രാജ്യത്തിന്റെ സാമൂഹിക – സാമ്പത്തിക നിലയിലുണ്ടായിട്ടുള്ള മാറ്റം റോഡുകളിലും പ്രത്യക്ഷമാണ്. റോഡുകളിലെത്തുന്ന വാഹനങ്ങളുടെ എണ്ണം ദിവസകണക്കിനാണ് വര്‍ധിക്കുന്നത്. മെട്രോ നഗരങ്ങളില്‍ മാത്രമല്ല ഗതാഗതക്കുരുക്കുകള്‍ പേടിസ്വപ്‌നമാകുന്നത്, ചെറിയ നഗരങ്ങളുടെയും സ്ഥിതി വ്യത്യസ്തമല്ല. സംസ്ഥാനപാതകളെ ദേശീയ പാതകളായി ഉയര്‍ത്തിക്കൊണ്ടുവരാനുള്ള ശ്രമങ്ങൾ വ്യാപകമായി നടന്നുവരികയാണ്. ഏറിവരുന്ന തിരക്കുകളെ കൈകാര്യം ചെയ്യാൻ സംസ്ഥാനപാതകളെക്കൂടി വികസിപ്പിച്ചെടുക്കേണ്ടതുണ്ട്. സംസ്ഥാനങ്ങളുടെ പരിമിതമായ വിഭവശേഷിയെക്കാൾ മികച്ച നിലയിൽ കേന്ദ്രത്തിന് കൊണ്ടുപോകാൻ കഴിയും. 2022-ലെ കണക്കനുസരിച്ച് എട്ടു വര്‍ഷത്തിനിടയില്‍ സംസ്ഥാന ഹൈവേ അടക്കം 43,000 കിലോമീറ്റര്‍ സംസ്ഥാനപാതകളെയാണ് ദേശീയപാതയാക്കി ഉയര്‍ത്തിക്കൊണ്ടുവന്നത്.
എങ്ങനെയാണ് സംസ്ഥാനപാത ദേശീയപാതയാകുന്നത്?
സംസ്ഥാന ഹൈവേകളെ (എസ്എച്ച്) ദേശീയ ഹൈവേകളായി (എന്‍എച്ച്) ഉയര്‍ത്തുന്നത് കേന്ദ്ര – സംസ്ഥാന സര്‍ക്കാരുകളുടെ കൂട്ടായ പ്രവര്‍ത്തനത്തിലൂടെയാണ്. ഏതെങ്കിലും എസ്എച്ചുകളെ ദേശീയപാതകളാക്കാന്‍ പറ്റുകയുമില്ല. ഒരു പ്രദേശത്തിന്റെ വികസനത്തിന് പലവിധത്തിൽ പ്രാധാന്യള്ള റോഡുകളെയാണ് എന്‍എച്ചുകളാക്കി ഉയര്‍ത്താന്‍ സംസ്ഥാന സര്‍ക്കാരുകള്‍ പരിഗണിക്കുക. മറ്റു ദേശീയപാതകളുടെ വികസനത്തിന് ഈ റോഡ് എത്രത്തോളം ഉപകരിക്കുമെന്നും അറിയേണ്ടതുണ്ട്. കഴിഞ്ഞില്ല, കേന്ദ്ര സര്‍ക്കാര്‍ നിശ്ചയിച്ചിരിക്കുന്ന മാനദണ്ഡങ്ങളെല്ലാം പാലിച്ചാലേ റോഡിനെ എന്‍എച്ചാക്കി ഉയര്‍ത്തുകയുള്ളു.
കേന്ദ്ര റോഡ് ഗതാഗത-ഹൈവേ മന്ത്രാലയം പുറത്തിറക്കിയ മാനദണ്ഡ പട്ടികയില്‍ പ്രധാനപ്പെട്ടതാണ് പ്രധാന്‍മന്ത്രി ഗട്ടിശക്തി നാഷണല്‍ മാസ്റ്റര്‍ പ്ലാന്‍. പ്രധാന വിനോദസഞ്ചാര കേന്ദ്രങ്ങള്‍, വ്യവസായ മേഖലകള്‍, സംസ്ഥാനതലസ്ഥാനങ്ങള്‍, പ്രധാനപെട്ടതും അല്ലാത്തതുമായ തുറമുഖങ്ങള്‍, അയല്‍രാജ്യങ്ങള്‍ എന്നിവയെ ബന്ധിപ്പിക്കുന്ന സംസ്ഥാനപാതകളെയാണ് എന്‍എച്ചായി പരിവർത്തിപ്പിക്കുന്നതിന് പരിഗണിക്കുക. മലയോര മേഖലകളെയോ ഒറ്റപ്പെട്ട മേഖലകളയോ ബന്ധിപ്പിക്കുന്ന റോഡുകളെയും എന്‍എച്ച് ആയി ഉയര്‍ത്താന്‍ പറ്റും. ഒരു പ്രദേശത്തിന്റെ സാമ്പത്തിക വളര്‍ച്ചയ്ക്ക് സഹായകമാകുകയും യാത്രാദൂരം കുറയ്ക്കുകയും ചെയ്യുന്ന റോഡുകളും പിന്നാക്ക മേഖലകളിലേക്കും മറ്റുമുള്ള റോഡുകളും പട്ടികയില്‍ ഇടം പിടിക്കാന്‍ സാധ്യതയുള്ളതാണ്. നിലവിലുള്ള ദേശീയപാതയുടെ ശൃംഖല വിപുലീകരിക്കാന്‍ സഹായിക്കുന്ന റോഡുകളെ എന്‍എച്ചായി ഉയര്‍ത്താന്‍ സാധ്യത കൂടുതലാണ്.
