തമിഴ്നാട്ടിൽ വില്ലേജ് ഓഫീസറെ വെട്ടിക്കൊന്നു. മണൽ മാഫിയക്കെതിരെ വിരൽ ചൂണ്ടിയ തൂത്തുക്കുടി പുതുക്കോട്ട സ്വദേശി ലൂർദ് ഫ്രാൻസിസ് ആണ് കൊല്ലപ്പെട്ടത്. 53 വയസായിരുന്നു.
ഹൈലൈറ്റ്:
- വില്ലേജ് ഓഫീസറെ വെട്ടിക്കൊന്നു.
- സംഭവം തമിഴ്നാട്ടിൽ.
- തൂത്തുക്കുടി പുതുക്കോട്ട സ്വദേശി ലൂർദ് ഫ്രാൻസിസ് (53) ആണ് കൊല്ലപ്പെട്ടത്.
ചൊവ്വാഴ്ച ഉച്ചയ്ക്ക് 12.30 ഓടെയാണ് അരുംകൊല നടന്നത്. രണ്ടംഗ സംഘം മുറപ്പനാട് സ്ഥിതി ചെയ്യുന്ന വില്ലേജ് ഓഫീസിലെത്തി ഫ്രാൻസിസിനെ അരിവാളുകൊണ്ട് വെട്ടിപ്പരിക്കേൽപ്പിക്കുകയായിരുന്നു. ഉടൻ തന്നെ ഗ്രാമവാസികൾ വിവരം മുറപ്പനാട് പോലീസിനെ അറിയിക്കുകയും പോലീസ് എത്തി ഗുരുതര പരിക്കേറ്റ ഇയാളെ തിരുനെൽവേലി മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയും ചെയ്തു. വൈകാതെ ഫ്രാൻസിസിന് മരണം സംഭവിച്ചു. തൂത്തുക്കുടി കളക്ടർ ഡോ. കെ സെന്തിൽരാജ്, എസ്പി ബാലാജി ശരവണൻ എന്നിവർ ആശുപത്രിയിൽ എത്തി ഫ്രാൻസിസിൻ്റെ കുടുംബാംഗങ്ങളെ ആശ്വസിപ്പിച്ചു.
വരയാടുകളുടെ വാർഷിക കണക്കെടുപ്പ് ആരംഭിച്ചു
നേരത്തെ ആദിച്ചനല്ലൂർ വില്ലേജ് ഓഫീസറായി സേവനമനുഷ്ഠിക്കുമ്പോഴും ലൂർദ് ഫ്രാൻസിസ് ആക്രമിക്കപ്പെട്ടിട്ടുണ്ട്. ഭൂമി കയ്യേറ്റക്കാർക്കെതിരെ ഫ്രാൻസിസിൻ്റെ ഭാഗത്തുനിന്നു നീക്കം ഉണ്ടായതോടെയാണ് അന്ന് അക്രമം ഉണ്ടായത്. ഫ്രാൻസിസിൻ്റെ പരാതിയിൽ മണൽ മാഫിയക്കെതിരെ കേസെടുത്തിരുന്നുവെന്നും നടപടി ഉണ്ടാകുമെന്നും കളക്ടർ അറിയിച്ചു. സത്യസന്ധനായ ഉദ്യോഗസ്ഥനെയാണ് നഷ്ടമായതെന്നും പോലീസ് അന്വേഷണം പുരോഗമിക്കുകയാണെന്നും കുറ്റക്കാർക്കെതിരെ കടുത്ത നടപടി ഉണ്ടാകുമെന്നും കളക്ടർ വ്യക്തമാക്കി.
സിനിമ കാണാൻ എത്തിയപ്പോൾ ഗെയിം കളി; തർക്കത്തിനിടെ യുവാവിനെ കുത്തിക്കൊന്നു, മൂന്ന് പേർ പിടിയിൽ
സംഭവത്തിൽ കേസെടുത്ത പോലീസ്, രാമസുബ്ബു എന്നയാളെ അറസ്റ്റു ചെയ്തിട്ടുണ്ട്. മണൽക്കടത്തുമായി ബന്ധപ്പെട്ട് ഇയാൾക്കെതിരെ കഴിഞ്ഞ ആഴ്ച കേസെടുത്തിരുന്നു. ഇയാളും കൂട്ടാളികളും ചേർന്നാണ് ലൂർദ് ഫ്രാൻസിസിനെ കൊലപ്പെടുത്തിയതെന്നും മറ്റു പ്രതികൾക്കായി തെരച്ചിൽ നടക്കുകയാണെന്നും പോലീസ് പറഞ്ഞു. അതേസമയം വില്ലേജ് ഓഫീസറുടെ മരണത്തിൽ അനുശോചനം രേഖപ്പെടുത്തിയ മുഖ്യമന്ത്രി എം കെ സ്റ്റാലിൻ കുടുംബാംഗങ്ങൾക്ക് ഒരു കോടി രൂപ നഷ്ടപരിഹാരം പ്രഖ്യാപിച്ചു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
