വെള്ളയരിയോ മട്ടയരിയോ നല്ലത് എന്നതാണ് ചോദ്യമെങ്കില്‍…
Saritha Pv | Samayam Malayalam | Updated: 3 Jul 2023, 7:29 pm
ഇന്നത്തെ കാലത്ത് പലരും കൂടുതലായി വെള്ളയരി ഉപയോഗിയ്ക്കുന്നവരാണ്. എന്നാല്‍ മട്ടയരിയാണ് കൂടുതല്‍ നല്ലതെന്ന് പറഞ്ഞു കേള്‍ക്കാം. ഇതെക്കുറിച്ചറിയൂ.
മട്ടയരി
ഇന്നത്തെ കാലത്ത് മട്ടയരിയേക്കാള്‍ പലരും ആശ്രയിക്കുന്നത് വെളുത്ത അരിയാണ്. വയ്ക്കാനും ലഭ്യതയ്ക്കും ഇതാണ് എളുപ്പമെന്നതാണ് കാരണം. മട്ടയരി വേവാന്‍ ഏറെ സമയമെടുക്കും. മാത്രമല്ല, പലര്‍ക്കും, പ്രത്യേകിച്ചും വെള്ളയരി ശീലിച്ചവര്‍ക്ക് ഇത് വയറിന് കനം പോലുളള തോന്നലുണ്ടാക്കാം. വെള്ളയരി പെട്ടെന്ന് ദഹിയ്ക്കുന്നുവെന്ന തോന്നലും. എന്നാല്‍ വാസ്തവത്തില്‍ വെള്ളയരിയോ മട്ടയരിയോ നല്ലത്.
രാത്രി ഒഴിവാക്കാം ഈ ഭക്ഷണങ്ങൾ
രാത്രി ഒഴിവാക്കാം ഈ ഭക്ഷണങ്ങൾ
ഗ്ലൈസമിക് ഇന്‍ഡെക്‌സ്
മട്ടയരി തന്നെയാണ് ആരോഗ്യകാര്യത്തില്‍ നല്ലതെന്ന് എല്ലാവര്‍ക്കും അറിയുന്നുണ്ടാകാം. ഇതിന് പ്രധാനമായും പറയാവുന്ന കാരണങ്ങളുമുണ്ട്. ഇതിലൊന്നാണ് വെളുത്ത അരി മട്ടയരിയെ അപേക്ഷിച്ച് പെട്ടെന്ന് തന്നെ പ്രമേഹമുണ്ടാക്കാനുള്ള സാധ്യതയുണ്ടെന്നത്.
കാരണം മട്ടയരിയുടെ ഗ്ലൈസമിക് ഇന്‍ഡെക്‌സ് 55 ആണ്. വെള്ളയരിയുടെ ഗ്ലൈസമിക് ഇന്‍ഡെക്‌സ് 80ന് അടുത്തു വരും. ഗ്ലൈസമിക് ഇന്‍ഡെക്‌സ് എന്നത് രക്തത്തില്‍ ഗ്ലൂക്കോസ് തോത് വര്‍ദ്ധിയ്ക്കുന്ന തോതിനെ സൂചിപ്പിയ്ക്കുന്നു. ഇത് കൂടുതലാകുന്തോറും പ്രമേഹ സാധ്യതയും കൂടുതലാണ്. ഇതിനാല്‍ പ്രമേഹ രോഗികള്‍ക്കും പ്രമേഹ സാധ്യത ഒഴിവാക്കാനും മട്ടയരി മികച്ചതാണ്.
ഗ്യാസ് പ്രശ്‌നങ്ങളുള്ളവര്‍ക്ക്
ഇതു പോലെയാണ് ദഹന കാര്യവും. കാര്യം വെള്ളയരി പെട്ടെന്ന് ദഹിച്ചുവെന്ന് തോന്നലുണ്ടാക്കുമെങ്കിലും മട്ടയരി തവിടുള്ളതിനാല്‍ തന്നെയും ദഹിയ്ക്കാന്‍ ഏറെ എളുപ്പമാണ്. കുടലിന് ഇതാണ് നല്ലത്. അതേ സമയം ഗ്യാസ് പ്രശ്‌നങ്ങളുള്ളവര്‍ക്ക് വെള്ളയരിയാണ് നല്ലതെന്ന് പറയാം. അതായത് ചോറ് കഴിച്ചാല്‍ ഗ്യാസ് ശല്യം വരുന്നവര്‍. തവിട് ഉള്ള മട്ടയരി ആരോഗ്യത്തിന് നല്ലതാണ്. തവിട് കളയാത്ത ധാന്യങ്ങള്‍ പൊതുവേ പല ആരോഗ്യ ഗുണങ്ങളും നല്‍കുന്നു.
തടി കുറയ്ക്കാന്‍
ഇത് പോലെ തന്നെ കാര്‍ബോഹൈഡ്രേറ്റ് തോത് വെള്ളയരിയില്‍ മട്ടയരിയേക്കാള്‍ കൂടുതലാണ്. അതായത് കൊഴുപ്പ് വെള്ള അരിയില്‍ കൂടുതലാണെന്നര്‍ത്ഥം.
ഇതിനാല്‍ തടി കുറയ്ക്കാന്‍ നല്ലത് മട്ടയരി തന്നെയാണ് 100 ഗ്രാം വെള്ള അരിയില്‍ 28 ഗ്രാം കാര്‍ബോഹൈഡ്രേറ്റ്‌സ് അടങ്ങിയിട്ടുണ്ട്. ഇത് മട്ട അരിയില്‍ 23 മാത്രമാണ്. ഇതിനാല്‍ തടി കുറയ്ക്കുക, കൊളസ്‌ട്രോള്‍ കുറയ്ക്കുക, പ്രമേഹം കുറയ്ക്കുക തുടങ്ങിയ ഗുണങ്ങള്‍ ലഭിയ്ക്കുന്നതിന് മട്ടയരി കഴിയ്ക്കണം.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
