നെയ്യ്
നമ്മള്‍ മിക്ക സാധനങ്ങളും പാചകം ചെയ്യുമ്പോള്‍ അതില്‍ നെയ്യ് ചേര്‍ക്കാറുണ്ട്. ചിലര്‍ ദോശ ചുടുമ്പോള്‍ പോലും നെയ്യ് ചേര്‍ക്കുന്നു. അതുപോലെ ചപ്പാത്തി സോഫ്റ്റായി കിട്ടാനും നമ്മള്‍ നെയ്യ് ചേര്‍ക്കാറുണ്ട്. എന്നാല്‍, ഇതേ നെയ്യ് രാവിലെ വെറും വയറ്റില്‍ കഴിച്ചാല്‍ നിരവധി ആരോഗ്യ ഗുണങ്ങളാണ് നമ്മള്‍ക്ക് ലഭിക്കുക.
പലര്‍ക്കും ചില ആഹാരങ്ങള്‍ രാവിലെ തന്നെ കഴിച്ചാല്‍ അസിഡിറ്റി പ്രശ്‌നങ്ങള്‍ കാണാം. പിന്നെ പുളിച്ച് തേട്ടല്‍, വയര്‍ ചീത്ത് വരുന്നത് അതുപോലെ തന്നെ മനംപുരട്ടലും ഇവര്‍ക്ക് അനുഭവപ്പെടാം. എന്നാല്‍, ഇത്തരം പ്രശ്‌നങ്ങള്‍ ഇല്ലാതിരിക്കാനും ദഹനം നല്ലപോലെ നടക്കാനും മലബന്ധ പ്രശ്‌നങ്ങള്‍ തടയുന്നതിനും നെയ്യ് രാവിലെ തന്നെ കഴിക്കുന്നത് വളരെ നല്ലതാണ്.
ഇവ കൂടാതെ, ജോയിന്റ് പെയ്ന്‍ മാറ്റി എടുക്കാനും ഇതിന്റെ ആരോഗ്യം സംരക്ഷിക്കുന്നതിനും നെയ്യ് സഹായിക്കുന്നു. നമ്മള്‍ രാവിലെ തന്നെ നെയ്യ് കഴിക്കുമ്പോള്‍ അന്നത്തെ ദിവസത്തിന് വേണ്ട എനര്‍ജി നമ്മളിലേയ്ക്ക് എത്തുകയാണ്. ഇത് മാത്രമല്ല, മഴക്കാലത്തെ കഫക്കെട്ട് പോലെയുള്ള പ്രശ്‌നങ്ങള്‍ കുറച്ചെടുക്കാന്‍ നെയ്യ് സഹായിക്കുന്നു. അതുപോലെ, നമ്മള്‍ കഴിക്കുന്ന ആഹാരത്തില്‍ നിന്നും ശരീരത്തിന് വേണ്ട പോഷകങ്ങള്‍ എത്തിക്കാനും തലച്ചോറിന്റ ആരോഗ്യം മെച്ചപ്പെടുത്തുന്നതിനും നല്ല ആരോഗ്യമുള്ള ചര്‍മ്മകാന്തിയ്ക്കും നെയ്യ് സഹായിക്കുന്നു.
വെള്ളം കുടിക്കേണ്ട ശരിയായ സമയം
Health Video: വെള്ളം കുടിക്കേണ്ട മികച്ച സമയം ഇതാണ്
ഉണക്കമുന്തിരി
രാവിലെ തലേദിവസം കുതിര്‍ത്ത ഉണക്കമുന്തിരിയും അതിന്റെ വെള്ളം കഴിച്ച് നോക്കിയിട്ടുണ്ടോ? നിരവധി ആരോഗ്യ സൗന്ദര്യ ഗുണങ്ങളാണ് ഇതിലൂടെ നിങ്ങള്‍ക്ക് ലഭിക്കുക. ധാരാളം നാരുകളാല്‍ സമ്പന്നമാണ് ഉണക്കമുന്തി. അതിനാല്‍ തന്നെ ഇത് ദഹനത്തെ സഹായിക്കുന്നു. അതുപോലെ തന്നെ വയറ്റില്‍ നിന്നും കൃത്യമായി മലവിസര്‍ജ്യം നടത്താന്‍ ഇത് സഹായിക്കുന്നുണ്ട്.
