ സാധിക്കുമോ? ഉത്തരങ്ങൾ വളവും തിരിവും ഇല്ലാതെ പറഞ്ഞാൽ അത് ഇങ്ങനെ: 1990കളിൽ വരെ ക്രിക്കറ്റ് കളിക്കാർക്ക് മതിയായ വിശ്രമം ലഭിച്ചിരുന്നു. അതുകൊണ്ട് ശരീരക്ഷമത നിലനിർത്താൻ അവർക്ക് സാധിച്ചു. ഇപ്പോഴുള്ള കളിക്കാർക്ക് ഇടയ്ക്കിടെ പരിക്കേൽക്കാൻ കാരണം ഒന്നുമാത്രം, അവരുടെ വിശ്രമമില്ലാത്ത ഷെഡ്യൂൾ. പ്രത്യേകിച്ച് ട്വന്റി-20 ക്രിക്കറ്റിന്റെ വരവ്. പരിക്ക് പ്രശ്‌നത്തിൽനിന്ന് കളിക്കാർക്ക് മുക്തമാകാൻ സാധിക്കുമോ എന്നു ചോദിച്ചാൽ ഇല്ലെന്നുതന്നെയാണ് ഉത്തരം.

Also read:വേനൽക്കാലത്തെ രോഗ സാധ്യത ഒഴിവാക്കാൻ ശ്രദ്ധിക്കേണ്ടത്

ക്രിക്കറ്റിന്റെ മൂന്ന് ഫോർമാറ്റിലെയും വ്യത്യസ്ത അന്തരീക്ഷത്തോട് ശരീരം പൊരുത്തപ്പെടുക എന്നത് അത്ര എളുപ്പമല്ല, പ്രത്യേകിച്ച് വിശ്രമമില്ലാത്ത സാഹചര്യത്തിൽ. വിശ്രമത്തിനു മതിയായ സമയം ലഭിക്കാത്തതാണ് ക്രിക്കറ്റ് താരങ്ങളുടെ പരിക്കിന്റെ പ്രധാന കാരണം.

വേണ്ടത്ര ശാരീരികക്ഷമതയില്ലാത്തപ്പോൾ മത്സരങ്ങൾ കളിക്കുമ്പോഴും പരിക്കേൽക്കുക സാധാരണം. പരിക്ക് പൂർണമായി മുക്തമാകാതെ കളത്തിലേക്ക് തിരിച്ചെത്തുന്നതും പ്രശ്‌നകാരണമാണ്.

ടീമിൽ ഇടം ലഭിക്കാനുള്ള മത്സരമാണ് പരിക്കിന്റെ മറ്റൊരു കാരണം. മികച്ച പ്രകടനം കാഴ്ചവച്ചാൽ മാത്രമേ ടീമിൽ തുടരാൻ സാധിക്കൂ എന്നതിനാൽ കഴിവിന്റെ പരമാവധി ശ്രമിക്കും, അതും പരിക്കുകളുടെ വർധനവിന് കാരണമാകും.പുതിയ സാങ്കേതികവിദ്യകളും ക്രിക്കറ്റിന്റെ തീവ്രത വർധിച്ചു. അതിനോട് കിടപിടിക്കാനുള്ള ശ്രമവും പരിക്കിനെ ക്ഷണിച്ചു വരുത്തും.

തടയാൻ സാധിക്കുമോ?



പരിക്ക് തടയാൻ കഴിയില്ലെങ്കിലും, പരിക്കേൽക്കാനുള്ള സാധ്യത കുറയ്ക്കാൻ കഴിയും. പരിക്ക് കുറയ്ക്കാനുള്ള പ്രധാന സംഗതി കൃത്യമായ വാം അപ്പ് നടത്തുക എന്നതാണ്. ഫിസിയോതെറാപ്പിസ്റ്റുകളുമായി നിരന്തര സമ്പർക്കത്തിലൂടെ ശരീരത്തിനു മതിയായ പരിചരണം നൽകാം. മസ്‌കുലോസ്‌കലെറ്റൽ സ്‌ക്രീനിംഗ് വഴി ശരീരത്തിൽ ദുർബലമായ ഭാഗങ്ങൾ കണ്ടെത്തുകയും അവിടെ കൂടുതൽ പരിചരണം നൽകുകയും ചെയ്യാം. കോർ സ്റ്റെബിലിറ്റി പരിശീലനത്തിലൂടെ നടുവേദന, സൈഡ് സ്‌ട്രെയിൻ എന്നിവ വരാനുള്ള സാധ്യത കുറയ്ക്കാം.

ഇതൊക്കെയാണെങ്കിലും ഓരോരുത്തരുടെയും ശരീരത്തിനും എല്ലിനും വ്യത്യസ്ത കരുത്താണ്. അത് സ്വയം അറിയുകയും അതനുസരിച്ച് സ്വയം പരിചരിക്കുകയുമാണ് ഏറ്റവും പ്രധാനം.