ഒരു സംസ്ഥാനപാതയെ ദേശീയപാതയായി ഉയര്‍ത്തുമ്പോള്‍, ആ പ്രദേശത്തെ അത് സാമ്പത്തികമായും പാരിസ്ഥിതികമായും സാമൂഹികമായും എങ്ങനെയെല്ലാം സ്വാധീനിക്കും എന്നതിനെക്കുറിച്ച് വിശദമായ പഠനം നടത്തുകയും ചെയ്യും. സംസ്ഥാന പാതകളെ ദേശീയപാതകളാക്കി ഉയര്‍ത്തുമ്പോഴുണ്ടാകുന്ന നേട്ടങ്ങള്‍ മനസ്സിലാക്കാന്‍ ഈ പഠനങ്ങള്‍ സഹായിക്കും.
അത്യാവശ്യമാണോ ഈ മാറ്റങ്ങൾ?
ഇന്ത്യയെപ്പോലെ വൈപുല്യമുള്ള ഒരു രാജ്യത്തിന്റെ വിവിധ പ്രദേശങ്ങളെ ബന്ധിപ്പിക്കുന്നതില്‍ പ്രധാന പങ്കാണ് ദേശീയപാതകള്‍ വഹിക്കുന്നത്. യാത്രകള്‍ക്ക് റോഡുകള്‍ ആശ്രയിക്കുന്ന വലിയൊരു വിഭാഗം ജനതയെ ദേശീയപാതകള്‍ സഹായിക്കും. ഒരു പ്രദേശത്തിന്റെ സാമ്പത്തികവളര്‍ച്ചയെയും വികസനത്തെയും ദേശീയപാതകള്‍ അനുകൂലമായി സ്വാധീനിക്കുമെന്ന് പറഞ്ഞാല്‍ അതിശയോക്തിയില്ല.
സംസ്ഥാനപാതകളെ ദേശീയ പാതകളാക്കുന്നതിലൂടെ സംസ്ഥാനങ്ങളെയും പ്രധാനപ്പെട്ട കാര്‍ഷിക-വ്യവസായിക-വാണിജ്യ മേഖലകളെയും ബന്ധിപ്പിക്കാനും അതുവഴി എല്ലാ മേഖലകളിലും കൂടുതല്‍ നേട്ടം കൈവരിക്കാനും സാധിക്കുന്നു. പല മേഖലകളില്‍ നിന്നുള്ള ഉത്പന്നങ്ങള്‍ക്ക് കൂടുതല്‍ വിപണി കണ്ടെത്താനും ചരക്കുനീക്കം സുഗമമാക്കാനും എന്‍എച്ചുകള്‍ക്ക് സാധിക്കും. ഇത് സംസ്ഥാനങ്ങളുടെയും രാജ്യത്തിന്റെ ആകെമൊത്തം വരുമാനത്തിലും നേട്ടമുണ്ടാക്കും.
എങ്ങനെയാണ് സംസ്ഥാനപാതയെ ദേശീയപാതയാക്കുക?
ഇതിനായി സംസ്ഥാന പാതകളെ അടിമുടി മിനുക്കും. റോഡുകളുടെ നീളവും വീതിയും ഗുണമേന്മയും കൂട്ടുകയും, ആവശ്യമായ ഇടങ്ങളിലെല്ലാം പാലങ്ങളും ആകാശപാതകളും പണിയുകയും ചെയ്യും. റോഡുമാര്‍ഗമുള്ള ഗതാഗതത്തിന്റെ സുരക്ഷിതത്വവും അടിസ്ഥാനസൗകര്യങ്ങളുടെ നിലവാരവും വര്‍ധിപ്പിക്കും. കേന്ദ്ര സര്‍ക്കായിരിക്കും ഇതിനായുള്ള വിഹിതം നീക്കിവെക്കുക. സംസ്ഥാന സര്‍ക്കാരുകളെ അപേക്ഷിച്ച് ദേശീയ ഹൈവേകള്‍ക്ക് കൂടുതല്‍ തുക നീക്കിവെക്കാന്‍ കേന്ദ്രത്തിന് സാധിക്കും. സംസ്ഥാന പാതകളെ ദേശീയ ഹൈവേകളായി ഉയര്‍ത്തുന്നതോടെ റോഡുകളുടെ അറ്റകുറ്റപ്പണിക്കും മറ്റുമായി കൂടുതല്‍ ഫണ്ടിങ്ങും ലഭിക്കും.
എന്‍എച്ചുകള്‍ തന്ത്രപ്രധാനമായ റോഡുകളായതുകൊണ്ട് അടിയന്തരഘട്ടങ്ങളിലും, സംസ്ഥാനങ്ങളില്‍ സംഘര്‍ഷ സാധ്യതകളുണ്ടാകുമ്പോഴും സൈന്യത്തിന്റെ സേവനം ലഭിക്കാന്‍ അധികം കാത്തിരിക്കേണ്ടി വരില്ലെന്നും വിദഗ്ധര്‍ പറയുന്നു. സംസ്ഥാന പാതകളെ ദേശീയ പാതകളാക്കുന്നതോടെ കൂടുതല്‍ വഴിയോര വിശ്രമകേന്ദ്രങ്ങളും സര്‍വീസ് സ്‌റ്റേഷനുകളും വഴിയടയാളങ്ങളും യാത്രകളെ കൂടുതല്‍ സുഗമമാക്കും. മാത്രമല്ല, പ്രദേശത്ത് പുതിയ വ്യവസായങ്ങളും മറ്റും തുടങ്ങാനുള്ള സാധ്യത കൂടിയാണ് തുറന്നിടുന്നത്.
