തീർഥാടന സജ്ജമായി മക്കയും മദീനയും; ഉംറ വിസക്കാർ സൗദി വിട്ടില്ലെങ്കിൽ കാൽലക്ഷം റിയാൽ പിഴ
Edited by Jibin George | Samayam Malayalam | Updated: 17 Jun 2023, 12:05 pm
ഹജ്ജ് തീർഥാടനത്തിനായി മക്കയും മദീനയും ഉൾപ്പെടെയുള്ള പുണ്യ നഗരങ്ങളിൽ ഒരുക്കങ്ങൾ പൂർത്തിയായി. തീർഥാടകർക്ക് സൗകര്യമായ എല്ലാവിധ ഒരുക്കങ്ങളും പൂർത്തിയായതായി അധികൃതർ
പിടിക്കപ്പെട്ടാല്‍ സൗദിയില്‍ പ്രവേശന വിലക്ക്
ഇങ്ങനെ പിടിക്കപ്പെടുന്നവരെ നാടുകടത്തും. പിന്നീട് അവര്‍ക്ക് സൗദിയിലേക്ക് തിരിച്ചുവരാനാവാത്ത വിധം വിരലടയാളം ഉള്‍പ്പെടെ രേഖപ്പെടുത്തിയാണ് നാടുകടത്തുകയെന്നും അധികൃതര്‍ മുന്നറിയിപ്പ് നല്‍കി. സൗദിയിലേക്ക് അനുവദിക്കുന്ന എല്ലാ ഉംറ വിസകളുടേയും കാലാവധി 90 ദിവസമാണ്. എന്നാല്‍ ഹജ്ജ് സീസണ്‍ ആരംഭിക്കുന്ന ഘട്ടത്തില്‍ ഈ നിയമം ബാധകമല്ല. ദുല്‍ഹജ്ജ് മാസത്തിന് മുന്നോടിയായി എല്ലാ ഉംറ വിസക്കാരും നാട്ടിലേക്ക് മടങ്ങണമെന്ന് അധികൃതര്‍ നേരത്തേ പ്രഖ്യാപിച്ചിരുന്നു. കാലാവധി കഴിഞ്ഞും രാജ്യത്ത് തങ്ങുന്നത് ശക്തമായ നിയമ നടപടികള്‍ ക്ഷണിച്ചുവരുത്തുമെന്നതിനാല്‍ ഇന്നും നാളെയുമായി രാജ്യം വിടുന്നതാണ് ഉചിതമെന്നാണ് ട്രാവല്‍ മേഖലയില്‍ പ്രവര്‍ത്തിക്കുന്നവര്‍ നല്‍കുന്ന മുന്നറിയിപ്പ്. ജൂണ്‍ നാലിനാണ് ഈ സീസണിലെ അവസാന ഉംറ തീര്‍ഥാടകര്‍ സൗദിയില്‍ പ്രവേശിച്ചത്. ഇവര്‍ക്ക് 10 ദിവസം മാത്രമേ സൗദിയില്‍ തങ്ങാന്‍ അനുവാദമുള്ളൂ എന്നതാണ് വസ്തുത.
മക്കയിലെ എല്ലാ പള്ളികളിലും ജുമുഅ പ്രാര്‍ഥന
മക്ക നഗരത്തിലെ മുഴുവന്‍ മസ്ജിദുകളിലും ജുമുഅ നമസ്‌കാരം നടത്താന്‍ ഇസ്ലാമികകാര്യ മന്ത്രി ശെഖ് ഡോ. അബ്ദുല്ലത്തീഫ് ആലു ശൈഖ് നിര്‍ദേശം നല്‍കി. ഹജ്ജ് സീസണ്‍ അവസാനിക്കുന്നതു വരെ മക്കയിലെ മുഴുവന്‍ മസ്ജിദുകളിലും ജുമുഅ നടത്താനാണ് നിര്‍ദേശം. വിശുദ്ധ ഹറമിനു സമീപത്തെ ഔദ്യോഗിക ജുമാ മസ്ജിദുകള്‍ക്കു പുറമെ ജുമുഅ നടക്കാത്ത മസ്ജിദുകളിലും ഹജ് സീസണ്‍ അവസാനിക്കുന്നതു വരെ ജുമുഅ നടത്തും. ഇതനുസരിച്ച് വിശുദ്ധ ഹറമിനു സമീപ പ്രദേശങ്ങളിലെ 554 മസ്ജിദുകളില്‍ വെള്ളിയാഴ്ച ജുമുഅ പ്രാര്‍ഥന നടക്കും. ഹജ്ജ് സീസണില്‍ വിശുദ്ധ ഹറമില്‍ അനുഭവപ്പെടുന്ന അനിയന്ത്രിതമായ തിരക്ക് കുറക്കാനും ഹജ്ജ് തീര്‍ഥാടകര്‍ക്ക് പ്രയാസരഹിതമായി ജുമുഅയില്‍ പങ്കെടുക്കാന്‍ അവസരമൊരുക്കാനും ലക്ഷ്യമിട്ടാണ് തീരുമാനമെന്ന് അധികൃതര്‍ അറിയിച്ചു. ഇതിനാവശ്യമായ സംവിധാനങ്ങള്‍ ഇസ്ലാമിക കാര്യ മന്ത്രാലയം ഒരുക്കിയിട്ടുണ്ട്.
ദുല്‍ഹജ്ജ് മാസപ്പിറവി നിരീക്ഷിക്കണം
സൗദി അറേബ്യയില്‍ നാളെ ഞായറാഴ്ച വൈകുന്നേരം ദുല്‍ഹജ്ജ് മാസപ്പിറവി നിരീക്ഷിക്കാന്‍ സുപ്രീം കോര്‍ട്ട് ആഹ്വാനം ചെയ്തു. നഗ്ന നേത്രങ്ങള്‍ കൊണ്ടോ അല്ലെങ്കില്‍ ദൂരദര്‍ശിനികളുടെ സഹായത്താലോ മാസപ്പിറവി കാണാന്‍ സാധിക്കുന്നവര്‍ തൊട്ടടുത്ത കോടതിയിലെത്തി അവ സാക്ഷ്യപ്പെടുത്തണമെന്നാണ് നിര്‍ദേശം നല്‍കിയിരിക്കുന്നത്. മാസപ്പിറവി നിരീക്ഷിക്കാന്‍ താല്‍പര്യവും കഴിവുമുള്ളവര്‍ അതത് മേഖലകളില്‍ ഇതിനായി രൂപീകരിക്കുന്ന കമ്മിറ്റികളില്‍ അംഗമാവണമെന്നും സുപ്രീം കോര്‍ട്ട് ആവശ്യപ്പെട്ടു. ദുല്‍ഹജ്ജ് മാസപ്പിറവിയുടെ അടിസ്ഥാനത്തിലാണ് ഹജ്ജ് കര്‍മങ്ങളുടെ തീയതി നിശ്ചയിക്കപ്പെടുന്നത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
