ആരോഗ്യമുള്ള മുടിയിഴകൾക്ക് നെല്ലിക്ക ഇങ്ങനെ വേണം ഉപയോഗിക്കാൻ

ആദ്യം കയ്ക്കും, പിന്നെ മധുരിക്കും നെല്ലിക്കയിൽ നമ്മുടെ ആരോഗ്യത്തെ പ്രോത്സാഹിപ്പിക്കുന്ന നിരവധി ഗുണങ്ങളാണുള്ളത്. വിറ്റാമിൻ സിയുടെ ഏറ്റവും സമ്പന്നമായ പ്രകൃതിദത്ത ഉറവിടമാണ് നെല്ലിക്ക. കൂടാതെ ആവശ്യമായ അളവിൽ ഇരുമ്പ്, കാൽസ്യം, ടാന്നിസ്, ഫോസ്ഫറസ് എന്നിവയും ഇതിൽ അടങ്ങിയിരിക്കുന്നു. ജലദോഷം, പ്രമേഹം, അർബുദം, വന്ധ്യത എന്നിവപോലും ചികിത്സിക്കാൻ ആയുർവേദത്തിൽ ഇത് വ്യാപകമായി ഉപയോഗിക്കുന്നു. പതിവായി നെല്ലിക്ക കഴിക്കുന്നത് രോഗപ്രതിരോധ ശേഷി വർദ്ധിപ്പിക്കാനും ശരീരത്തെ ദുഷിപ്പുകളിൽ നിന്ന് മുക്തമാക്കുവാനും വാർദ്ധക്യ ലക്ഷണങ്ങൾ കുറയ്ക്കാനും ഗുണകരമാണ്.

അതോടൊപ്പം, മുടിക്കും ചർമ്മത്തിനും അത്ഭുതങ്ങൾ സൃഷ്ടിക്കാൻ നെല്ലിക്കയ്ക്ക് കഴിയും. മുടിക്ക് നെല്ലിക്കയുടെ ഗുണങ്ങളും അത് ഉപയോഗിക്കാനുള്ള വഴികളും അറിയുവാൻ തുടർന്ന് വായിക്കാം.

മുടിയിഴകൾക്ക് നെല്ലിക്ക നൽകുന്ന ഗുണങ്ങൾ



മുടിയുടെ അമൃതമായി നെല്ലിക്ക കണക്കാക്കപ്പെടുന്നു. ഇത് പ്രകൃതിദത്ത കണ്ടീഷനറായി പ്രവർത്തിക്കുകയും കട്ടിയുള്ളതും ശക്തവുമായ മുടി നൽകുകയും ചെയ്യും. ശിരോചർമ്മത്തിലേക്കുള്ള രക്തചംക്രമണം വർദ്ധിപ്പിക്കുന്നതിലൂടെ നെല്ലിക്കയിൽ അടങ്ങിയിരിക്കുന്ന പോഷകങ്ങൾ മുടിയുടെ വളർച്ചയെ ഉത്തേജിപ്പിക്കും.

നെല്ലിക്കയിൽ അടങ്ങിയ വിറ്റാമിൻ സി, കൊളാജൻ എന്ന പ്രോട്ടീൻ ഉത്പാദിപ്പിക്കാൻ സഹായിക്കുന്നു. ഇത് രോമകൂപങ്ങളുടെ മൃതകോശങ്ങളെ പുതിയ കേശ കോശങ്ങൾ ഉപയോഗിച്ച് മാറ്റിസ്ഥാപിക്കാൻ സഹായിക്കുന്നു. വിറ്റാമിൻ സി ഉള്ളതിനാൽ, നെല്ലിക്കയുടെ നീര് പുരട്ടുന്നത് ചർമ്മ വരൾച്ചയെ സുഖപ്പെടുത്തുകയും താരൻ അടിഞ്ഞുകൂടുന്നത് തടയുകയും ചെയ്യും. കൂടാതെ, താരൻ തടയാനും അത് മൂലമുണ്ടാകുന്ന ചൊറിച്ചിലും അകറ്റാൻ കഴിയുന്ന ആൻറി-ഇൻഫ്ലമേറ്ററി, ആൻറി ബാക്ടീരിയൽ ഗുണങ്ങൾ നെല്ലിക്കയിൽ അടങ്ങിയിട്ടുണ്ട്.