ശരീരഭാരം കുറയ്ക്കാനും അതുപോലെ വയര്‍ കുറയ്ക്കാനും ആഗ്രഹിക്കുന്നവര്‍ക്ക് ബെസ്റ്റ് ഓപ്ഷനാണ് ഉണക്കമുന്തിരി. കാരണം, ഇതില്‍ മധുരത്തിന്റെ അളവും കാലറീസും വളരെ കുറവാണ്. അതിനാല്‍ തന്നെ ഇത് കഴിക്കുന്നതിലൂടെ നിങ്ങള്‍ക്ക് ശരീരഭാരം വര്‍ദ്ധിക്കുന്നില്ല, മാത്രവുമല്ല, ഇതിനെ നാരുകള്‍ വയര്‍ വേഗത്തില്‍ നിറഞ്ഞ അനുഭൂതി ഉണ്ടാക്കുകയും ചെയ്യുന്നു.
രക്തക്കുറവ് ഉള്ളവര്‍ക്ക് ഉണക്കമുന്തിരി നല്ലതാണ്. ഇതില്‍ ധാരാളം അയേണ്‍ അടങ്ങിയിരിക്കുന്നു. അതുപോലെ, കാല്‍സ്യം, ബോറോണ്‍ എന്നിവയും ഇതില്‍ അടങ്ങിയിരിക്കുന്നു. നല്ല ആന്റിഓക്‌സിഡന്റ് ആയതിനാല്‍ തന്നെ രോഗപ്രതിരോധശേഷി വര്‍ദ്ധിപ്പിക്കാനും ഇത് സഹായിക്കുന്നുണ്ട്.
ഈന്തപ്പഴം
നിരവധി പോഷകങ്ങളാല്‍ സമ്പന്നമാണ് ഈന്തപ്പഴം. ഇന്‍സ്റ്റന്റ് എനര്‍ജി ശരീരത്തിന് ലഭിക്കുന്നതിന് ഈന്തപ്പഴത്തിനേക്കാള്‍ മികച്ച ആഹാരം ഇല്ല എന്ന് പറയാം. അതിനാല്‍ വ്യായാമം ചെയ്യുന്നതിന് മുന്‍പ് മൂന്ന് ഈന്തപ്പഴം കഴിക്കുന്നത് നല്ലതാണ്. കൂടാതെ, ഇതില്‍ അടങ്ങിയിരിക്കുന്ന നാരുകള്‍ വയര്‍ വേഗത്തില്‍ നിറഞ്ഞ അനുഭൂതി ഉണ്ടാക്കാന്‍ സഹായിക്കുന്നു. ഇത് ശരീരഭാരം കുറയ്ക്കാനും ദഹനം നല്ല രീതിയില്‍ നടക്കുന്നതിനും സഹായിക്കുന്നുണ്ട്.
കൂടാതെ, ഇതില്‍ ആന്റിഓക്‌സിഡന്റ്‌സ് അടങ്ങിയിരിക്കുന്നതിനാല്‍ തന്നെ ഇത് രോഗപ്രതിരോധശേഷി വര്‍ദ്ധിപ്പിക്കുകയും അതുപോലെ തന്നെ ചര്‍മ്മത്തിന്റെ ആരോഗ്യം നിലനിര്‍ത്താന്‍ സഹായിക്കുകയും ചെയ്യുന്നു. ഇത് മാത്രമല്ല, രക്തം വര്‍ദ്ധിക്കാനും നല്ല രോഗപ്രതിരോധശേഷി വളര്‍ത്താനും ഈന്തപ്പഴം നല്ലതാണ്.
