‘അധികാരത്തിൽ നിന്നും ഒരാളെ പുറത്താക്കാൻ ശ്രമം’; വിശാല പ്രതിപക്ഷ സഖ്യത്തേക്കുറിച്ച് കെടിആർ

ബിഹാറിൽ വിശാല പ്രതിപക്ഷ യോഗം നടന്ന് ദിവസങ്ങൾക്ക് ശേഷം പ്രതിപക്ഷ പാർട്ടികളെ വിമർശിച്ചുകൊണ്ട് കെസിആറിന്റെ മകൻ തന്നെ രംഗത്തുവരുന്നത്. വാർത്താ ഏജൻസിയായ പിടിഐയോടാണ് അദ്ദേഹത്തിന്റെ പ്രതികരണമുണ്ടായിരിക്കുന്നത്.

രാജ്യത്തിന്റെ കാതലായ ക്ഷേമ തത്വങ്ങളുടെ കാര്യത്തിൽ പാർട്ടി ഒരിക്കലും വിട്ടുവീഴ്ച ചെയ്യില്ലെന്നും ജനങ്ങളുടെ ഗുണങ്ങൾക്ക് വേണ്ടി പ്രവർത്തിക്കുന്ന രാഷ്ട്രീയ പാർട്ടികളുമായി മാത്രമേ തൻ്റെ പാർട്ടി സഖ്യം ചേരൂ എന്നും അദ്ദേഹം കൂട്ടിച്ചേർത്തു.

“ബിജെപിക്കെതിരെ പോരാട്ടം രാജ്യത്തിന്റെ മുന്നിലുള്ള പ്രധാന വിഷയങ്ങളിലൂന്നിയായിരിക്കണം. നിർഭാഗ്യവശാൽ, ഞങ്ങൾക്ക് അവിടെയുള്ള വസ്തുത നഷ്ടപ്പെടുന്നു. ആരെയെങ്കിലും പുറത്താക്കുന്നതിനോ ആരെയെങ്കിലും അവിടെ നിർത്തുന്നതിനോ വ്യാകുലരും ആശങ്കാകുലരും ആണെന്ന് തോന്നുന്നു, അത് അജണ്ട ആയിരിക്കരുത്. രാജ്യത്തിന്റെ അടിസ്ഥാന കാര്യങ്ങൾ എങ്ങനെ നിറവേറ്റണം എന്നതായിരിക്കണം അജണ്ട.”

“നിങ്ങൾ ഒരാൾക്ക് വേണ്ടി ഒന്നിക്കരുത്. നിങ്ങൾ ഒരു കാരണത്തിന് വേണ്ടിയാണ് ഒന്നിക്കേണ്ടത്. അതെന്താണ്, ആർക്കും കണ്ടുപിടിക്കാൻ കഴിയുന്നില്ല.” അദ്ദേഹം പ്രതിപക്ഷ കക്ഷികളേക്കുറിച്ച് പറഞ്ഞു.

2024ലെ പൊതുതെരഞ്ഞെടുപ്പിന് മുന്നോടിയായി വെള്ളിയാഴ്ചയാണ് 17 പ്രതിപക്ഷ കക്ഷികൾ യോഗം ചേർന്നത്. ബിഹാർ മുഖ്യമന്ത്രി നിതീഷ് കുമാറിന്റെ അധ്യക്ഷതയിൽ അദ്ദേഹത്തിന്റെ ഔദ്യോഗിക വസതിയിൽ വച്ചാണ് വിശാല യോഗം ചേർന്നത്. അതേസമയം, ബിആർഎസ് യോഗത്തിൽ നിന്നും വിട്ട് നിന്നിരുന്നു. കെസിആർ ബിജെപിയോട് വീണ്ടും അടുക്കുന്നുവെന്ന വാർത്തകൾ ഉയരുന്നതിനിടെയാണ് പ്രതിപക്ഷ യോഗത്തിൽ നിന്നും വിട്ടു നിന്നത്.

അതിന് പുറമെ, രണ്ട് വർഷമായി കേന്ദ്ര യോഗങ്ങൾ ബഹിഷ്കരിക്കുന്നത് അവസാനിപ്പിച്ചിരുന്നു. ഇതിൻ്റെ ഭാഗമായി മണിപ്പൂരിലെ സ്ഥിതിഗതികൾ സംബന്ധിച്ച് സർവകക്ഷി യോഗത്തിലേക്ക് ബിആർഎസ് ഒരു പ്രതിനിധിയെ അയക്കുകയും ചെയ്തു.

Also Read : ക്ഷേത്ര ദർശനത്തിന് പോയ യുവതിയുടെ കാർ ഒഴുക്കിൽപെട്ടു; രക്ഷപെടുത്തിയത് സാഹസികമായി – വിഡിയോ

കഴിഞ്ഞ ദിവസം കെ ടി രാമറാവു ന്യൂഡൽഹിയിൽ രണ്ട് ദിവസത്തെ ഔദ്യോഗിക സന്ദർശനത്തിന് എത്തിയിരുന്നു. പ്രതിരോധ മന്ത്രി രാജ്‌നാഥ് സിംഗുമായും കേന്ദ്ര ആഭ്യന്തര മന്ത്രി അമിത് ഷായുമായും അദ്ദേഹം കൂടിക്കാഴ്ച നടത്തി.

Read Latest National News and Malayalam News