ശിരോചർമ്മം വൃത്തിയാക്കാനും പരിപോഷിപ്പിക്കാനും മുടിക്ക് തിളക്കം നൽകാനും നെല്ലിക്കയ്ക്ക് കഴിയും. ഇതിൽ അടങ്ങിയിരിക്കുന്ന ആന്റിഓക്‌സിഡന്റുകൾ പൊടി, മലിനീകരണം, പുക, ഹെയർ സ്റ്റൈലിംഗ് ഉപകരണങ്ങൾ എന്നിവ മൂലമുണ്ടാകുന്ന കേടുപാടുകളിൽ നിന്ന് മുടിയെ സംരക്ഷിക്കും. അകാല നരയിൽ നിന്ന് മുടിയെ സംരക്ഷിക്കുവാനും നെല്ലിക്കയ്ക്ക് കഴിയും.

ചർമ്മകാന്തിക്ക് വാൾനട്ട് ഉപയോഗിക്കാൻ 3 കിടിലൻ വഴികളിതാ

കേശസംരക്ഷണത്തിന് നെല്ലിക്ക എങ്ങനെ ഉപയോഗിക്കാം



അസംസ്കൃത രൂപത്തിലോ, നെല്ലിക്കയുടെ നീര് എടുത്തോ, പൊടിച്ചതോ അല്ലെങ്കിൽ എണ്ണയായിട്ടോ, ഏത് രൂപത്തിലും നെല്ലിക്ക ഉപയോഗിക്കാം. ചർമ്മത്തിൽ പ്രയോഗിക്കുവാനും കഴിക്കുവാനും ഇത് ഒരുപോലെ ഉത്തമമാണ്. മുടിയുടെ സംരക്ഷണത്തിനായി നെല്ലിക്ക ഉപയോഗിക്കുന്നതിനുള്ള ചില വഴികൾ ഇതാ.

നെല്ലിക്ക എണ്ണ ഉപയോഗിച്ച് മുടി മസാജ് ചെയ്യുക



മുടി കൊഴിച്ചിൽ തടയാൻ മുടി പതിവായി നെല്ലിക്ക എണ്ണ ഉപയോഗിച്ച് മസാജ് ചെയ്യുക. അങ്ങനെ ചെയ്യുന്നത് ശിരോചർമത്തിൽ ഉടനീളം രക്തചംക്രമണം വർദ്ധിപ്പിക്കുകയും ആവശ്യത്തിന് ഓക്സിജൻ നൽകുകയും രോമകൂപങ്ങളെ പോഷിപ്പിക്കുകയും ചെയ്യും. ഇത് മുടി നാരുകളെ ശക്തിപ്പെടുത്തുകയും മുടി കൊഴിച്ചിൽ തടയുകയും ചെയ്യും. മുടിയുടെ സ്വാഭാവിക നിറം നിലനിർത്താൻ പതിവായി എണ്ണ പുരട്ടുന്നത് സഹായിക്കും.

വെളിച്ചെണ്ണ തവിട്ടുനിറമാകുന്നതുവരെ നെല്ലിക്ക പൊടി ചേർത്ത് ഇളക്കി ചൂടാക്കി നിങ്ങൾക്ക് നെല്ലിക്ക എണ്ണ തയ്യാറാക്കാം. എണ്ണ തണുപ്പിച്ച് തലയിലും മുടിയുടെ വേരുകളിലും പ്രയോഗിക്കുക. ഇത് കൂടാതെ ആയുർവേദ സ്റ്റോറുകളിൽ നിങ്ങൾക്ക് നെല്ലിക്ക എണ്ണ ലഭിക്കുകയും ചെയ്യും.