ബദാം
പലരും രാവിലെ വെറും വയറ്റില്‍ ബദാം കഴിക്കാറുണ്ടായിരിക്കും. തലേദിവസം കുതിര്‍ത്ത ബദാം തൊലി കളയാതെ കഴിക്കുന്നത് മുടിയുടെ ആരോഗ്യം മെച്ചപ്പെടുത്താനും അതുപോലെ, ചര്‍മ്മത്തിന്റെ ആരോഗ്യത്തിനും നല്ല ആരോഗ്യമുള്ള ശരീരം നിലനിര്‍ത്താനും ഇത് സഹായിക്കുന്നുണ്ട്.
ഇതില്‍ നല്ല കൊളസ്‌ട്രോള്‍ അടങ്ങിയിരിക്കുന്നതിനാല്‍ തന്നെ ശരീരത്തില്‍ നിന്നും ബാഡ് കൊളസ്‌ട്രോള്‍ കുറയ്ക്കാനും ഇതിലെ മഗ്നീഷ്യത്തിന്റെ സാന്നിധ്യം രക്തസമ്മര്‍ദ്ദം കുറയ്ക്കാനും നിങ്ങളെ സഹായിക്കുന്നതാണ്. ഇത് മാത്രമല്ല, പ്രമേഹത്തെ ഒരു പരിധിവരെ നിയന്ത്രിച്ച് നിര്‍ത്താനും ബദാം രാവിലെ വെറും വയറ്റില്‍ കഴിക്കുന്നത് സഹായിക്കുന്നുണ്ട്.
ഇതില്‍ അടങ്ങിയിരിക്കുന്ന വിറ്റമിന്‍ ഇ ഓക്‌സിഡേറ്റീവ് സ്‌ട്രെസ്സ് കുറയ്ക്കാനും തലച്ചോറിന്റെ ആരോഗ്യം കാത്ത് സൂക്ഷിക്കുന്നതിനും ഇത് സഹായിക്കുന്നുണ്ട്. അതിനാല്‍ രാവിലെ കുതിര്‍ത്ത മൂന്ന് അല്ലെങ്കില്‍ നാല് ബദാം കഴിക്കുന്നത് നല്ലതാണ്.
ഉലുവ വെള്ളം
രാവിലെ തന്നെ ഉലുവ വെള്ളം കഴിക്കുന്നത് സത്യത്തില്‍ നമ്മളുടെ ആരോഗ്യം നല്ലപോലെ മെച്ചപ്പെടുത്താന്‍ സഹായിക്കുന്നുണ്ട്. ഇതിനായി തലേദിവസം നല്ല വെള്ളത്തില്‍ കുറച്ച് ഉലുവ കുതിര്‍ത്ത് വെക്കുക. ഈ വെള്ളം പിറ്റേ ദിവസം രാവിലെ വെറും വയറ്റില്‍ കുടിക്കാവുന്നതാണ്. ഇതിലെ ഉലുവ കഴിക്കുന്നതും നല്ലതാണ്.
സ്ത്രീകളിലെ മുലപ്പാല്‍ വര്‍ദ്ധിപ്പിക്കുന്നതിനും അതുപോലെ ശരീരഭാരം കുറയ്ക്കുന്നതിനും ഉലുവ വെള്ളം നല്ലതാണ്. ഉലുവയില്‍ ധാരാളം പോഷകങ്ങളും നാരുകളും അടങ്ങിയിട്ടുണ്ട്. ഇത് വിശപ്പ് കുറയക്കാന്‍ സഹായിക്കുന്നുണ്ട്. അതുപോലെ ശരീരത്തിലെ അമിതമായിട്ടുള്ള ചൂട് കുറയ്ക്കാനും ആഹാരം വേഗത്തില്‍ ദഹിക്കാനും ഇത് സഹായിക്കുന്നു. മലബന്ധം കുറയ്ക്കാനും ഇത് സഹായിക്കും.
