‘കയ്യേറ്റം’, ഡൽഹിയിൽ സീറോ മലബാർ പള്ളി പൊളിച്ചു; മുഖ്യമന്ത്രിയെ കണ്ട് സഭാ പ്രതിനിധികള്‍

ന്യൂഡൽഹി: അനധികൃത നിര്‍മാണമെന്ന് ആരോപിച്ച് ഡൽഹിയിൽ അധികൃതര്‍ സീറോ മലബാര്‍ പള്ളി പൊളിച്ചു നീക്കി. കയ്യേറ്റ ഭൂമിയിലാണ് പള്ളി പണിതതെന്നാണ് റിപ്പോര്‍ട്ടുകള്‍. എന്നാൽ നിയമവിരുദ്ധമായ നടപടിയാണ് ജില്ലാ ഭരണകൂടം സ്വീകരിച്ചതെന്നും കയ്യേറ്റം ഒഴിയാൻ നോട്ടീസ് നല്‍കിയിരുന്നില്ലെന്നുമാണ് സഭയുടെ ആരോപണം. സംഭവത്തിൽ ഇടപെടണമെന്ന് ആവശ്യപ്പെട്ട് സഭാ പ്രതിനിധികള്‍ കേരള മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തിയെന്നാണ് റിപ്പോര്‍ട്ട്.



ഗ്രാമസഭയുടെ ഉടമസ്ഥതയിലുള്ള സ്ഥലത്താണ് പള്ളി പണിതതെന്നാണ് ജില്ലാ ഭരണകൂടം വ്യക്തമാക്കുന്നത്. ചിലര്‍ ഈ സ്ഥലം കയ്യേറി മതപരമായ നിര്‍മിതികള്‍ നടത്തുകയായിരുന്നുവെന്നും അധികൃതര്‍ പറയുന്നു. കാലക്രമേണ ഇവര്‍ പരിസരത്തെ കൂടുതൽ സ്ഥലം വളഞ്ഞു പിടിക്കുകയായിരുന്നു. ഈ സാഹചര്യത്തിൽ ബിഡിഓ ഓഫീസ് ഇടപെട്ട് കെട്ടിടം പൊളിക്കുകയും സ്ഥലം തിരിച്ചു പിടിക്കുകയുമാണ് ചെയ്തതെന്ന് അധികൃതര്‍ പ്രസ്താവനയിൽ വ്യക്തമാക്കി. മനുഷ്യാവകാശ കമ്മീഷൻ്റെ നിര്‍ദേശം അനുസരിച്ച് മുൻപ് ഈ വിഷയം മത സമിതിയ്ക്ക് വിട്ടിരുന്നുവെന്നും അധികൃതര്‍ വ്യക്തമാക്കി.

Also Read: ഇന്ത്യയിൽ ആദ്യമായി കൊവിഡ് സ്ഥിരീകരിച്ച മലയാളി പെണ്‍കുട്ടിക്ക് വീണ്ടും രോഗബാധ

കെട്ടിടത്തിൽ രൂപങ്ങളും മതപരമായ അടയാളങ്ങളും സ്ഥാപിച്ചിട്ടില്ലാത്ത മുകള്‍നിലകളും താഴത്തെ നിലയുടെ മറ്റു ഭാഗങ്ങളും പൊളിച്ചു നീക്കാൻ മാര്‍ച്ച് മൂന്നിനു തന്നെ പോലീസ് വകുപ്പിൻ്റെ നിര്‍ദേശം ലഭിച്ചിട്ടുണ്ടായിരുന്നു. 2015ൽ ഇതു സംബന്ധിച്ച കോടതി വിധിയാണ് ചൂണ്ടിക്കാണിച്ചത്. കെട്ടിടം പൊളിച്ചു നീക്കണമെന്ന് ആവശ്യപ്പെട്ട് ജൂലൈ ഏഴിന് കയ്യേറ്റക്കാര്‍ക്ക് നോട്ടീസ് നല്‍കിയിരുന്നുവെന്നും പ്രസ്താവനയിൽ വ്യക്തമാക്കി. മൂന്ന് ദിവസത്തിനുള്ളിൽ പൊളിച്ചു നീക്കണമെന്ന നിര്‍ദേശം പാലിക്കാതെ വന്നതോടെ ഗ്രാമസഭയുടെ ഉടമസ്ഥതയിലുള്ള സ്ഥലത്തു നിന്ന് കയ്യേറ്റം നീക്കുകയായിരുന്നുവെന്നും അധികൃതര്‍ വ്യക്തമാക്കി.

Also Read: അഴിമതിക്കെതിരെ നടപടി; മന്ത്രി കെ രാധാകൃഷ്ണനെതിരെ ഭീഷണി

അതേസമയം, ഇതു സംബന്ധിച്ച നോട്ടീസ് ലഭിച്ചിട്ടില്ലെന്നാണ് പാസ്റ്ററൽ കൗൺസിലും അഭിഭാഷകനും പറയുന്നത്. ഭൂമി ഒഴിയാൻ സാവകാശം ലഭിച്ചില്ലെന്നും 150ഓളം പോലീസുകാരുടെ സഹായത്തോടെ എത്തിയ സംഘം പള്ളി മുഴുവനായി പൊളിച്ചു നീക്കിയെന്നും അവര്‍ ആരോപിച്ചു. വിശുദ്ധവസ്തുക്കള്‍ എടുത്തു നീക്കാൻ പോലും സമയം ലഭിച്ചില്ലെന്നും അവര്‍ വ്യക്തമാക്കി. ജില്ലാ ഭരണകൂടത്തിനെതിരെ നിയമനടപടി സ്വീകരിക്കുമെന്നും അവര്‍ വ്യക്തമാക്കി.

അതേസമയം, വിഷയത്തിൽ ഇടപെടണമെന്നും ഡൽഹി മുഖ്യമന്ത്രിയുമായി സംസാരിക്കണമെന്നും ആവശ്യപ്പെട്ട് സീറോ മലബാര്‍ സഭാ പ്രതിനിധികള്‍ മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി. മുഖ്യമന്ത്രി പ്രശ്നത്തിൽ ഇടപെടുമെന്ന പ്രതീക്ഷയുണ്ടെന്ന് ഫാ. ജോസ് കുന്നുകുഴി വ്യക്തമാക്കി.