മുഖം തിളങ്ങാൻ വെള്ളരിക്ക ഉപയോഗിക്കാം ഇങ്ങനെ

നെല്ലിക്ക പൊടി കൊണ്ട് ഹെയർ മാസ്ക്



നെല്ലിക്ക ഹെയർ മാസ്ക് പതിവായി ഉപയോഗിക്കുന്നത് ശിരോചർമ്മത്തിലെ വരൾച്ചയെ സുഖപ്പെടുത്തുകയും താരൻ ഉണ്ടാകുന്നത് തടയുകയും ചെയ്യും. നെല്ലിക്ക ഹെയർ മാസ്ക് തയ്യാറാക്കാനായി,

* പേസ്റ്റ് ഉണ്ടാക്കാൻ നെല്ലിക്ക പൊടിയും വെള്ളവും ഒരുമിച്ച് കലർത്തുക

* ഏകദേശം 8-10 തുളസി ഇല അരച്ച് ഈ പേസ്റ്റിലേക്ക് ചേർക്കുക

* ഈ പേസ്റ്റ് നിങ്ങളുടെ തലയിൽ പുരട്ടി ഏകദേശം 30 മിനിറ്റ് നേരം വയ്ക്കുക.

* തണുത്ത വെള്ളത്തിൽ കഴുകുക, തുടർന്ന് മിതമായ പ്രകൃതിദത്ത ക്ലെൻസർ ഉപയോഗിച്ച് മുടി വൃത്തിയാക്കാം.

* മികച്ച ഫലങ്ങൾക്കായി നിങ്ങൾക്ക് നെല്ലിക്ക അടങ്ങിയ ഒരു കണ്ടീഷനർ ഉപയോഗിക്കാം

കൂടാതെ, മുടിയിൽ മൈലാഞ്ചി പ്രയോഗിക്കുമ്പോൾ നെല്ലിക്ക പൊടി അതിലേക്ക് ചേർക്കുക. ഇത് മുടിയുടെ നിറം മെച്ചപ്പെടുത്തുന്നതിനും അകാല നരയെ തടയുന്നതിനും സഹായകമാകും.

ഭക്ഷണത്തിൽ നെല്ലിക്ക ചേർക്കാം



ശരിയായ പോഷകാഹാരക്കുറവ് മുടിയുടെ അകാല നരയുടെ ഏറ്റവും വലിയ കാരണമാണ്. നെല്ലിക്ക കഴിക്കുകയോ ദിവസവും ജ്യൂസ് ഉണ്ടാക്കി കുടിക്കുകയോ ചെയ്യുന്നത് ശരീരത്തിന് ആവശ്യമായ പോഷകങ്ങൾ നൽകുകയും മുടി നരയ്ക്കുന്നത് തടയുകയും ചെയ്യും. മുടിയുടെ സ്വാഭാവിക നിറവും തിളക്കവും നിലനിർത്താനും ഇത് സഹായിക്കും.

മുടിയിൽ നെല്ലിക്ക നീര് പുരട്ടാം



മുടിക്ക് ആവശ്യമായ എല്ലാ പോഷകങ്ങളും നൽകാൻ സഹായിക്കുന്ന മികച്ച ഹെയർ ടോണിക്ക് ആണ് നെല്ലിക്ക ജ്യൂസ്. നെല്ലിക്ക ജ്യൂസ് ഉണ്ടാക്കുക നിങ്ങൾ കരുതുന്നതിലും എളുപ്പമാണ്. അരിഞ്ഞ നെല്ലിക്ക വെള്ളത്തിൽ കലർത്തി അടിച്ചെടുത്ത് ജ്യൂസ് ഉണ്ടാക്കി, അത് അരിച്ചെടുക്കുക. ഇതിലേക്ക് അപ്പോൾ പിഴിഞ്ഞെടുത്ത നാരങ്ങ നീര് ചേർക്കുക, നിങ്ങളുടെ ഹെയർ ടോണിക്ക് തയ്യാറാണ്. ഈ ജ്യൂസ് തലയിൽ നേരിട്ട് പുരട്ടി വിരൽത്തുമ്പ് കൊണ്ട് മസാജ് ചെയ്യുക. ഇത് ഒരു മണിക്കൂറോളം ഇരിക്കട്ടെ, ശേഷം ഒരു ക്ലെൻസർ ഉപയോഗിച്ച് തല കഴുകുക.